بۇگىن قازاقستاندا اەس سالۋ ماسەلەسى بويىنشا استانادا وتكەن جاريا تالقىلاۋعا قاتىسقان ءماجىلىس دەپۋتاتى نيكيتا شاتالوۆ كومىر ەلەكتر ستانتسيالارىنا، اتاپ ايتقاندا قاراعاندى وبلىسىنا جاساعان ساپارى تۋرالى ايتتى.
ونىڭ سوزىنشە، قالا توپار گرەس-ىنەن شىعارىلعان كۇلگە تولى. كومىردىڭ كۇلى 60 جىلدان بەرى جينالعان، ناتيجەسىندە «كۇل دالالارى» قالىپتاسقان. بۇل رەتتە ءماجىلىس دەپۋتاتى ءبىر مىسال كەلتىردى: اقش-تاعى اتوم ەنەرگەتيكاسى وسىنداي كەزەڭدە سۋپەرماركەت كولەمىندەي عانا اتوم قالدىقتارىن شىعارعان.
«مەنىڭشە، راديواكتيۆتى قالدىقتار تۋرالى ايتقان كەزدە نەنى تاڭدايتىنىمىز بەلگىلى. بۇل كۇلدىڭ دە «فونى» بار، جەل سوققان كەزدە ول توپار قالاسىنا دا اسەرىن تيگىزەدى. پاتەرلەرگە كىرىپ، وكپەگە تۇسەدى. بۇل ونكولوگيالىق اۋرۋلار تۋدىرادى، ەلىمىز مۇنداي جاعدايعا بۇرىن دا تاپ بولعان»، - دەدى سپيكەر.
سونداي-اق نيكيتا شاتالوۆ ەلىمىزدىڭ ەكونوميكانى دەكاربونيزاتسيالاۋ باعىتىنا سايكەس بولاشاقتا كومىر مەن باسقا دا لاستاۋشى گەنەراتسيانى پايدالانا وتىرىپ وندىرىلگەن ءاربىر ءونىم ءۇشىن تىكەلەي اقشالاي سانكتسيالار ەنگىزىلەتىنىن ەسكە سالدى.
«كومىر شىعاراتىن ءوڭىر قاراعاندى وبلىسىنىڭ تۋماسى رەتىندە ايتارىم، مەن كومىرمەن دەم العانىمىزدى قالامايمىن. امەريكالىق اتوم ونەركاسىبى 60 جىل ىشىندە شىعارعان سۋپەرماركەت كولەمىندەي عانا قالدىقتى ءبىزدىڭ تۇرعىن ۇيلەرىمىزدەگى پەش 5-7 جىل ىشىندە شىعارادى»، - دەپ اتاپ ءوتتى نيكيتا شاتالوۆ.

Abai.kz