«AMANAT» پارتياسىنىڭ «TALQYLAU» ديالوگ الاڭىنىڭ وتىرىسى اياسىندا اتوم ەلەكتر ستانتسياسىن (اەس) سالۋدى قولداۋ جونىندەگى حالىقتىق شتابتىڭ رەسمي سايتىنىڭ تانىستىرىلىمى ءوتتى. جاڭا رەسۋرس – aes2024.kz, الداعى رەفەرەندۋم مەن قازاقستانداعى اتوم ەنەرگەتيكاسىنىڭ دامۋ پەرسپەكتيۆالارى تۋرالى جان-جاقتى اقپارات ۇسىنادى.

اتالعان پلاتفورمادا الەمدەگى اتوم ەنەرگەتيكاسىنىڭ دامۋ تاريحىمەن تانىسۋعا بولادى – اەس سانى مەن حالىقارالىق تاجىريبەدەن باستاپ، قاۋىپسىزدىك ستاندارتتارى مەن جاڭا بۋىن رەاكتورلارىنىڭ ەرەكشەلىكتەرىنە دەيىنگى دەرەكتەر قامتىلعان. اەس سالۋدى قولداۋ جونىندەگى حالىقتىق شتابتىڭ مەديا-توبىنىڭ جەتەكشىسى باقتيار ماكەن جاڭا پورتالدىڭ تۇساۋكەسەرى بارىسىندا سايتتىڭ حالىقتى اتوم ەنەرگەتيكاسى مەن الداعى رەفەرەندۋم تۋرالى اقپاراتتاندىرۋداعى ماڭىزدى ءرولىن اتاپ ءوتتى.

«رەفەرەندۋم تۋرالى جانە اتوم ەنەرگەتيكاسىنىڭ ەرەكشەلىكتەرى جايلى وبەكتيۆتى ءارى تولىق اقپارات بەرۋ ماقساتىندا ءبىز قازاقستاندا وتەتىن رەفەرەندۋمعا ارنالعان بىرىڭعاي اقپاراتتىق رەسۋرس اشتىق. بۇل سايت اتوم ەنەرگەتيكاسى مەن رەفەرەندۋم ماسەلەلەرىنە قىزىعۋشىلىق تانىتقان ازاماتتار ءۇشىن نەگىزگى اقپارات كوزىنە اينالادى. رەسۋرس قۇرىلىمى ەگجەي-تەگجەيلى ويلاستىرىلعان. سايت قولدانۋشىعا بارىنشا ىڭعايلى ەتىلىپ جاسالعان: ينتەرفەيس وڭاي ءارى قاجەتتى اقپاراتتى ەركىن الۋعا مۇمكىندىك بەرەدى»، – دەدى باقتيار ماكەن.

سايت قازاق جانە ورىس تىلدەرىندە ءۇش نەگىزگى ايداردى قامتيدى: «جاڭالىقتار»، «اتوم ەنەرگەتيكاسى تۋرالى» جانە «اەس سالۋ بويىنشا». ايدارلار مەن ولاردىڭ سيپاتتامالارى تۇسىنىكتى ءارى قاراپايىم تىلمەن جازىلعان. سايلاۋشىلارعا ىڭعايلى بولۋ ءۇشىن باستى بەتتە رەفەرەندۋمنىڭ كۇنى مەن وتەتىن ورنى كورسەتىلگەن جانە كەرى ساناق جۇرگىزىلۋدە. ەلەكتروندى ساعاتتار ناقتى ۋاقىت رەجيمىندە كەرى ساناق جۇرگىزىپ، سايلاۋ ۋچاسكەسىنە بارۋ ۋاقىتىن جوسپارلاۋعا مۇمكىندىك بەرەدى.

«سايت قۇرىلىمى ىڭعايلى، قولدانۋشىعا قاجەتتى اقپاراتتى تەز تابۋعا مۇمكىندىك بەرەدى. باستى بەتتە اتوم ەنەرگەتيكاسىنىڭ ەكونوميكالىق، ەكولوگيالىق جانە باسقا دا اسپەكتىلەرى تۋرالى مازمۇن قىسقاشا ءارى تۇسىنىكتى تۇردە بەرىلگەن. ينتەرنەت قولدانۋشىسى اەس قۇرىلىسىنا قولداۋ ءبىلدىرۋ نەمەسە قولداماۋ ماسەلەسىنىڭ قوعامعا قالاي اسەر ەتەتىنىن بىلە الادى. ءاربىر سايلاۋشىنىڭ دۇرىس شەشىم قابىلداۋى ءۇشىن بەدەلدى ساراپشىلار، سونىڭ ىشىندە «قازاقستاندىق اتوم ەلەكتر ستانتسيالارى» جشس باس ديرەكتورى تيمۋر جانتيكين، يادرولىق تەحنولوگيالار قاۋىپسىزدىگى عىلىمي-تەحنيكالىق ورتالىعى ديرەكتورىنىڭ ورىنباسارى الەكساندر كلەپيكوۆ جانە باسقا دا ماماندار ءوز پىكىرلەرىمەن بولىسەتىن بولادى»، – دەپ قوستى باحتيار ماكەن.

«اتوم ەنەرگەتيكاسى تۋرالى» ايدارىندا «الەمدەگى اتوم ەنەرگەتيكاسى»، «اەس سالۋدىڭ الەمدىك تاجىريبەسى»، «ءجيى قويىلاتىن سۇراقتار» جانە «الەمدەگى اەس سانى» سىندى ماڭىزدى بولىمدەر بار. مۇندا اتوم ەنەرگەتيكاسى تۋرالى كەڭ كولەمدى اقپارات قولجەتىمدى. «اەس سالۋدىڭ الەمدىك تاجىريبەسى» بولىمىندە پايدالانۋشىلار باسقا ەلدەردىڭ ءساتتى جوبالارىمەن جانە وزىق تاجىريبەلەرىمەن تانىسا الادى.

ارينە، سايتتاعى ەڭ تانىمال بولىمدەردىڭ ءبىرى «ءجيى قويىلاتىن سۇراقتار» بولماق، مۇندا اەس قۇرىلىسى، داۋىس بەرۋ پروتسەسى، ونىڭ ارتىقشىلىقتارى مەن ىقتيمال قاۋىپتەرى تۋرالى بارلىق سۇراقتارعا قاراپايىم تىلمەن جاۋاپتار بەرىلگەن. ەڭ ءجيى قويىلاتىن التى سۇراقتىڭ جاۋابى ۇسىنىلعان، ولار ەكولوگيالىق قاۋىپسىزدىكتەن باستاپ ساياسي تاۋەكەلدەرگە دەيىنگى ماسەلەلەردى قامتيدى.

سايت قازاقستاندىق قوعامنىڭ اتوم ەنەرگەتيكاسىنا قاتىستى بارلىق ساۋالدارعا جاۋاپ بەرەدى. قوسىمشا سۇراقتار تۋىنداعان جاعدايدا، سايت جاساۋشىلارى كورسەتكەن بايلانىس ورتالىعىنىڭ تەلەفون نومىرىنە حابارلاسۋعا بولادى: +7 (7172) 707 628.

جالپى، شاراعا قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ, قازاقستان رەسپۋبليكاسى پارلامەنتى سەناتىنىڭ دەپۋتاتى اسەم راحمەتوۆا, قازاقستان رەسپۋبليكاسى پارلامەنتى ءماجىلىسىنىڭ دەپۋتاتى سەرگەي پونومارەۆ, قازاقستان ەلەكتر ەنەرگەتيكالىق قاۋىمداستىعىنىڭ توراعاسى تالعات تەمىرحانوۆ جانە «ەكونوميكالىق زەرتتەۋلەر ينستيتۋتى» باسقارما توراعاسىنىڭ ورىنباسارى ەردىلدا تاۋتەنوۆ قاتىستى.

ەسكە سالا كەتەيىك، ەلدەگى ەڭ بەلسەندى جانە بەدەلدى ساياسي جانە قوعامدىق ۇيىمدار اەس سالۋدى قولداۋ جونىندەگى حالىقتىق شتابقا بىرىكتى. بۇل تۋرالى ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ شتابتىڭ العاشقى وتىرىسىندا مالىمدەدى. شتاب اتوم ەلەكتر ستانتسياسىن سالۋ يدەياسى توڭىرەگىندە حالىقتى بىرىكتىرۋ ماقساتىندا قۇرىلعان. ونىڭ قۇرامىنا التى ساياسي پارتيانىڭ 250-گە جۋىق وكىلى جانە 20 رەسپۋبليكالىق قوعامدىق ۇيىم كىردى.

حالىقتىق شتابتىڭ ءباسپاسوز قىزمەتى

Abai.kz