رەفەرەندۋم - ەلىمىزدەگى ەڭ وزەكتى دەگەن ماسەلەلەردى بۇكىل حالىق بولىپ شەشۋ. بيىلعى جىلدىڭ جازدىق كانيكۋلدان كەيىنگى ساياسي ماۋسىمى رەسمي اشىلعان كۇننەن باستاپ، جۇرت تالقىسىنداعى باستى تاقىرىپ – اەس ەكەنى ايتپاسا دا تۇسىنىكتى.

ەلىشىلىك ساياسي پروتسەسستەرگە كەلگەندە، اسىرەسە سايلاۋ، رەفەرەندۋم سەكىلدى جالپىحالىقتىق اۋقىمداعى پروتسەسستەردە نەيترالدى قالۋعا بولمايدى.
قىركۇيەك ايىنىڭ العاشقى كۇندەرى پرەزيدەنت جالپىحالىقتىق رەفەرەندۋمعا ستارت بەردى. 6 قازاندا قازاقستاننىڭ ساياسي ومىرىندەگى كەزەكتى رەفەرەندۋم وتەدى. بۇل مەملەكەتىمىزدىڭ بولاشاعى ءۇشىن جاسالعان ماڭىزدى قادام. پرەزيدەنت قاسىم-جومارت كەمەلۇلى جاريالاعان رەفەرەندۋمدا ءاربىر قازاقستاندىقتىڭ، ەلىم دەيتىن ءاربىر ازاماتتىڭ تاڭداۋى ء–بىرتۇتاس ەلدىڭ تاڭداۋىنا اينالماق!

وسىنداي ماڭىزدى شەشىم قابىلداۋدا رەفەرەندۋمنىڭ ءرولى قانداي؟ اەس قۇرىلىسى – جەكە ادامنىڭ پارمەن-پىكىرىمەن، «ايتتىم – ءبىتتى، كەستىم – ءۇزىلدى» دەگەنىمەن شەشىلمەۋى ءتيىس!

ءبىرازدان بەرى بۇكىل ەل اۋماعىندا قىزۋ تالقى بولدى. ماماندار ءتۇسىندىرۋ جۇمىسىن جاسادى، بەلسەندىلەر ءوز پىكىرلەرىن ورتاعا سالدى. بىرەۋ ءبىلىپ ايتتى، ەندى بىرەۋ دۇرمەككە ەرىپ ايتتى. ەندى بىرەۋلەر قاساقانا ءبۇلدىرىپ ايتتى. مۇددەلى توپتاردىڭ سويىلىن سوققاندار دا بولدى. الدا 6 قازاندا جالپى ۇلتتىق رەفەرەندۋمدا بۇل ءىستىڭ نۇكتەسى قويىلاتىن بولدى.

رەفەرەندۋم- ەڭ الدىمەن حالىقتىڭ پىكىرىمەن ساناسۋ، ويى مەن شەشىمىنە قۇرمەتپەن قاراۋ! بيلىك تاراپىنان قابىلداناتىن ماڭىزدى دا وزەكتى ماسەلەلەر حالىقپەن بىرگە شەشىلۋى كەرەك. بيلىك حالىقتىڭ پىكىرىمەن، ويىمەن، كوزقاراسىمەن، ۇستانىمىمەن ساناسۋ كەرەك. اسىرەسە، پوتەنتسيالدى اەس ورنالاسۋى مۇمكىن دەگەن ءوڭىر – بۇل الماتى وبلىسى. سوندىقتان، ونداعى جۇرت اەس رەفەرەندۋمىنا وزگەلەردەن بەلسەندى ارالاسۋى كەرەك!

الماتى وبلىسى 1,5 ميلليوننان استام حالقى بار كولەمى دە، ساياسي ىقپالى دا اۋقىمدى ءوڭىر. سوندىقتان، ونداعى حالىقتىڭ رەفەرەندۋمعا بەلسەندىرى ارالاسۋى استە ماڭىزدى! وسىعان دەيىنگى قوعامدىق تالقىلاۋلار كەزىندە دە الماتى وبلىسىنىڭ حالقى بەلسەندى بولدى. قىزۋ دا تارتىستى پىكىرتالاستاردىڭ ءبىرى وسى وڭىردە ءوتتى. سەبەبى، ءدال الماتى وبلىسىنداعى حالىق ءۇشىن تاعدىرشەشتى ماسەلە جالپىحالىقتىق تالقىعا شىعارىلىپ وتىر.

كەشە عانا الماتى وبلىسىندا بەلسەندى جاستار رەفەرەندۋمعا ەل-جۇرتتى شاقىرۋ ءۇشىن 15 مىڭعا جۋىق ۇنپاراق تاراتىپتى دەگەندى وقىدىق. سولاي جالعاسۋى ابدەن دۇرىس. ويتكەنى، ەلدىڭ ءاربىر تۇرىنىنىڭ پىكىرى، شەشىمى ايماق پەن ەلدىڭ بولاشاعى ءۇشىن ماڭىزدى! اەس قۇرىلىسىن جاقتاي ما، الدە وعان قارسى ما، رەفەرەندۋمعا بارىپ، سول جەردە ءوز پوزيتسياسىن، ءوز داۋىسىن، ءوز پىكىرىن ءبىلدىرۋى جانە ونى قورعاۋى ماڭىزدى!

بۇل تەك الماتى وبلىسىنا قاتىستى ەمەس، جالپى قازاقستاننىڭ بۇكىل اۋماعىنداعى سەرگەك سانالى ازاماتتارعا قاتىستى دا سولاي!

Abai.kz