ولجاس بەكتەنوۆ پەن حۆق باسقارۋشى ديرەكتورىنىڭ ورىنباسارى بو لي قارجى-ەكونوميكالىق ىنتىماقتاستىق ماسەلەلەرىن تالقىلادى

قازاقستان پرەمەر-ءمينيسترى ولجاس بەكتەنوۆ حالىقارالىق ۆاليۋتا قورى باسقارۋشى ديرەكتورىنىڭ ورىنباسارى بو ليمەن كەزدەستى. كەزدەسۋ بارىسىندا قارجى-ەكونوميكالىق سالاداعى ىنتىماقتاستىق ماسەلەلەرى تالقىلاندى.

قازاقستان – 1992 جىلدان بەرى حۆق مۇشەسى. حۆق-مەن ۇزاقمەرزىمدى سەرىكتەستىك ەلىمىزدىڭ ەكونوميكالىق تۇراقتىلىعىن جانە ۇلتتىق ەكونوميكانىڭ ساپالى تۇراقتى ءوسۋىن قامتاماسىز ەتۋ ءۇشىن ماڭىزدى.

كەزدەسۋگە قاتىسۋشىلار قازاقستان مەن حۆق اراسىنداعى ءوزارا ءىس-قيمىلدىڭ ستراتەگيالىق سيپاتىن اتاپ ءوتتى. ىنتىماقتاستىقتىڭ جوعارى ماڭىزىن قۇرىلىمدىق رەفورمالار جۇرگىزۋ، قازاقستاننىڭ سالىق-بيۋدجەت ساياساتى مەن قارجى نارىعىن دامىتۋ جونىندەگى بىرلەسكەن جۇمىستىڭ وڭ ناتيجەلەرى ايعاقتايدى.

حالىقارالىق قارجىلىق تۇراقتىلىقتى قولداۋ جونىندەگى ەكىجاقتى جانە وڭىرلىك ديالوگقا وتكەن جىلى الماتى قالاسىندا كاۆكاز، ورتالىق ازيا جانە موڭعوليا ەلدەرى ءۇشىن الەۋەتتى دامىتۋ جونىندەگى حۆق وڭىرلىك ورتالىعىنىڭ اشىلۋى جاڭا سەرپىن بەردى. مەملەكەت باسشىسىنىڭ ەكونوميكانى كەشەندى جاڭعىرتۋ بويىنشا جۇرگىزگەن جۇيەلى جۇمىسىنىڭ ناتيجەسىندە بيىلعى 9 قىركۇيەكتە Moody's رەيتينگتىك اگەنتتىگى قازاقستاننىڭ ەگەمەندىك رەيتينگىن تۇراقتى بولجاممەن Baa1-گە دەيىن كوتەرگەنى اتاپ ءوتىلدى. بەرىلگەن رەيتينگ ەل تاۋەلسىزدىگى جىلدارى ىشىندەگى ەڭ جوعارعىسى بولىپ سانالادى جانە ينستيتۋتسيونالدى ورتانىڭ ۇزدىكسىز جاقسارعانىن جانە ەكونوميكانى ءارتاراپتاندىرۋ قارقىنىنىڭ ورنىقتىلىعىن راستايدى.

ولجاس بەكتەنوۆ قازاقستان ۇكىمەتى ۇلتتىق بانكپەن جانە قارجى نارىعىن دامىتۋ جانە رەتتەۋ اگەنتتىگىمەن بىرلەسىپ ساپالى ەكونوميكالىق وسىمگە قول جەتكىزۋگە باعىتتالعان دايەكتى ساياسات جۇرگىزۋگە نيەتتى ەكەنىن اتاپ ءوتتى. اعىمداعى رەفورمالار بيۋدجەت ساياساتىنىڭ، قارجى ەسەپتىلىگىنىڭ جانە سالىقتىق اكىمشىلەندىرۋدىڭ تيىمدىلىگىن ودان ءارى ارتتىرۋعا باعىتتالعان.

ءوز كەزەگىندە حۆق باسقارۋشى ديرەكتورىنىڭ ورىنباسارى بو لي ەل ەكونوميكاسىن دامىتۋ جانە حالىقتىڭ ءال-اۋقاتىن جاقسارتۋ ماقساتىندا قازاقستانمەن تىعىز جانە سىندارلى ىنتىماقتاستىقتى جالعاستىرۋعا مۇددەلىلىگىن اتاپ ءوتتى.

مەملەكەتتىك ورگاندارعا كورسەتىلەتىن تۇراقتى كونسۋلتاتسيالار مەن تەحنيكالىق كومەك ينستيتۋتسيونالدى نەگىزدى نىعايتۋعا، ماكروەكونوميكالىق جانە ماكروپرۋدەنتسيالىق ساياساتتى جەتىلدىرۋگە ىقپال ەتەدى.

كەزدەسۋ قورىتىندىسى بويىنشا تاراپتار ءوزارا ءىس-قيمىلدىڭ بارلىق سپەكترى بويىنشا ارىپتەستىكتى نىعايتۋ نيەتىن راستادى.

Abai.kz