«سوڭعى ءۇش جىلدا قازاقستاندا 270 اسكەري قىزمەتكەر قايتىس بولعان، ال سوڭعى ءتورت جىلدا اسكەردە 86 سۋيتسيد تىركەلگەن، 20 اسكەري ادام ءوز-وزىنە قول سالۋعا وقتالعان. بۇل – اسكەري پروكۋراتۋرا مالىمدەگەن رەسمي سان. 2023 جىلعى تامىزدا اسكەري بولىمشەلەردىڭ بىرىندە كوماندير اسكەرگە جاڭادان كەلگەن ساربازدى ورىندىقپەن ۇرىپ، سوققىعا جىققان. 2024 جىلدىڭ ماۋسىم ايىندا جامبىل وبلىسىنىڭ ءبىر اسكەري بولىمشەسىندە اسكەرگە كەلگەنىنە 1 اي بولعان سارباز ەس-ءتۇسسىز جانساقتاۋ بولىمىنە تۇسكەن. ال تاياۋدا بولعان جاعداي بۇكىل وتانداسىمىزدىڭ اشۋ-ىزاسىن تۋعىزدى. ۇلتتىق ۇلاننىڭ جاۋىنگەرى ەربايان مۇحتار باسىنان العان جاراسىنان بەس اي بويى ەس-ءتۇسسىز جاتتى. جاۋاپتىلار «ەربايان دارەتحاناعا قۇلاپ، جاراقاتتاندى» دەيدى. بۇعان كىم سەنەدى؟ جاراقاتتىڭ سالدارىنان ساربازدىڭ باسىنىڭ جارتىسىن الىپ تاستاۋعا تۋرا كەلگەن. ەندى وعان تۇراقتى كۇتىم قاجەت. 7 قىركۇيەك كۇنى اقتاۋداعى گورنيزوندا سارباز مارات بارقۇلوۆ ەسىمدى باۋىرىمىز كوز جۇمدى. ونى وفيتسەر اتىپ جىبەرگەن. بۇل قاساقانا جاسالعان ارەكەت، جوق پا؟ اتالعان سۇراقتىڭ جاۋابىن تەرگەۋ ورىندارى ءادىل زەرتتەپ، ناتيجەسىن قوعامعا اشىق تۇردە جەتكىزۋى كەرەك»، - دەدى ن.سارسەنعاليەۆ قورعانىس ءمينيسترى رۋسلان جاقسىلىقوۆتىڭ اتىنا جولداعان ساۋالىندا.

سونىمەن قاتار ول اسكەري قىزمەتكەرلەردىڭ الەۋمەتتىك جاعدايىنا قاتىستى پىكىر ايتتى.

«بىلتىر قورعانىس مينيسترلىگى اسكەري بولىمدەردە 50 مىڭنان استام بەينەكامەرا بار دەدى. ونداعى جازبالار قايدا؟ الدە ەربايان سەكىلدى باۋىرلارىمىز جاراقات العاندا الگى كامەرالار تەرىس قاراپ قالدى ما؟ اسكەردەگى الىمجەتتىك ماسەلەسىن اMANAT پارتياسى 2022 جىلى كوتەرگەن بولاتىن. الايدا جاعداي تۇزەلمەك تۇگىلى، ۋشىعىپ كەتتى دەسە دە بولادى. ساربازداردىڭ ارميادا جاراقات الىپ، قايتىس بولۋى توقتار ەمەس. وسى تۇستا تاعى ءبىر تۇيتكىل بار، اسكەري قىزمەتكەرلەردىڭ الەۋمەتتىك جاعدايى تومەن. ولاردىڭ ايلىعى شايلىعىنا جەتپەيدى، سەبەبى سوڭعى رەت اسكەريلەردىڭ جالاقىسى 2008 جىلى عانا كوتەرىلگەن. ۋاعىندا بەرىلگەن الەۋمەتتىك قولداۋ شارالارىنىڭ ءبىرازىنان شەت قالعان. بۇل جاعدايدى تۇزەتۋ كەزەك كۇتتىرمەيتىن ماسەلە»، - دەدى دەپۋتات.

Abai.kz