ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا وڭتۇستىك كورەيا پرەزيدەنتىنىڭ قازاقستانعا ساپارى كەزىندە بارلىق قاجەتتى قۇجاتقا قول قويۋ كوزدەلگەنىن ايتتى، دەپ حابارلايدى Abai.kz.

ءماجىلىس كۋلۋارىندا جۋرناليستەر مينيستردەن قازاقستاننان بارعان ميگرانتتاردىڭ وڭتۇستىك كورەيادا قاشان جۇمىس ىستەي الاتىنىن سۇراعان.

– ءبىز وڭتۇستىك كورەيا پرەزيدەنتى كەلگەندە قول قويامىز دەپ جوسپارلادىق. بىراق، وكىنىشكە قاراي، كورەي تاراپى ۇلگەرمەدى. سوندىقتان قول قويۋ پروتسەسىن جەدەلدەتۋ ماقساتىندا ولاردىڭ جاۋاپكەرشىلىگى بولۋى ءۇشىن مەموراندۋمعا قول قويدىق. ۋاقىت بويىنشا ايتا المايمىن، بۇل باسقا مەملەكەت قابىلدايتىن شەشىم. مەنىڭ بىلۋىمشە، ول جاقتا ءبىر مەملەكەتتىك ورگاننىڭ ماقۇلداۋى عانا قالعان، - دەدى ول.

سونداي-اق، قازاقستان ازاماتتارى ول جاقتا قانداي ماماندىق بويىنشا جۇمىس ىستەي الاتىنى سۇرالدى.

– بۇل مەموراندۋمعا بايلانىستى بولادى، سوندىقتان وڭتۇستىك كورەيا تاراپى ميگرانتتار ورنالاسا الاتىن ماماندىقتارعا كۆوتا بەلگىلەيدى، - دەدى مينيستر.

اسقاربەك ەرتاەۆتىڭ ايتۋىنشا، قازاقستان ازاماتتارى زاڭدى تۇردە وڭتۇستىك كورەياعا بارىپ، ءۇش جىل جۇمىس ىستەي الادى.

Abai.kz