استىقتى وڭدەيتىن كاسىپورىن سانىن ارتتىرۋ ماڭىزدى!
كورشى ەلدەر قازاقستاندىق استىقتى قايتا وڭدەپ، ونى حالىقارالىق نارىققا جەتكىزىپ جاتىر. بۇل ءىستى وتاندىق اۋىل شارۋاشىلىعى تاۋارىن وندىرۋشىلەر دە ىسكە اسىرا الادى.
وسى ورايدا سەناتور ارمان وتەعۇلوۆ ءوزىنىڭ دەپۋتاتتىق ساۋالىندا استىق وڭدەۋشىلەردىڭ پروبلەمالارى تۋرالى ايتتى، دەپ حابارلايدى Abai.kz inform.kz-كە سىلتەمە جاساپ.
«ۇن ەكسپورتى بويىنشا وزبەكستان كوشباسشىعا اينالىپ، جىل سايىن 1 ملن تونناعا دەيىن قازاقستاندىق بيدايدى وڭدەپ، اۋعانستان نارىعىنا ۇسىنىپ كەلەدى. بيىل وزبەكستانعا 1,3 ملن توننا استىق جونەلتىلگەن. قازىرگى كەزدە ەلدەگى 250-گە جۋىق استىقتى وڭدەيتىن كاسىپورىننىڭ تەك 70 عانا تۇراقتى جۇمىس ىستەپ تۇر. تاۋەلسىزدىك العان جىلدارى بۇل كاسىپورىنداردىڭ سانى شامامەن 2 مىڭ بولعان، ياعني 1750 استىق وڭدەيتىن كاسىپورىن جابىلىپ 70 مىڭداي ادام جۇمىس ورنىنان ايىرىلدى. اقساپ تۇرعان بۇل سالا مەملەكەتتىڭ مۇددەسىنە جانە ديحانشىلاردىڭ ەكونوميكالىق جاعدايىنا كەرى اسەرىن تيىگىزىپ جاتىر»، - دەدى ارمان وتەعۇلوۆ ۇكىمەت باسشىسىنىڭ اتىنا جولداعان ساۋالىندا.
بۇدان بولەك سەناتور قازاقستاننىڭ يمپورتتىق تۇقىم تۇرلەرىنە دەگەن تاۋەلدىلىگىن ايتتى. قازاقستاندا ەليتالىق تۇقىمداردىڭ ۇلەسى – 7,1%. سونداي-اق، ەلىمىزدە بيداي تۇقىمىنىڭ 40% شەتتەن كەلەدى. بۇگىندە اۋىل شارۋاشىلىعى مينيسترلىگىنە قاراستى 12 عىلىمي-زەرتتەۋ ينستيتۋتى جانە ەليتالىق 17 تۇقىم ءوندىرۋشى شارۋاشىلىق قىزمەت ەتىپ كەلەدى. الايدا وسى ينيستيتۋتتار زەرتتەۋلەرىنىڭ وڭ ناتيجەسى بايقالار ەمەس. يمپورتتىق تۇقىمعا دەگەن سۇرانىستىڭ ازايعانى نەمەسە ەلدەگى وندىرۋشىلەر ءونىمىنىڭ مولايعانى تۋرالى دەرەك جوق.
«ەلدىڭ ازىق-تۇلىك قاۋىپسىزدىگىن جانە اۋىل شارۋاشىلىعى تاۋارلارىن وندىرۋشىلەرىنىڭ كورشى ەلدەرمەن باسەكە قابىلەتتى بولۋىن قامتاماسىز ەتۋ باعىتىندا ناقتى جوبالاردى ىسكە اسىرۋدى ۇسىنىپ وتىرمىز. شەتەلدىك تۇقىمعا دەگەن تاۋەلدىلىكتى جويۋ ماقساتىندا ارنايى باعدارلاما ازىرلەۋ كەرەك. استىقتى تەرەڭ وڭدەيتىن كاسىپورىنداردىڭ سانىن ارتتىرۋدى، مەملەكەت جاعىنان قوسىمشا قارجىلاندىرۋ ماسەلەسىن قاراۋدى ۇسىنامىز. كاسىپورىنداردىڭ ونىمدەرىن ەكسپورتتاۋعا كەرەك تەتىكتەردى وڭتايلاندىرۋدى جانە قاجەت بولعان جاعدايدا ەكسپورتتىق شىعىنداردىڭ ءبىر بولىگىن مەملەكەت تاراپىنان قارجىلاندىرۋ تۋرالى ناقتى شارالار قابىلداۋ كەرەك»، - دەدى سەناتور.
Abai.kz
