قازاقستان قاجىلىق ميسسياسى قاسيەتتى مەككە جەرىندە ۇلى ساپارعا كەلگەن وتانداستارىمىزدىڭ ءدىن امان ەكەنىن حابارلايدى.

ميسسياداعى دارىگەرلەر توبىنىڭ جەتەكشىسى ارداق ايتبايۇلىنىڭ ايتۋىنشا، مەديتسينالىق ورتالىق كومەگىنە 14-16 ماۋسىم كۇندەرى 703 قاجى جۇگىنگەن. ولاردىڭ قاتارىندا جۇرەك، قانتامىرلارى، جوعارى جانە تومەن تىنىس جانە اسقازان-ىشەك اۋرۋلارى، سونداي-اق باسقا دا (مازول جاراقاتى، اللەرگيا، كونيۋنكتيۆيت، ت.ب.) سىرقات بويىنشا 120 قاجى ەكى نەمەسە بىرنەشە رەت تەكسەرىلگەن.

«بۇدان بولەك، 15 ماۋسىمدا مۇزداليفادا قان قىسىمى كوتەرىلگەن قاجىعا جەدەل العاشقى كومەك كورسەتىلىپ، دارىگەردىڭ باقىلاۋىمەن قوناقۇيگە جونەلتىلدى. كەشە 16 ماۋسىمدا مينا جازىعىندا ترانزيتورلىق يشەميالىق ۇستاما بويىنشا ءبىر قاجىعا العاشقى مەديتسينالىق كومەك كورسەتىلىپ، ستاتسيونارعا جاتقىزىلدى.

سونىمەن قاتار، بۇگىن جاماراتتا شايتانعا تاس لاقتىرىپ كەلە  جاتقان جولدا قانتى تومەندەپ، ەسىنەن تانىپ جاتقان ايەل ادامعا تەز ارادا كومەك كورسەتىلىپ، ول دا ستاتسيونارعا جەتكىزىلدى. اللاعا شۇكىر، قازىرگى تاڭدا اتالعان ناۋقاستار دارىگەرلەردىڭ تولىق باقىلاۋىندا، جاعدايلارى بىرقالىپتى. ودان بولەك، ەلىمىزدەن اكەلىنگەن ءدارى-دارمەك قورى دا جەتكىلىكتى. ءبىز ءۇشىن ءاربىر قاجىنىڭ دەنساۋلىعى ماڭىزدى» دەيدى ارداق ايتبايۇلى.

ايتا كەتەيىك، بىرەر ساعات بۇرىن اقپارات قۇرالدارىندا مەككەدەگى اپتاپ ىستىقتان بىرنەشە ادامنىڭ قازا تاپقانى تۋرالى حابارلانعان ەدى. وسى ورايدا قازاقستان قاجىلارىنىڭ اراسىندا قايتىس بولعان ەشكىم جوق ەكەنىن تاعى دا مالىمدەيمىز.

سونداي-اق قازاقستان قاجىلىق ميسسياسىنىڭ قۇرامىندا 4 دارىگەر جانە 16 تۋروپەراتوردىڭ ارقايسىندا 1 دارىگەردەن، بارلىعى 20 بىلىكتى مەديتسينا مامانى ەم-شارا جۇمىستارىمەن اينالىسۋدا.

Abai.kz