قايرات ساتىبالدىنىڭ (ەكس-پرەزيدەنت نۇرسۇلتان نازارباەۆتىڭ نەمەرە ءىنىسى) بۇرىنعى ايەلى گۇلميرا ساتىبالدىعا قاتىستى ءىس سوتقا جىبەرىلدى. بۇل تۋرالى قر سىبايلاس جەمقورلىققا قارسى اگەنتتىگى حابارلادى.

«اگەنتتىك گ.ساتىبالدى مەن باسقا دا ادامدارعا قاتىستى كاسىپكەردى زاڭسىز باس بوستاندىعىنان ايىرۋ، اسا ءىرى مولشەردە بوپسالاۋ جانە اۋىر زارداپتارعا اكەپ سوققان ءوزىن-ءوزى باسقارۋ كۇدىگى بويىنشا تەرگەۋدى اياقتادى»، - دەلىنگەن بەيسەنبى كۇنى تاراتقان حابارلامادا.

قازىرگى ۋاقىتتا پروتسەسكە قاتىسۋشىلار قىلمىستىق ءىس ماتەريالدارىمەن تانىسۋدى اياقتادى.

«الماتى قالاسى تەرگەۋ سوتىنىڭ سانكتسياسىمەن گ.ساتىبالدىعا قاتىستى «قاماۋدا ۇستاۋ» تۇرىندەگى بۇلتارتپاۋ شاراسى تاڭدالدى. قىلمىستىق ءىستى ءجىتى قاراۋ ءۇشىن الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا جىبەرىلدى»، - دەپ ءتۇسىندىردى انتيكور.

ەسكە سالساق، گۇلميرا ساتىبالدى ۋنيۆەرسيادا-2017 نىساندارىن جوندەۋگە جۇمسالعان قاراجاتتى جىمقىرۋ، رەيدەرلىك جانە ادام ۇرلاۋ ىستەرىمەن ايىپتالۋدا. سونىمەن قاتار، ول 2023 جىلدىڭ 30 ماۋسىمىندا قىزىلوردادا 441 ميلليون تەڭگە كولەمىندە شىعىن كەلتىرگەنى ءۇشىن تاعى سەگىز جىلعا سوتتالدى.

Abai.kz