اتىراۋ وبلىسىندا «تازا قازاقستان» اكتسياسى اياسىندا ءىس-شارالار جالعاسۋدا.

5 تامىزدا اكتسيا اياسىندا ولكەنىڭ تابيعاتقا جاناشىر تۇرعىندارى سەنبىلىككە شىعىپ، جايىق جاعالاۋىنا سانيتارلىق تازالاۋ جۇمىستارىن جۇرگىزدى.

تابيعاتتى قورعاۋ اكتسياسىنىڭ ماقساتى – تۇرعىنداردى وتانسۇيگىشتىككە، ءوز قالاسى ءۇشىن جاۋاپكەرشىلىككە باۋلۋ، ەكولوگيالىق مادەنيەتىن قالىپتاستىرۋ.

تج رەجيمى كەزىندە جايىقتىڭ جاعالاۋىنا 5 ميلليونعا جۋىق قاپ توسەلدى. سۋ دەڭگەيى تومەندەگەسىن وزەن جاعاسىن سانيتارلىق تازالاۋ قاجەتتىلىگى تۋىندادى.

سەنبىلىك اياسىندا جاستار مەن قوعامدىق بەلسەندىلەر جاعالاۋدان 160 توننا توپىراق سالىنعان قاپتاردى شىعاردى.

«جاسىل ەل» جاستار قوزعالىسىنىڭ ۇيىمداستىرۋشىسى زامانبەك قۇراقبايدىڭ ايتۋىنشا، تازالىق جۇمىستارى جالعاسادى.

- تابيعي سيپاتتاعى توتەنشە جاعداي كەزىندە «جاسىل ەل» جاستار قوزعالىسىنىڭ اياسىندا 1000 جاس جۇمىسپەن قامتىلدى. ءار ادام ەكولوگيالىق مادەنيەتتى ساقتاۋدى وزىنەن باستاۋ كەرەك. سانيتارلىق تازالىققا جۇمىلىپ جاتقان تۇرعىننىڭ قاراسى كوپ، - دەدى ز.قۇراقباي.

ەكولوگيالىق اكتسياعا قاتىسۋشىلار بىرنەشە ۋچاسكەگە ءبولىنىپ، ءار ۋچاسكەگە جاۋاپتى ۇيلەستىرۋشى بەلگىلەندى.

ءتۇرلى ويىن مەن كۆەستتەر ۇيىمداستىرىلىپ، سەنبىلىك مەرەكەلىك سيپات الدى.

ايتا كەتۋ كەرەك، اكتسيا باستالعالى وبلىستا 200 گەكتار اۋماق تازالانىپ، 723 مىڭ توننادان استام قوقىس شىعارىلدى. ۇيىمداستىرۋشىلار تۇرعىنداردى تازالىققا جۇمىستارىنا تارتۋ باعىتىندا بىرنەشە جوبا جوسپارلاپ وتىر.

Abai.kz