بۇگىن تاڭەرتەڭ جازعى وليمپيادا ويىندارىندا تاماشا ونەر كورسەتكەن
دزيۋدودان قازاقستان قۇراماسى پاريجدەن ورالدى.

كوماندا قۇرامىندا قازاقستاندىق دزيۋدوشى، 2021 جىلعى الەم چەمپيوناتىنىڭ كۇمىس جۇلدەگەرى، 2019 جانە 2022 جىلدارداعى ازيا چەمپيوناتتارىنىڭ قولا جۇلدەگەرى، وليمپيادانىڭ قولا جۇلدەگەرى عۇسمان قىرعىزباەۆ بار.

اعا لەيتەنانت عۇسمان قىرعىزباەۆ – قورعانىس مينيسترلىگى ورتالىق سپورت
كلۋبىنىڭ اسكەري قىزمەتشىسى.

– وتان الدىنداعى ەرەكشە ەڭبەگى، دەنە تاربيەسى مەن سپورتتى دامىتۋعا قوسقان زور ۇلەسى، جوعارى جەتىستىكتەرى جانە كاسىبيلىگى ءۇشىن عۇسمانعا جانە ونىڭ ەگىز سىڭارى، ورتالىق سپورت كلۋبى دزيۋدودان كوماندانىڭ بولىمشە باستىعى - اعا جاتتىقتىرۋشىسى عۇمار قىرعىزباەۆقا قازاقستان رەسپۋبليكاسى قورعانىس ءمينيسترىنىڭ بۇيرىعىمەن كەزەكتى «كاپيتان» اسكەري اتاعى مەرزىمىنەن بۇرىن بەرىلەدى، – دەپ اتاپ ءوتتى قورعانىس مينيسترلىگى سپورت كوميتەتىنىڭ توراعاسى، ورتالىق سپورت كلۋبىنىڭ باستىعى پولكوۆنيك ارمان ابەۋوۆ.

ونى اعايىندى ەگىزدەرگە وليمپيادا قورىتىندىسى بويىنشا سپورتشىلارعا قۇرمەت كورسەتۋ كەزىندە قورعانىس ءمينيسترى رۋسلان جاقسىلىقوۆ تاپسىراتىنىن ايتتى.

وليمپيادانىڭ بارلىق جەڭىمپازدارىمەن بىرگە عۇسمان  قىرعىزباەۆتى دا الماتى گارنيزونىنىڭ اسكەري قىزمەتشىلەرى جانە ارىپتەستەرى قارسى الدى.

ەستەرىڭىزگە سالا كەتەيىك، قازاقستاندىق دزيۋدوشى عۇسمان قىرعىزباەۆ سەربيادان كەلگەن سپورتشى ستراحينيا ءبۋنچيچتى جەڭىپ، ءۇشىنشى ورىن ءۇشىن كۇرەستە قولا مەدال جەڭىپ الدى.

Abai.kz