اقتوبەدەشيكىزاتتى تاپسىراتىن زاۋىت جوق. ناتيجەسىندە، شارۋالار مالدىڭ ءجۇنى مەن تەرىسىن دالاعا لاقتىرىپ جاتىر. بۇل تۋرالى Abai.kz حابارلايدى.

جىلىنا 3 مىڭ توننادان استام قوي ءجۇنى وندىرىلسە، سونىڭ 90%-ى ىكە اسپايدى. ءتورت تۇلىكپەن كۇن كورىپ وتىرعان شارۋا قوجالىق وكىلدەرىنىڭ بۇل ماسەلەسى جىلدان جىلعا سوزىلىپ كەلەدى.

ماسەلەن قوي ءجۇنىن قىرقاتىن ادامعا ءار قوي ءۇشىن 800 تەڭگەدەن تولەنەدى، الايدا ءىرى قارانىڭ تەرىسى مەن ۇساق مالدىڭ ءجۇنى قوقىستا تاستالىنىپ جاتىر.

"جىلدا سويىلىپ جاتقان سيىردىڭ، ءىرى قارا مالدىڭ تەرىسىن دالاعا تاستاپ جاتىرمىز. جۇندەرىن دە تاستاپ جاتىرمىز. جىلدا وسىنداي پروبلەما. ورتەيمىز. قالعانى جاتادى. كومىپ تاستايمىز. كورىپ تۇرسىزدار. جىلىنا 100 باستاي ءىرى قارا سويامىن. سونىڭ تەرىسىن ءبارىن لاقتىرىپ تاستايمىز. بارىمىزدە ءبىر تالاپ: ءجۇندى الىپ، قايتا وڭدەسىن", – دەدى شارۋا قوجالىعىنىڭ باسشىسى تالعات نۇرجىگىتوۆ.

شارۋالار مەرينوس تۇقىمدى قويدىڭ ءجۇنى نارىقتا سۇرانىسقا يە ەكەنىن ايتادى. بۇل ماسەلە قولعا الىنباسا، ول قويدىڭ تۇقىمى جويىلىپ كەتەتىندىگىن ەسكەرتەدى.

بۇل – وبلىستاعى بارلىق شارۋالاردىڭ باس اۋرۋىنا اينالعان ماسەلە. ال، اۋىل شارۋاشىلىعى باسقارماسىنداعىلار قوي ءجۇنىن وڭدەيتىن زاۋىت قۇرىلىسى بيىل اياقتالاتىنىن ايتتى.

ء"جۇن وڭدەۋ باعىتىندا بۇگىنگى كۇنى زاۋىت سالۋعا KAZFELTEC جاۋاپكەرشىلىگى شەكتەۋلى سەرىكتەستىگى كىرىستى. قازىرگى كۇنى قۇرىلىس جۇمىستارىن جۇرگىزىپ جاتىر. جوسپار بويىنشا وسى جىلدىڭ 2024 جىلدىڭ جەلتوقسان ايىندا زاۆود ىسكە قوسىلۋى ءتيىس. تەرى وڭدەۋ جاعى دا جوسپاردا تۇر. 2025 جىلدىڭ جەلتوقسان ايىندا ىسكە قوسىلۋى كەرەك. وعان ءبىزدىڭ يندۋستريالدىق زونادا جەر قاراستىرىلعان", – دەدى اقتوبە وبلىستىق اۋىل شارۋاشىلىعى باسقارماسى مال شارۋاشىلىعى ءبولىمىنىڭ باسشىسى پانابەك بيمۇراتوۆ.

ال زاۋىت ىسكە قوسىلسا، شارۋالار شيكىزاتتى ءتيىمدى باعادا تاپسىرۋعا دايىن وتىر.

Abai.kz