الماتى وبلىسىندا ءوتىپ جاتقان ازيا چەمپيوناتى قارساڭىندا تەڭگە ىلۋدەن حالىقارالىق فەدەراتسياسى قۇرىلدى. فەدەراتسيانىڭ نەگىزىن قالاعان مەملەكەتتەر: قازاقستان، قىتاي، موڭعوليا جانە ۆەنگريا ەلدەرىنىڭ ۇلتتىق فەدەراتسيالارى.

حالىقارالىق فەدەراتسيانىڭ باسشىسى بولىپ قازاقستاندىق كاسىپكەر، تەڭگە ءىلۋ رەسپۋبليكالىق فەدەراتسياسىنىڭ پرەزيدەنتى امانگەلدى ابدىقادىروۆ سايلاندى، اتقارۋشى ديرەكتور بولىپ ايبەك تۇركەباي بەكىتىلدى. جاڭادان قۇرىلعان فەدەراتسيانىڭ ۆيتسە-پرەزيدەنتى بولىپ قىتاي وكىلى جي جياۋين تاعايىندالدى. نەگىزىن قالاعانداردىڭ قاتارىنا ۆەنگريا ەتنوسپورت فەدەراتسيا پرەزيدەنتى Aتتيلا حوتتاك, مونعوليا ۇلتتىق سپورت قاۋىمداستىعىنىڭ پرەزيدەنتى روم اۋەسحان كىردى. ارنايى ۇيىمداستىرىلعان كونفەرەنتسيادا تەڭگە ءىلۋ سپورتىنىڭ ورتاق ەرەجەسى قابىلدانىپ، بولاشاق جوسپارى تالقىلاندى.

جيىن بارىسىندا تەڭگە ءىلۋ رەسپۋبليكالىق فەدەراتسياسىنىڭ پرەزيدەنتى امانگەلدى ابدىقادىروۆ اتقارىلعان جۇمىستارعا توقتالىپ، الداعى جۇمىس جوسپارىمەن تانىستىردى.

«قازىر كۇزدە ەلىمىزدە وتەتىن 5-ءشى دۇنيەجۇزىلىك كوشپەندىلەر ويىندارىنا قارقىندى دايىندىق جۇمىستارى جانە وعان قاتىساتىن سپورتشىلاردى ىرىكتەۋ ءجۇرىپ جاتىر. وسى ءدۇبىرلى دوداعا تىڭعىلىقتى دايىندالۋ ءۇشىن ۇلتتىق قۇراما اي سايىن وقۋ-جاتتىعۋ جيىندارىنا قاتىسۋدا. سونىمەن قاتار، ساۋىردە تەڭگە ىلۋدەن ازيا كۋبوگى وتسە، بۇگىن ازيا چەمپيوناتى باستالادى. وقۋ-جاتتىعۋ جيىندارى تامىز، قىركۇيەك ايلارىندا دا جالعاسىپ، وسى جيىندا دكو-نا قاتىساتىن ۇلتتىق قۇراما جاساقتالادى»، - دەدى فەدەراتسيا باسشىسى.

قر ۇلتتىق سپورت قاۋىمداستىعىنىڭ ۆيتسە-پرەزيدەنتى تاستانبەك ەسەنتاەۆ قازىر وزگە مەملەكەتتەردە تەڭگە ءىلۋ ۇلتتىق سپورتىمىزعا دەگەن قىزىعۋشىلىق ارتىپ كەلە جاتقانىن اتاپ ءوتتى.

«تەڭگە ىلۋدەن ازيا فەدەراتسياسىنىڭ قۇرىلۋى ۇلتتىق سپورتىمىزدىڭ دامۋىنا قوسىمشا سەرپىن بەرەتىنى انىق. ءداستۇرىمىز بەن قۇندىلىقتارىمىزدى دارىپتەيتىن ۇلتتىق سپورت تۇرلەرىنىڭ الەمگە تانىمال بولا تۇسۋىنە قىركۇيەكتە ەلوردامىزدا وتەتىن 5-ءشى دۇنيەجۇزىلىك كوشپەندىلەر ويىندارىنىڭ دا زور ىقپالى بولادى دەپ ويلايمىن»، - دەدى ت.ەسەنتاەۆ.

اسپان استى ەلىنىڭ وكىلى جي جياۋين ءوز ەلىندە تەڭگە ءىلۋ سپورتىنا قولداۋ دا، قىزىعۋشىلىق تا بار ەكەنىن ايتتى.

«بۇل ۇلتتىق سپورت ءتۇرى – ەلدىڭ اراسىنداعى مادەني-سپورتتىق قارىم-قاتىناستى نىعايتا ءتۇسۋ ءۇشىن وتە جاقسى قۇرال. الداعى ۋاقىتتا تەڭگە ءىلۋدىڭ ءبىزدىڭ ەلىمىزدە دە تانىمال سپورت تۇرىنە اينالۋى ءۇشىن جۇمىس ىستەيمىز»، - دەدى ول.

«كورەيا، جاڭا زەلانديا، بانگلادەش، بولگاريا سياقتى ات سپورتىمەن شۇعىلداناتىن كوپتەگەن مەملەكەت تەڭگە ىلۋگە قىزىعۋشىلىق ءبىلدىرىپ وتىر. مۇنى ارى قاراي دامىتۋ ءۇشىن قازاق ەلىنىڭ مۇمكىندىگى مول. ويتكەنى قازاقستاننىڭ ءاربىر وبلىسى مەن اۋداندارىندا ۇلتتىق سپورت مەكتەپتەرى بار. ولاردا جىل سايىن ۇلتتىق سپورت تۇرلەرى بويىنشا جاسوسپىرىمدەر، جاستار، ەرەسەكتەر اراسىندا ءتۇرلى جارىستار ءوتىپ تۇرادى», - دەدى مونعوليا ۇلتتىق سپورت قاۋىمداستىعىنىڭ پرەزيدەنتى روم اۋەسحان.

ايتا كەتەيىك، بۇگىن الماتى وبلىسىندا تۇڭعىش رەت تەڭگە ىلۋدەن ەرەسەكتەر اراسىندا ازيا چەمپيوناتى باستالدى. ەكى كۇنگە جالعاساتىن چەمپيوناتقا 10 ەلدىڭ سپورتشىلارى قاتىسىپ جاتىر. سارى قۇرلىق سايىسىندا قازاقستان، وزبەكستان، قىرعىزستان، ۆەنگريا، تاجىكستان، تۇركىمەنستان، موڭعوليا، قىتاي، اۋعانستان، رەسەي سپورتشىلارى باق سىنايدى.

ەسكە سالا كەتەيىك، رەسپۋبليكالىق تەڭگە ءىلۋ فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە بايگە، كوكپار، اۋدارىسپاق، ساداق اتۋ، جامبى اتۋ، قۇسبەگىلىك، اسىق اتۋ، «JORYQ» ات سپورتى جانە ت.ب. فەدەراتسيالار بار. قر ۇلتتىق سپورت قاۋىمداستىعىن بەلگىلى كاسىپكەر، مەتسەنات، «Altyn Qyran Foundation» قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.

Abai.kz