ءماجىلىس توراعاسى ەرلان قوشانوۆ مەملەكەت باسشىسىنىڭ تاپسىرماسىمەن قانىش ساتباەۆتىڭ 125 جىلدىق مەرەيتويىنا ارنالعان سالتاناتتى ءىس-شاراعا قاتىستى. عۇلاما عالىم، اكادەميكتىڭ مەرەيتويى تۋعان جەرى باياناۋىل اۋدانىندا كەڭ اۋقىمدا اتاپ وتىلۋدە.

ءماجىلىس سپيكەرى سالتاناتتى جيىندا پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىپ بەردى.

قانىش ساتباەۆ – قازىرگى زامانعى قازاق عىلىمىنىڭ اتاسى. ول ۇلتتىق عىلىم اكادەمياسىنىڭ نەگىزىن قالادى، بىلىكتى عالىمداردىڭ تۇتاس بۋىنىن تاربيەلەپ شىعاردى، جاڭا زەرتتەۋ جۇيەسىن قالىپتاستىردى. سوندىقتان عىلىم قىزمەتكەرلەرى كۇنى ونىڭ تۋعان كۇنىنە ورايلاستىرىلعان. حالقىمىزدىڭ ءبىرتۋار پەرزەنتى كوپتەگەن كەن ورنىن اشىپ، ءوندىرىستىڭ دامۋىنا ولشەۋسىز ۇلەس قوستى. ەلىمىز ءالى كۇنگە دەيىن ونىڭ ەڭبەكتەرىنىڭ يگىلىكتەرىن كورىپ وتىر. ساتباەۆ مۇراسى ۇلتىمىزدىڭ تەڭدەسسىز قازىناسى سانالادى. ونىڭ ەڭبەگىن جان-جاقتى دارىپتەۋ – ورتاق پارىز. بولاشاقتا ساتباەۆ سالعان سارا جول جالعاسىپ، قازاق عىلىمى قارقىندى دامي بەرەدى دەپ سەنەمىن, – دەلىنگەن مەملەكەت باسشىسىنىڭ قۇتتىقتاۋىندا.

سونىمەن قاتار ەرلان قوشانوۆ بيىل قاسيەتتى ەرتىس-بايان ءوڭىرى مەرەكەگە تولى ەكەنىن اتاپ ءوتتى.

– قانىش ساتباەۆتان بولەك، قازاقتىڭ كورنەكتى جازۋشىسى، الاش قايراتكەرى جۇسىپبەك ايماۋىتوۆتىڭ تۋعانىنا 135 جىل تولىپ وتىر. سونداي-اق قازاق ارحەولوگياسىنىڭ اتاسى، كورنەكتى قايراتكەر Əلكەي مارعۇلاننىڭ تۋعانىنا 120 جىل. قازاق كينوسىنىڭ ساڭلاعى شاكەن ايمانوۆتىڭ 110 جىلدىعى. ال، بۇگىنگى ساتباەۆ تويى – ەلدىكتىڭ تويى، بىرلىكتىڭ تويى. ءىلىم مەن عىلىمنىڭ مەرەكەسى, – دەدى ءماجىلىس توراعاسى.

مەرەيتوي اياسىندا باياناۋىل اۋدانى مويىلدى شاتقالىندا ق.ي.ساتباەۆ ەتنواۋىلى بوي كوتەرىپ، رەسپۋبليكالىق اقىندار ايتىسى، ۇلتتىق سپورت تۇرلەرى – كوكپار، بايگە مەن قازاق كۇرەسىنەن جارىس ءوتتى. وڭىردە «اكادەميك ق.ي.ساتباەۆ فەنومەنى: كەشە مەن بۇگىن» اتتى رەسپۋبليكالىق عىلىمي-پراكتيكالىق كونفەرەنتسيا ۇيىمداستىرىلىپ، ەستەلىك كىتاپتىڭ تۇساۋكەسەرى بولدى.

ءماجىلىستىڭ ءباسپاسوز قىزمەتى (سۋرەتتى تۇسىرگەن ج.جۇمابەكوۆ)