سۋ رەسۋرستارى جانە يرريگاتسيا ءمينيسترى سولتۇستىك ارالدى قالپىنا كەلتىرۋ جوباسىنىڭ ەكىنشى كەزەڭىنە دايىندىق بويىنشا كەڭەس وتكىزدى. بۇل تۋرالى مينيسترلىك مالىمدەدى.  

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ الماتىدا سولتۇستىك ارال تەڭىزىن قالپىنا كەلتىرۋ جوباسىنىڭ ەكىنشى كەزەڭىنە دايىندىق بويىنشا كەڭەس وتكىزدى. حالىقارالىق ارالدى قۇتقارۋ قورىنىڭ قازاقستانداعى اتقارۋشى ديرەكتسياسىنىڭ كەڭسەسىندە وتكەن كەزدەسۋگە حاقق ساراپشىلارى مەن جوبانى ازىرلەۋشى ماماندار قاتىستى.

مينيستر جوبانىڭ تەحنيكالىق-ەكونوميكالىق نەگىزدەمەسىن ازىرلەۋ بارىسى جانە سولتۇستىك ارال تەڭىزىندەگى سۋ رەسۋرستارىن ۇلعايتۋ جانە تۇراقتاندىرۋ بويىنشا قابىلدانعان جۇمىستارمەن تانىستى.

جوبا ءۇش نەگىزگى باعىتتان تۇرادى.

ءبىرىنشى باعىت – تەڭىزدە جانە وعان جاقىن ايماقتا بالىق اۋلاۋ مەن سۋ ورتاسىنىڭ جاعدايىن جاقسارتۋدى، سونداي-اق سىرداريا وزەنىنىڭ اتىرابىنداعى سۋلى-باتپاقتى جەرلەردى تۇراقتاندىرۋدى كوزدەيدى. سۋ ينفراقۇرىلىمى جەتىلدىرىلىپ، سولتۇستىك ارال مەن سىرداريا اتىرابىنداعى گيدرولوگيالىق جاعدايى جاقسارادى.

ەكىنشى باعىت - قىزىلوردا وبلىسىندا بالىق شارۋاشىلىعىن، مال شارۋاشىلىعىن، ءتۋريزمدى جانە ورمان وتىرعىزۋدى دامىتۋ ارقىلى ورنىقتى ەكونوميكالىق، الەۋمەتتىك جانە ەكولوگيالىق قىزمەتتى قولداۋدى كوزدەيدى.

ءۇشىنشى باعىتتا ارال-سىرداريا باسسەينىندە سۋ رەسۋرستارىن باسقارۋ جۇيەسى جاقسارادى دەپ كۇتىلۋدە. كەزدەسۋ قورىتىندىسى بويىنشا مينيستر تەن-ءدى مەرزىمىنەن كەشىكتىرمەي ازىرلەۋ جونىندە بىرقاتار ۇسىنىس ايتتى، سونداي-اق ارال ايماعىندا جوباعا قاتىستى قوعامدىق تىڭداۋلار وتكىزۋدى تاپسىردى.

«ازىرلەنىپ جاتقان جوبا سىرداريا وزەنىنىڭ ارناسىن رەتتەۋ جانە سولتۇستىك ارالدى ساقتاۋ جونىندەگى اۋقىمدى جوبانىڭ جالعاسى بولىپ تابىلادى. ول 2002-2010 جىلدار ارالىعىندا ىسكە اسىرىلىپ، بۇكىل ارال وڭىرىنە وڭ اسەرىن تيگىزدى. ەكىنشى كەزەڭ سولتۇستىك ارالدى تۇراقتى سۋمەن قامتاماسىز ەتۋدەن باستاپ ەكونوميكالىق جانە الەۋمەتتىك جوبالاردى دامىتۋعا دەيىنگى ءتۇرلى باعىتتاردى قامتيدى»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

ەستەرىڭىزگە سالا كەتەيىك، 2024 جىلدىڭ باسىنان باستاپ سولتۇستىك ارال تەڭىزىنە 1,38 ملرد تەكشە مەتر سۋ كەلدى.

Abai.kz