الماتىداعى المالى اۋدانىنىڭ سوتى قالاداعى مەترونى سالۋ كەزىندە 5 ملرد تەڭگە جىمقىردى دەپ ايىپتالعان ون ادامعا ۇكىم شىعاردى، دەپ جازادى ازاتتىق راديوسى. 

بۇل تۋرالى ءىستى تەرگەگەن ترانسپورت پروكۋراتۋراسى حابارلادى.

ايىپتاۋ اكتىسىندە "مەتروپوليتەن", "الماتىمەتروقۇرىلىس", "اۆتوماتتاندىرۋ جانە تەحنولوگيالار قىزمەتى" كومپانيالارىنىڭ باسشىلارى "سارىارقا" جانە "دوستىق" ستانتسيالارىنا بولىنگەن قارجىنى جىمقىرعانى جازىلعان.

سوت نەگىزگى ايىپتالۋشىلاردى 7-8 جىلعا سوتتاپ، مەملەكەتتىك جانە قارجى مەكەمەلەرىندە جۇمىس ىستەۋ قۇقىعىنان ايىرعان. ترانسپورت پروكۋراتۋراسىنىڭ حابارلاۋىنشا، ايىپتالۋشىلاردان قۇنى 1 ملرد تەڭگەدەن اساتان مۇلىك تاركىلەنىپ، مەملەكەت پايداسىنا بەرىلگەن.

رەسمي حابارلامادا ايىپتالۋشىلار 2018 جىلدىڭ ماۋسىمى مەن 2022 جىلدىڭ تامىزى ارالىعىندا قۇرالداردىڭ باعاسىن ون ەسەدەي اسىرا كورسەتىپ، وتىرىك فيرمالار ارقىلى ءىرى كولەمدە اقشا ۇرلاعانى ايتىلادى.

سوت ۇكىمى ءالى كۇشىنە ەنگەن جوق، تاراپتاردىڭ اپەللياتسيالىق شاعىم تۇسىرۋگە قۇقىعى بار. ترانسپورت پروكۋراتۋراسى سوتتالعانداردىڭ ەسىمىن جاريالامادى.

الماتى مەتروسىنىڭ "سارىارقا" جانە "دوستىق" بەكەتتەرىن سالۋ 2015 جىلى شىلدەدە باستالعان ەدى. كەيىن قۇرىلىس بىرنەشە رەت باياۋلاپ، ەكى ستانتسيا 2022 جىلى مامىردا پايدالانۋعا بەرىلگەن.

Abai.kz