500 مىڭنان استام بالا ءۇشىن 22 ملرد تەڭگەدەن استام بيۋدجەت قاراجاتى كوزدەلگەن — ولجاس بەكتەنوۆ.

ۇكىمەت وتىرىسىندا مەكتەپتەردىڭ جاڭا وقۋ جىلىنا دايىندىق ماسەلەسى قارالدى. پرەمەر-مينيستر ولجاس بەكتەنوۆ 1-ءشى سىنىپقا بالالار قابىلداۋدى ۇيىمداستىرۋ مەن جاڭا وقۋ جىلى قارساڭىندا مەملەكەتتىك قولداۋعا مۇقتاج بالالارعا الەۋمەتتىك كومەك كورسەتۋگە باسا نازار اۋداردى.

جاڭا وقۋ جىلىندا 360 مىڭ وقۋشى العاش رەت مەكتەپ تابالدىرىعىن اتتاعالى تۇر.

«قازىر بۇل پروتسەس بەلسەندى ءجۇرىپ جاتىر. ونى دۇرىس ۇيىمداستىرۋ كەرەك. بالاباقشاعا بارماعان بولاشاق ءبىرىنشى سىنىپ وقۋشىلارىنا كوبىرەك كوڭىل بولگەن ءجون. سوندىقتان بالاباقشالار جانىنداعى كونسۋلتاتسيالىق پۋنكتتەردىڭ قىزمەتىن جانداندىرۋ قاجەت. بالالاردىڭ مەكتەپكە دايىندالۋىنا بارىنشا كومەكتەسۋ كەرەك. ادەتتەگىدەي، جاڭا وقۋ جىلى قارساڭىندا مەملەكەتتىك قولداۋعا مۇقتاج بالالارعا ماتەريالدىق جانە الەۋمەتتىك كومەك كورسەتىلۋگە ءتيىس. بيىل 500 مىڭنان استام بالا ءۇشىن 22 ملرد تەڭگەدەن استام بيۋدجەت قاراجاتى كوزدەلگەن. اكىمدىكتەر مەكتەپ فورماسى مەن كەرەك-جاراقتاردى ساتىپ الۋ ءۇشىن قاراجاتتىڭ اتا-انالارعا ۋاقتىلى جىبەرىلۋىن قامتاماسىز ەتسىن»، — دەپ اتاپ ءوتتى ولجاس بەكتەنوۆ.

1 قىركۇيەكتەن باستاپ 1,7 ملن-نان استام وقۋشىنى تەگىن تاماقتاندىرۋ جوسپارلانۋدا. جەكەلەگەن مەكتەپتەردە اسحانانىڭ بولماۋى ماسەلەلەرى بار اتىراۋ، تۇركىستان، جامبىل وبلىستارىنىڭ اكىمدىكتەرىنە تاماقتانۋ ساپاسىن جانە سانيتاريالىق-ەپيدەميولوگيالىق قاۋىپسىزدىكتىڭ قامتاماسىز ەتىلۋىن ەرەكشە باقىلاۋعا الۋ تاپسىرىلدى.

Abai.kz