پرەزيدەنت اكىمشىلىگىنىڭ مەملەكەتتىك قىزمەتشىلەردىڭ كوممۋنيكاتيۆتىك داعدىلارىن جەتىلدىرۋ بويىنشا بەرگەن تاپسىرماسىن ورىنداۋ اياسىندا مەملەكەتتىك قىزمەت ىستەرى اگەنتتىگىنىڭ قولداۋىمەن پرەزيدەنت جانىنداعى مەملەكەت باسقارۋ اكادەمياسىنىڭ بازاسىندا قۇرىلعان مەدياستۋديانىڭ اشىلۋ شاراسى ءوتتى.

ءىس-شاراعا قازاقستان رەسپۋبليكاسى پرەزيدەنتىنىڭ ىشكى ساياسات ماسەلەلەر جانە كوممۋنيكاتسيالار جونىندەگى كومەكشىسى رۋسلان جەلدىباي مەن مقىا توراعاسى دارحان جازىقباي قاتىستى.

اشىلۋ بارىسىندا رۋسلان جەلدىباي مەملەكەت پەن قوعام اراسىنداعى سەنىمدى نىعايتۋدا مەملەكەتتىك قىزمەتشىلەردىڭ جۇرتشىلىقپەن ءتيىمدى كوممۋنيكاتسيا ورناتا الۋ داعدىلارىن ۇنەمى دامىتىپ وتىرۋدىڭ ماڭىزدىلىعىن اتاپ ءوتتى.

زاماناۋي مەدياستۋديا مەملەكەتتىك قىزمەتشىلەردى وقىتۋ ادىستەرىن جەتىلدىرۋگە اسىرەسە، جاڭا تەحنولوگيالاردى قولدانۋ ارقىلى ولاردىڭ  پىكىرتالاس، سۇحبات فورماتىندا ءسوز سويلەۋ بويىنشا تاجىريبەسىن شىڭداۋعا، ولاردى ءىس جۇزىندە ءتيىمدى قولدانا ءبىلۋ قابىلەتىن ارتتىرۋعا ىقپال ەتەدى دەپ كۇتىلۋدە.

جاڭا فورماتتاعى وقىتۋ پروتسەسىن ىسكە اسىرۋ ءۇشىن ستۋديادا Jalinga اۆتوماتتاندىرىلعان ۆيدەو جانە گرافيكالىق بەينەلەردى جازۋ قۇرىلعىسى ورناتىلعان، سونداي-اق YouTube, Zoom ارقىلى ونلاين-كونفەرەنتسيالارعا قوسىلۋ، كاسىبي پودكاست جازۋ الاڭى قاراستىرىلعان.

شارا اياسىندا مەملەكەتتىك قىزمەتشىلەردىڭ بىلىكتىلىگىن ارتتىرۋ جانە ولاردى قايتا دايارلاۋعا ارنالعان تسيفرلىق كوۆوركينگ زالىنىڭ جۇمىسى دا تانىستىرىلدى.

Abai.kz