قىزىلوردا وبلىسىندا اليمەنت تولەۋ جونىندەگى مىندەتتەمەسىن ەلەمەي، قۇمار ويىندارعا 250 ملن تەڭگە اقشا سالعان 154 بورىشكەر انىقتالدى، دەپ مالىمدەدى Abai.kz پورتالى kaz.inform.kz -كە سىلتەمە جاساپ.

قىزىلوردا وبلىسىندا اليمەنت بەرەشەگى 380 ملن تەڭگەگە دەيىن تومەندەدى. وسىلايشا ەلىمىزدەگى بەرەشەگى ەڭ از ايماقتىڭ الدىڭعى قاتارىنا ەنگىزىلدى.

«وبلىس پروكۋراتۋراسى قۇمار ويىندارعا 250 ملن تەڭگەدەن استام قاراجات جۇمساعان 154 بورىشكەردى انىقتادى. بورىشكەرلەر اليمەنت تولەۋ جونىندەگى مىندەتتەمەلەرىن ەلەمەي، نەمقۇرايلىلىق تانىتقان. بۋكمەكەرلىك كەڭسەلەردە قۇمار ويىندار ويناعان. ماسەلەن، اليمەنت بويىنشا 1 ميلليون تەڭگە قارىزى قالىپتاسقان تۇرعىن ءوزىنىڭ شوتىن 156 ميلليون تەڭگەدەن استام سوماعا تولىقتىرعان. پروكۋراتۋرا باستاماسىمەن اليمەنت تولەۋدەن جالتارىپ جۇرگەن 18 بورىشكەرگە قاتىستى قر قىلمىستىق كودەكستىڭ 139-بابىمەن قىلمىستىق ءىس تىركەلىپ، ونىڭ 12-ءى جاۋاپتىلىققا تارتىلدى. ال 9 بورىشكەر سوت ۇكىمىمەن باس بوستاندىعىن شەكتەۋ جازاسىنا سوتتالسا، 3 ءىس بويىنشا بويىنشا تەرگەۋ جالعاسۋدا»، - دەپ ءمالىم ەتتى وبلىس پروكۋراتۋرادان.

ۆەدومستۆو مالىمەتىنشە، قىزىلوردا وبلىسىنىڭ پروكۋراتۋراسى بيىلعى جىلدىڭ 6 ايىندا اليمەنت ءوندىرۋ باعىتىندا ادىلەت دەپارتامەنتىنە جانە جەكە سوت ورىنداۋشىلارىنىڭ وڭىرلىك پالاتاسىنا 12 زاڭدىلىقتىڭ بۇزىلۋىن جويۋ تۋرالى ۇسىنۋ ەنگىزدى. ناتيجەسىمەن 155 جالعىز باستى انانىڭ پايداسىنا 91 ملن تەڭگە اليمەنت بەرەشەگى ءوندىرىلدى.

Abai.kz