“قۇداي بۇيىرتسا، اللا ءناسىپ ەتسە، ءتاڭىر جازسا” بۇل كەز-كەلگەن يماندى ادامنىڭ اۋزىنان شىعاتىن جاقسى ءسوز. تەك مۇسىلماندار ەمەس، قۇدايعا يمانى بار كەز-كەلگەن ادام وسىلاي ايتادى. فۋتبولدا ءدىنى ءارتۇرلى ويىنشىلار دا الاڭعا شىعاردا، پەنالتي تەپكەندە ءوز سەنىمىندەگى قۇدايلارىنا سيىنىپ جاتقانىن بايقايمىز. بۇل ولاردىڭ جەكە سەنىم ماسەلەسى.

باپ پەن باق دەگەن ۇعىم بار. وليمپياداعا كەلگەن ءاربىر سپورتشى ۇلكەن جۇلدەنى ماقسات ەتىپ كەلەدى. شەتىنەن حالىقارالىق دودالاردا توپ جارىپ شىققان سايدىڭ تاسىنداي ابدەن ىرىكتەلگەن سپورتشىلار. وسال ادام ول جاققا جەتپەيدى. ءار قايسىسى قولىنان كەلگەنشە دايىندالادى. ۇلكەن سايىستا سولاردىڭ بىرىنە باپ جەتپەسە، ەندى بىرىنە باق، ياعني ساتتىلىك جەتپەي قالادى. كەيدە مىقتى دەگەن سپورتشىنىڭ ءوزى ءبىلىپ تۇرعانىن، جاساپ جۇرگەنىن ورىنداي الماي جاڭىلىسىپ جاتادى. سپورتشىلار قۇداي قالاسا، دەگەندە وسى باقتى، ساتتىلىكتى سۇرايدى.

جەڭىلىپ قالعان سپورتشىنىڭ “قۇدايدىڭ قالاۋى سولاي بولدى” دەگەندەگىسى “ساتتىلىك جەتپەي قالدى” دەگەنى بولسا كەرەك. جالپى سپورشىلاردىڭ مۇنداي سوزدەرىنە قاتتى نازار اۋدارماي، تۇسىنىستىكپەن قاراۋىمىز كەرەك شىعار.

ال ەندى بابى جەتپەي جاتقان جاعىن ءار سپورتشى، ءار جاتتىقتىرۋشى، سول سالاعا جاۋاپتى ءار باسشى ويلانۋى، قاتەنى تۇزەتۋدىڭ جولدارىن قاراستىرۋى پارىز. قاتەنى تۇزەتۋمەن اينالىسپاي ءبارىن قۇدايعا ىسىرىپ قويۋ دا ماسەلەنىڭ ەكىنشى ءبىر قاتە جاعى. بۇعان اباي بولۋ كەرەك.

سوسىن جۇلدە العان سپورتشىنىڭ جەتىستىگىن سول ساتتەگى ءوزىنىڭ ەرەكشە سەزىنگەن قۇدايدىڭ كومەگىمەن بايلانىستىرۋى دا جاتىرقاي قارايتىن جات دۇنيە ەمەس. ءاربىر ادامنىڭ ومىرىندە قۇدايدىڭ كومەگىن ەرەكشە سەزىنگەن ساتتەرى بار دەپ ويلايمىن. تالعات بەلگەندينوۆ اتامىز دا ءبىر سوزىندە ارنايى دۇعا وقىپ، وتە قيىن ساتتەردە نەشە مارتە ۇشاعىنا وق تيمەي امان-ەسەن ورالعاندىعىن ايتقان. بۇل ولاردىڭ باستان كەشىپ، سەزىنگەن جاعدايى. ونى بىزگە قاراعاندا وزدەرى جاقسىراق بىلەدى.

سوسىن مەيلى سپورتشى بولسىن، باسقاسى بولسىن كەز-كەلگەن ادام ويىن جەتكىزگەندە سول ساتتەگى ەموتسيانىڭ اسەرىمەن كەي سوزدەردى ءساتسىز قولدانۋى ابدەن مۇمكىن عوي. ىشكى نيەتى مەن ۇستانىمىن بىلمەي جاتىپ، ءبىر سوزىنە بولا “اناۋ ەكەن، مىناۋ ەكەن” دەپ تون ءپىشىپ، ۇكىم بەرگەن اسىعىستىق ءارى ادىلەتسىزدىك دەپ ويلايمىن.

حالىقارالىق ارەنادا ەل نامىسىن قورعاپ جۇرگەن ازاماتتاردىڭ كەيبىر سوزدەرىنە تۇسىنىكپەن قاراعانىمىز ءجون بولار.

قايرات جولدىبايۇلىنىڭ جەلىدەگى جازباسى

Abai.kz