جاپونيا قازاقستان ەكونوميكاسىن 200 ملن دوللار ينۆەستيتسيا قۇيادى. بۇل تۋرالى ولجاس بەكتەنوۆ پەن جاپوندىق JBIC بانكىنىڭ توراعاسى حاياششي نوبۋميتسۋمەن كەزدەسۋ بارىسىندا ايتىلدى، دەپ حابارلايدى Halyq Uni.

رەسمي مالىمەتكە سۇينەسەك، جاپونيا – قازاقستاننىڭ شىعىس ازياداعى نەگىزگى سەرىكتەستەرىنىڭ ءبىرى ءارى بۇگىندە ۇزدىك 10 ءىرى ينۆەستورلار قاتارىنا كىرەدى. قازاقستان مەن جاپونيا اراسىنداعى تاۋار اينالىمى وتكەن جىلى 10,5%-عا ءوسىپ، 2,1 ملرد دوللارعا جەتتى. بيىلعى قاڭتار-مامىردا ءوزارا ساۋدا كورسەتكىشى 768 ملن دوللار بولدى. 1993 جىلدان بەرى جاپونيانىڭ قازاقستان ەكونوميكاسىنا كاپيتال سالىمدارىنىڭ جيناقتالعان كولەمى شامامەن 8 ملرد دوللارعا جەتتى.

– JBIC جاپونيا حالىقارالىق ىنتىماقتاستىق بانكى قازاقستاندا ەنەرگيامەن جانە سۋمەن جابدىقتاۋ، تاۋ-كەن ونەركاسىبى، سونداي-اق كولىك-لوگيستيكا سالالارىندا قۇنى 2,3 ملرد دوللار بولاتىن 26 جوبانى قارجىلاندىردى. قازاقستاننىڭ دامۋ بانكىمەن بىرلەسىپ، ەنەرگەتيكا، كولىك سالاسى، ماشينا جاساۋ، ازىق-تۇلىك ونەركاسىبى جانە باسقا دا باسىم سالالارداعى بىرلەسكەن جوبالاردى 200 ملن دوللارعا قارجىلاندىرۋ نيەتى بويىنشا كەلىسىمگە قول قويۋ جوسپارلانىپ وتىر، – دەلىنگەن ۇكىمەت حابارلاماسىندا.

پرەمەر-مينيستر قازاقستان ۇكىمەتى ىنتىماقتاستىق كوكجيەگىن كەڭەيتۋ نيەتىنىن قۇپتايتىنىن ايتتى.

– جاپونيانىڭ وڭتۇستىگىندە ورىن العان جەر سىلكىنىسىنە بايلانىستى حاباردى وكىنىشپەن قابىلدادىم. ەڭ باستىسى، ادامدار امان بولىپ، تابيعي اپات اۋقىمدى شىعىندارعا الىپ كەلمەيدى دەپ ۇمىتتەنەمىن. جاپونيا – ءبىزدىڭ نەگىزگى ساۋدا-ەكونوميكالىق ءارى ينۆەستيتسيالىق سەرىكتەسىمىز. بۇگىندە قازاق-جاپون قاتىناسى كەڭەيتىلگەن ستراتەگيالىق ارىپتەستىك رۋحىندا دامىپ كەلەدى.»، – دەپ اتاپ ءوتتى ولجاس بەكتەنوۆ.

ءوز كەزەگىندە JBIC توراعاسى حاياششي نوبۋميتسۋ ESG (Environment, Sustainability, Governance) شەڭبەرىندە «جاسىل» قارجى جانە ترانزيتتىك قارجىلاندىرۋ سالاسىنداعى بىرلەسكەن ينۆەستيتسيالىق جوبالاردى ىسكە اسىرۋعا مۇددەلى ەكەنىن اتاپ ءوتتى.

كەزدەسۋ قورىتىندىسى بويىنشا تاراپتار بارلىق پەرسپەكتيۆالى باعىتتار بويىنشا ىنتىماقتاستىقتى نىعايتۋعا جانە كەڭەيتۋگە نيەت ءبىلدىردى.

Abai.kz