قازاقستاندا الەمدەگى 147 ەلدىڭ كىتاپحاناشىلارىن بىرىكتىرەتىن كونگرەسس وتەدى. بۇل تۋرالى قر مادەنيەت جانە اقپارات مينيسترلىگىنىڭ ءباسپاسوز قىزمەتى حابارلادى. 

حالىقارالىق كىتاپحانا قاۋىمداستىقتارى مەن مەكەمەلەرى فەدەراتسياسى (IFLA) الەمدىك كىتاپحانالار جانە اقپارات كونگرەسىن (WLIC) وتكىزۋ ورنى رەتىندە قازاقستاننىڭ استانا قالاسىن تاڭداعانىن جاريالادى. كونگرەسى 2025 جىلى 18-22 تامىز ارالىعىندا وتەدى. ءىس-شاراعا 4000-عا جۋىق ادام قاتىسادى.

قازاقستاندا IFLA-نىڭ دۇنيەجۇزىلىك كونگرەسىن وتكىزۋ ەلىمىزدىڭ كىتاپحانا كادرلارىنىڭ كاسىبيلىگىن جەتىلدىرۋگە جانە كىتاپحانا مەن اقپارات قىزمەتتەرىنىڭ ساپاسىن ارتتىرۋعا باعىتتالعان.

بۇل IFLA-نىڭ ورتالىق ازياداعى حالىقارالىق كىتاپحانا سالاسىن دامىتۋداعى ءرولىن كۇشەيتەتىن العاشقى باستى ءىس-شارا بولماق. كونگرەسكە قاتىسۋشىلار ەلىمىزدىڭ باي تاريحىمەن جانە مادەني داستۇرلەرىمەن دە كەڭىرەك تانىسا الادى.

جىل سايىن ءداستۇرلى تۇردە وتەتىن حالىقارالىق شارادا الەمنىڭ تۇكپىر-تۇكپىرىنەن بىلىكتى كىتاپحاناشىلار باس قوسىپ، تاجىريبە الماسىپ، جاڭا اقپاراتتىق تەحنولوگيالار مەن كىتاپحاناشىلاردىڭ جەتىستىكتەرىن تالقىلاپ، ۇزاق مەرزىمدى ىنتىماقتاستىق ورناتادى.

ايتا كەتەيىك، IFLA – ءارتۇرلى ەلدەردەگى كىتاپحانا ءىسىنىڭ وزىق تاجىريبەسىن جيناقتايتىن، تالدايتىن جانە ءارتۇرلى كىتاپحانا تۇرلەرىمەن (كوپشىلىك، مەكتەپ، ۋنيۆەرسيتەت، ارنايى، ءارتۇرلى شەكتەۋلەرى بار ادامدارعا ارنالعان جانە ت.ب.) پايدالانۋشىلارعا قىزمەت كورسەتۋدى ۇيىمداستىرۋدىڭ حالىقارالىق ستاندارتتارىن بەلگىلەيتىن كىتاپحانا ماماندارىنىڭ جاھاندىق قوعامدىق ۇيىمى.

Abai.kz