الماتىلىقتار جىل بويى شەت تىلدەرىن تەگىن ۇيرەنە الادى.  الماتىدا اشىق اسپان استىندا قازاق جانە شەت تىلدەرىن وقىتۋ بويىنشا تەگىن كۋرس ۇيىمداستىرۋعا باعىتتالعان «تىلدەر ساياباعى» قالالىق الەۋمەتتىك جوباسى اشىلدى.

جوبا قالانىڭ جاستار ساياساتى باسقارماسىنىڭ، الماتى اكىمدىگىنىڭ جوبالىق كەڭسەسىنىڭ جانە قالا ەرىكتىلەرىنىڭ فرونت كەڭسەسىنىڭ قولداۋىمەن جۇزەگە اسىرىلىپ جاتىر.

«تىلدەر ساياباعى» لينگۆيستيكالىق جوباسى الماتى قالاسىنىڭ ءىرى ساياباقتارىندا اشىق اۋادا وقىتىلادى، مەگاپوليستىڭ بارلىق 8 اۋدانىن قامتيدى.

قازىر وندا قازاق، ورىس، اعىلشىن، تۇرىك، قىتاي جانە كورەي تىلدەرىنەن كۋرستار بار. ساباقتار اپتاسىنا 3 رەت وتكىزىلەدى، 6 جاستان 60 جاسقا دەيىنگى بارلىق نيەت ءبىلدىرۋشى قاتىسا الادى. جوبا اياقتالعان سوڭ قاتىسۋشىلارعا ءتىلدى مەڭگەرۋ دەڭگەيىن راستايتىن سەرتيفيكات بەرىلەدى.

الداعى ۋاقىتتا جوبانى ۇيىمداستىرۋشىلار باسقا دا شەت تىلدەرىن قوسۋدى جوسپارلاپ وتىر.

سۋرەت الماتى قالاسى اكىمدىگىنىڭ ءباسپاسوز قىزمەتىنەن الىندى

«تىلدەر ساياباعى» قىركۇيەكتىڭ سوڭىنا دەيىن ەكى اي بويى جۇمىس ىستەيدى. جوبانىڭ ەڭ بەلسەندى قاتىسۋشىلارى ءۇشىن كۇزگى-قىسقى ۋاقىتتا اۋداننىڭ كوميۋنيتي ورتالىقتارى بازاسىندا وقۋ جالعاسادى. وسىلايشا، جوبا قالا تۇرعىندارىن جىل بويى وقىتادى.

ايتا كەتەيىك، جىل سايىن الماتىدا جاستارعا ارنالعان 1000-نان استام تەگىن كۋرس، ەكولوگيالىق، مادەني جانە سپورتتىق ءىس-شارا وتكىزىلەدى. بۇل جوبالاردىڭ بارلىعى جاستاردى قالانىڭ قوعامدىق ومىرىنە تارتۋعا، جەكە دامۋىنا جانە بوس ۋاقىتىن ءتيىمدى وتكىزۋگە باعىتتالعان.

«تىلدەر ساياباعى» اياسىندا ساباقتار بارلىق اۋداندا ءبىر مەزگىلدە وتكىزىلەدى. كۋرستىڭ كەستەسىن مىنا سىلتەمە بويىنشا كورۋگە بولادى: https://www.instagram.com/p/C-C4eY7qieD/?igsh=NzI3aG4xNmVic3Iz

تولىق اقپارات: +7 747 821 6478, الماتى ەرىكتىلەرىنىڭ فرونت كەڭسەسى.

Abai.kz