قازاقستان جانە رەسەي دەپۋتاتتارى پالاتاارالىق پارلامەنتتىك كوميسسيانىڭ وتىرىسىن وتكىزدى
![](https://abai.kz/content/uploads/2024/06/981c8444-7e9c-4b7f-9c8d-918372c9aaa6.jpeg)
استانادا ءماجىلىس توراعاسى ەرلان قوشانوۆتىڭ قاتىسۋىمەن قازاقستان رەسپۋبليكاسى پارلامەنتى ءماجىلىسى مەن رەسەي فەدەراتسياسى فەدەرالدىق جينالىسى مەملەكەتتىك دۋماسى اراسىنداعى ىنتىماقتاستىق جونىندەگى پالاتاارالىق پارلامەنتتىك كوميسسياسىنىڭ وتىرىسى ءوتتى.
وتىرىس الدىندا ءماجىلىس توراعاسى مەملەكەتتىك دۋما توراعاسىنىڭ ءبىرىنشى ورىنباسارى، رەسەي تاراپىنان كوميسسيانىڭ تەڭ توراعاسى الەكساندر جۋكوۆتى قابىلدادى. كەزدەسۋدە تاراپتار الداعى كۇن تارتىبىندەگى نەگىزگى اسپەكتىلەردى جانە ەكى ەل پارلامەنتتەرى اراسىنداعى ىنتىماقتاستىق اياسىن كەڭەيتۋ جايىن تالقىلادى.
پارلامەنتارالىق كوميسسيا جۇمىسىن قايتادان باستاۋ تۋرالى شەشىم ءماجىلىس توراعاسى ەرلان قوشانوۆتىڭ رەسەي فەدەراتسياسىنا رەسمي ساپارى بارىسىندا قابىلداندى. استانادا وتكەن وتىرىستى اشىپ بەرگەن پالاتا سپيكەرى رەسەي قازاقستاننىڭ سەنىمدى وداقتاسى جانە ستراتەگيالىق سەرىكتەسى ەكەنىن اتاپ ءوتتى.
![](https://abai.kz/content/uploads/2024/06/dd283680-7e91-41e9-af53-bb7faa373f9e-1024x682.jpeg)
سۋرەتتى تۇسىرگەن –ت.تانىباەۆ
– جىل وتكەن سايىن ءبىزدىڭ قارىم-قاتىناسىمىز تەك نىعايا تۇسۋدە. بۇعان كوشباسشىلارىمىز قاسىم-جومارت كەمەلۇلى توقاەۆ پەن ۆلاديمير ۆلاديميروۆيچ ءپۋتيننىڭ ارقاسىندا قول جەتكىزدىك. مەملەكەتتەر باسشىلارى ارىپتەستىكتى دامۋدىڭ جاڭا دەڭگەيىنە كوتەردى. قازاقستاندا حالىقتارىمىزدىڭ سانعاسىرلىق دوستىعى ەرەكشە باعالانادى، – دەدى ەرلان قوشانوۆ.
ءماجىلىس سپيكەرى قازاقستان مەن رەسەي اراسىنداعى تاتۋ كورشىلىك جىلدارىندا دوستىق پەن سەنىمدى نىعايتۋعا باعىتتالعان بەرىك شارتتىق بازا قالىپتاسقانىن اتاپ ءوتتى. سونداي-اق ەلدەرىمىزدى الەمدەگى ەڭ ۇزىن شەكارا بايلانىستىراتىنىن ايتىپ، بىلتىر ءوزارا ساۋدا كولەمى ايتارلىقتاي وسكەنىنە، تاۋار اينالىمىنىڭ شامامەن 70 پايىزى وڭىرارالىق جانە شەكارا ماڭى ساۋداسىنا تيەسىلى ەكەنىنە نازار اۋداردى. وعان ەكى ەلدەن مىڭداعان كومپانيا مەن ميلليونداعان ادام تارتىلعان.
– ەكىجاقتى قاتىناستى دامىتۋدا پارلامەنتارالىق ىنتىماقتاستىق ماڭىزدى ءرول اتقارادى. ءبىز ءتۇرلى الاڭداردا ءجيى كەزدەسەمىز، پىكىر الماسامىز. ءبىزدىڭ ءار باسقوسۋىمىز جاڭا يدەيالار مەن باستامالارعا تولى. كوپتەگەن وزەكتى ماسەلە بويىنشا ءاردايىم ورتاق شەشىمگە كەلەتىنىمىز قۋانتادى. بۇگىن ۇزاق ۋاقىتتان كەيىن كوميسسيامىزدىڭ جۇمىسىن قايتا جانداندىرعانىمىز دا – بىرلەسىپ جۇمىس ىستەۋگە ىنتالىلىعىمىزدىڭ ايعاعى، – دەدى ەرلان قوشانوۆ.
![](https://abai.kz/content/uploads/2024/06/a4205b7a-fd9c-4887-80aa-f133607fa577-1024x682.jpeg)
سۋرەتتى تۇسىرگەن –ت.تانىباەۆ
مەملەكەتتىك دۋما توراعاسىنىڭ ءبىرىنشى ورىنباسارى الەكساندر جۋكوۆ تا ءوز سوزىندە پارلامەنتارالىق ىنتىماقتاستىقتىڭ الەۋەتى زور ەكەنىن ايتتى.
– ەلدەرىمىزدىڭ كوشباسشىلارى پارلامەنتتەر الدىنا ساۋدا-ەكونوميكا، ينۆەستيتسيا سالاسىنداعى، عىلىمي-تەحنيكالىق، مادەني-گۋمانيتارلىق سالالارداعى ىنتىماقتاستىقتى دامىتۋ مىندەتىن قويدى. ءبىز پرەزيدەنتتەرىمىزدىڭ ۋاعدالاستىقتارىنىڭ ىسكە اسىرىلۋىن زاڭنامالىق تۇرعىدان قامتاماسىز ەتۋىمىز قاجەت. پارلامەنتتىك ولشەمدەگى ءوزارا ءىس-ارەكەتتىڭ تيىمدىلىگىن ارتتىرۋ، ازاماتتارىمىزدى تولعاندىراتىن ماسەلەلەردى شەشۋ دە وتە ماڭىزدى، – دەدى مەملەكەتتىك دۋما توراعاسىنىڭ ورىنباسارى.
![](https://abai.kz/content/uploads/2024/06/bb15c6ca-6bfc-4267-8f33-d86e5eb05ebf-1024x682.jpeg)
سۋرەتتى تۇسىرگەن –ت.تانىباەۆ
سونىمەن قاتار پاۆەل كازانتسەۆ پەن ۆيكتور سەليۆەرستوۆتىڭ باسشىلىعىمەن ەكى ەل اراسىنداعى پارلامەنتتىك دوستىق توپتارى جۇمىسىنىڭ بەلسەندىلىگى مەن تيىمدىلىگى اتالىپ ءوتتى. ءماجىلىس سپيكەرى ولاردىڭ ۇيلەسىمدى جۇمىسىنىڭ ناتيجەسى رەتىندە رەسەي مەن قازاقستان شەكاراسىنداعى قازاقستاندىق جۇك تاسىمالداۋشىلاردىڭ ماسەلەسى شەشىلگەنىن ايتتى. ەكىجاقتى ىقپالداستىقتىڭ بارلىق وزەكتى ماسەلەسى پالاتاارالىق پارلامەنتتىك كوميسسياسى وتىرىسىنىڭ كۇن تارتىبىنە ەندى.
– بۇگىنگى كوميسسيا وتىرىسىنىڭ ماقساتى – پارلامەنتارالىق بايلانىستى ارتتىرۋ مەن نىعايتۋ. قازاقستاننىڭ دەپۋتاتتىق كورپۋسىمەن جاقسى تانىسپىز، ۇنەمى كەزدەسىپ، بارلىق ماسەلە بويىنشا بەينەكونفەرەنتسيالار وتكىزىپ وتىرامىز. بۇگىنگى كۇن ءتارتىبى دە وتە ماڭىزدى. وسى جيىندا ايتىلعانداردىڭ ءبارى جاقىن ارادا ناقتى جۇزەگە اساتىنىنا سەنىمدىمىن، – دەدى مەملەكەتتىك دۋمانىڭ بيۋدجەت جانە سالىق كوميتەتىنىڭ مۇشەسى ۆيكتور سەليۆەرستوۆ.
وتىرىس بارىسىندا دەپۋتاتتار تسيفرلىق قۇقىق جانە حالىقتىڭ تسيفرلىق ساۋاتتىلىعىن ارتتىرۋ، كليماتتىق زاڭناما، ۆولونتەرلىك قىزمەتتى رەتتەۋ سالالارىنداعى زاڭ شىعارۋ ءىسى بويىنشا تاجىريبە الماستى. سونداي-اق ەنەرگەتيكا، كولىك-لوگيستيكا سالاسىنداعى ىنتىماقتاستىق ماسەلەلەرى، ونىڭ ىشىندە قازاقستان تاسىمالداۋشىلارىنىڭ رەسەي-بەلارۋس شەكاراسىنداعى وتكەلدەردەن وتۋىندەگى كەدەرگىلەردى الىپ تاستاۋ، قازاقستان مەن رەسەي قالالارى اراسىنداعى وڭىرارالىق قاتىناستاردى دامىتۋ جايى دا كوتەرىلدى.
![](https://abai.kz/content/uploads/2024/06/c02d7189-4323-4282-8810-61d30227b08f-1024x682.jpeg)
سۋرەتتى تۇسىرگەن –ت.تانىباەۆ
سونداي-اق كۇن تارتىبىنە قورشاعان ورتانى، ترانسشەكارالىق وزەندەردى ءتيىمدى پايدالانۋ سالاسىنداعى ىنتىماقتاستىق، ەكىجاقتى تاۋار اينالىمى كولەمىن ۇلعايتۋ مەن ءوزارا ساۋداداعى كەدەرگىلەردى جويۋ جانە باسقا دا ماسەلەلەر كىردى.
وتىرىس ءماجىلىستىڭ ۆيتسە-سپيكەرى البەرت راۋ مەن مەملەكەتتىك دۋما توراعاسىنىڭ ورىنباسارى الەكساندر جۋكوۆتىڭ توراعالىعىمەن ءوتتى. كوميسسيا جۇمىسىنا قازاقستان تاراپىنان ۆيتسە-مينيسترلەر مەن جاۋاپتى مەملەكەتتىك قۇرىلىمدار باسشىلارى قاتىستى. تالقىلاۋ قورىتىندىسى بويىنشا قاتىسۋشىلار كۇن تارتىبىندەگى ءار تارماق بويىنشا مەملەكەتتىك ورگاندارعا ۇسىنىمدار ازىرلەپ، شەشىمدەر شىعاردى.
سۋرەتتى تۇسىرگەن –ت.تانىباەۆ
Abai.kz