قۇلسارى قالاسىندا سۋ تاسقىنىنان زارداپ شەككەن تۇرعىندارعا تولەماقى تولەۋ جالعاسۋدا.

اتىراۋ وبلىسىنىڭ تج جونىندەگى جەدەل شتابى 1209 تۇرعىننىڭ ەسەپشوتىنا تولەماقى اۋدارىلعانىن حابارلادى. ونىڭ 451-ءى جوندەۋ-قالپىنا كەلتىرۋ جۇمىستارىن جۇرگىزۋ ءۇشىن، 758-ءى تۇرعىن ءۇي ساتىپ الۋ نەمەسە ءۇي قۇرىلىسىن سالۋ ءۇشىن. بۇل تۋرالى Abai.kz حابارلايدى.

كوميسسيا قورىتىندىسى بويىنشا ءۇيى باعالانىپ، قورىتىندىسى شىققان تۇرعىننىڭ ءبىرى زەينەتكەر داريعا اعىسوۆا. 

- كوميسسيانىڭ شەشىمىمەن ءۇيىمىز بۇزىلاتىن بولدى. حابارلاما كەلگەن سوڭ قاراجات ەرتەسىنە اۋدارىلدى. وسى قاراجاتقا الداعى ۋاقىتتا ءۇي ساتىپ العىمىز كەلەدى. بيىل سالىنعانىنا 10 جىل بولعان ءۇيىمىز سۋعا كەتكەندە اياق-جولدى الىپ جۇرەتىن مۇمكىندىك بولعان جوق. قۇجاتتارىمىزدى عانا تۇگەندەپ الا الدىق. بولاشاقتا بارلىعى قالپىنا كەلەدى دەپ ۇمىتتەنەمىز. بۇزىلعان ءۇيدىڭ ورنى ءوز يەلىگىمىزدە قالاتىن بولدى. سۋ تاسقىنى بولىپ جاتقاندا ماڭعىستاۋ وبلىسىنداعى تۋىستارىمىزدىڭ ۇيىنە وتباسىمىزبەن ۋاقىتشا كوشتىك. ول جەردە بىرنەشە ۋاقىت بولىپ، سۋ سەيىلگەن سوڭ قايتا كەلدىك", – دەدى زەينەتكەر. 

ءۇيى بۇزىلاتىن تۇرعىنداردىڭ قاتارىندا ەربولات تاڭقيۆ تە بار:

- ەڭ الدىمەن زالالسىزداندىرۋ جۇمىستارىنا ءوتىنىش بەردىك. ءۇيدىڭ قابىرعاسى جارىلىپ، سۋدىڭ اسەرىنەن ەدەن كوتەرىلىپ كەتتى. باعالاۋشىلار مەن تەحنيكالىق زەرتتەۋ ماماندارى دا ءۇيدىڭ جاعدايىن كوردى. مۇلىكتى باعالاۋشىلار دا كەلدى. سودان سوڭ كوميسسيانىڭ شەشىمىمەن ءۇيىمىزدىڭ بۇزىلاتىندىعى تۋرالى حابارلاما الدىق. ءۇيدى بۇزۋعا 45 كۇن مەرزىم بەرىلەدى ەكەن، سوندىقتان ءۇيدى بۇزۋ جۇمىستارىنا كىرىسىپ كەتتىم", – دەدى ەربولات تاڭقيەۆ.

Abai.kz