سۋ رەسۋرستارى جانە يرريگاتسيا مينيسترلىگى سولتۇستىك ارالدىڭ سۋى تاعى 1 ميلليارد تەكشە مەترگە كوبەيگەنىن حابارلادى. بۇگىندە سولتۇستىك ارالداعى سۋ كولەمى 21,4 ميلليارد تەكشە مەترگە جەتكەن.

"قازاقستان، قىرعىزستان، تاجىكستان، تۇرىكمەنستان جانە وزبەكستان كىرەتىن مەملەكەتارالىق سۋ شارۋاشىلىعى كوميسسياسىنىڭ 86-شى وتىرىسىندا تاراپتار سۋارۋ ماۋسىمىندا سولتۇستىك ارالعا اعىن سەكۋندىنا كەمىندە 30 تەكشە مەتر بولادى جانە 997 ميلليون تەكشە مەتر سۋ جىبەرىلەدى دەپ كەلىستى. قازىر تەڭىزگە سەكۋندىنا 50 تەكشە مەتر سۋ كەلەدى. ءبىر جىل بۇرىن اعىن سەكۋندىنا 6 تەكشە مەتر بولعان", – دەلىنگەن حابارلامادا.

سولتۇستىك ارالدى وڭتۇستىكتەن كوكارال بوگەتى ءبولىپ تۇر. وسى قۇرىلىس نىسانى سولتۇستىك ارالدا سۋ دەڭگەيىن كوتەرۋگە مۇمكىندىك بەردى.

"بوگەت پايدالانۋعا بەرىلگەننەن كەيىن سىرداريا وزەنىنەن سولتۇستىك ارال تەڭىزىنە 46,6 ميلليارد تەكشە مەتر سۋ كەلدى. ال كەيىنگى جەتى جىلدا تەڭىزگە 13,3 ميلليارد تەكشە مەتر سۋ قۇيىلدى. كەيىنگى جىلدارى سولتۇستىك ارالدىڭ سۋ كولەمى ازايدى. الايدا 2024 جىلدىڭ باسىنان باستاپ دەڭگەيى قايتا كوتەرىلە باستادى", – دەلىنگەن حابارلامادا.

Abai.kz