قازاقستاننىڭ سوت جۇيەسى اۋقىمدى وزگەرىستى باستان وتكەرىپ جاتىر. بىلەسىزدەر، ءدال قازىر بۇكىل قازاقستان ەكس-مينيستر بيشىمباەۆ ءىسىن قاداعالاپ وتىر. نەگە؟ سەبەبى ءىس تۇرمىستىق زورلىق-زومبىلىققا قاتىستى. بۇل – ءبىر. ال اتالعان ماسەلە قوعامدا ۋشىعىپ تۇر.

ەكىنشى، سوت پروتسەسى اشىق ءوتىپ جاتىر. كەز كەلگەن ادام YouTube جەلىسىنەن وتىرىستى تاماشالاي الادى. ءتىپتى، بۇل ءىس ەل اۋقىمىنان شىعىپ، Washington Post, Al Jazeera سەكىلدى الپاۋىت مەديالاردا ايتىلدى.

بۇعان دەيىن پارلامەنت مىنبەرىنەن بىرنەشە رەت سۋديالارعا، سوت جۇيەسىنە قاتىستى سىن ايتقان ەدىم. قازىر ەسكى قازاقستاننىڭ سارقىنشاقتارى جويىلىپ، پرەزيدەنت تاپسىرماسىنا سايكەس اشىقتىق قالىپتاسىپ كەلە جاتقانىنا كۋا بولىپ وتىرمىز.

بيشىمباەۆ ءىسىنىڭ تىكەلەي ەفيردەن كورسەتىلۋى حالىقتىڭ قۇقىقتىق ساۋاتىن ارتتىرادى. ەندى، ازاماتتار سوت وتىرىسى قالاي وتەتىنىن، قورعاۋشىلاردىڭ مىندەتىن، سوت پەن پروكۋروردىڭ قالاي جۇمىس ىستەيتىنىن ۇيرەنەدى. مۇنىڭ ءبارى، البەتتە، وڭ وزگەرىستەر. ەڭ باستىسى – وسى ارقىلى قوعامنىڭ سوت جۇيەسىنە، ونىڭ ادىلدىگىنە سەنىمى ارتا باستادى. اشىق وتكەن پروتسەستە بىرەۋ-مىرەۋدى ساتىپ الۋ مۇمكىن ەمەس.

بۇل ءىس – بۇكىل حالىقتىڭ نازارىن اۋدارعان العاشقى سوت وتىرىسى. الماتىدا اۆتوبۋس جۇرگىزۋشىسىن ۇرعان ادامعا قاتىستى سوت وتىرىسى دا تىكەلەي ەفيردە كوپشىلىككە كورسەتىلدى. سونىمەن قاتار قاراعاندىدا جەدەل-جاردەم كولىگى جۇرگىزۋشىسىن ۇرعان ادامعا قاتىستى ءىس تە ونلاين كورسەتىلدى.

ەسكى قازاقستاندا سوت وتىرىستارى جابىق ءوتىپ، كىم نەنى قاراپ جاتقانى، ءىستى قالاي سارالاپ جاتقان بەلگىسىز بولاتىن. بۇعان دەيىن قۋاندىق بيشىمباەۆتىڭ سوتتالىپ، كەيىن بوساپ شىعۋى دا وسى سەبەپتى ەدى. كىم نازارباەۆقا جاقىن بولدى نە كەشىرىم سۇرادى، سول جازادان وڭاي قۇتىلاتىن.

قازىر بۇلاي جاساۋ مۇمكىن ەمەس. سوت وتىرىسىن تىكەلەي ەفيردەن كورسەتۋ ارقىلى، وعان القابيلەردى قاتىستىرۋ ارقىلى سوت جۇيەسىنىڭ اشىقتىعىن قامتاماسىز ەتىپ وتىر. ارينە، بۇل باعىتتا اتقاراتىن جۇمىس جەتەرلىك. سوت جۇيەسىنە، القابيلەرگە قاتىستى زاڭ جوبالارىن ءالى دە جەتىلدىرۋ كەرەك. بىراق ەڭ باستىسى، سەڭ قوزعالدى. ەندى ونى توقتاتۋ مۇمكىن ەمەس!

ابزال قۇسپاننىڭ جازباسى

Abai.kz