استانا قالاسىنىڭ اكىمى جەڭىس قاسىمبەك Instagram پاراقشاسىندا الەۋمەتتىك پاتەر سانى تۋرالى ءمالىم ەتتى، دەپ حابارلايدى ەلوردا اكىمدىگىنىڭ رەسمي سايتى.

«بيىل كەزەكتە تۇرعاندارعا 3 مىڭ 300 الەۋمەتتىك پاتەر سالۋدى جانە تاپسىرۋدى جوسپارلاپ وتىرمىز. ولار حالىقتىڭ الەۋمەتتىك وسال توبىنا ۇلەستىرىلەدى. قالانى ارالاۋ بارىسىندا بىرقاتار جەڭىلدەتىلگەن الەۋمەتتىك تۇرعىن ءۇي قۇرىلىسىنىڭ بارىسىمەن تانىستىم. اۋماقتى اباتتاندىرۋعا نازار اۋدارا وتىرىپ، قۇرىلىستى ساپالى جۇرگىزۋدى تاپسىردىم.

قالا تۇرعىندارىنىڭ تۇرعىن ءۇي جاعدايىن جاقسارتۋ ءۇشىن وزگە دە مەملەكەتتىك باعدارلامالاردى ىسكە اسىرۋدى جالعاستىرامىز، ماسەلەن «ەلوردا جاستارى» جاستارعا ارنالعان ارنايى تۇرعىن ءۇي باعدارلاماسى، جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن باسپانا. سونىمەن قاتار، تۇرعىن ءۇي سەرتيفيكاتىنىڭ سوماسى 1 ملن تەڭگەدەن 1,5 ملن تەڭگەگە دەيىن ۇلعايدى، تۇرعىن ءۇي كومپانياسىنىڭ (قازاقستاندىق تۇرعىن ءۇي كومپانياسى) قاتىسۋشىلارىنىڭ ساناتى كەڭەيدى جانە ت.ب.

سول سياقتى اپاتتى جاعدايداعى توزىعى جەتكەن تۇرعىن ۇيلەردى بۇزۋدى جالعاستىرامىز، قۇرىلىسى ۇزاققا سوزىلعان نىسانداردى اياقتايمىز، تۇرعىن ءۇي كەشەندەرىن جوندەيمىز جانە ت.ب.»، – دەپ جازدى جەڭىس قاسىمبەك.

Abai.kz