«مەنى تامىرىن كەڭ جايعان سينتەتيكالىق ەسىرتكى كەسىرىنەن بولاشاعىنا بالتا شاۋىپ جاتقان ازاماتتاردىڭ تاعدىرى الاڭداتۋدا. بۇگىن سينتەتيكالىق ەسىرتكى قولجەتىمدى. الۋ ءۇشىن ينتەرنەت جانە گادجەت بولسا بولدى. قازاقستاندا ناشاقورلاردىڭ ەسەبىندە 18 مىڭنان استام ادام تىركەلگەن. ەلىمىزدە 2023 جىلى 1 ملن گراممنان استام ەسىرتكى تاركىلەنسە، بيىل 8 ايدا 900 مىڭ گراممعا جەتكەن. ەسىرتكىنى ساتۋعا بايلانىستى 3145 ادام قىلمىس جاساپ ونىڭ 2560-ى سوتتالىپ كەتكەن. بۇل قارقىنمەن 10 جىلدا 1 اۋىلدىڭ تۇرعىندارىنا تەڭ ادام سوتتالىپ كەتپەك»، - دەدى رۋسلان بەردەنوۆ ءماجىلىس وتىرىسىندا ۇكىمەت باسشىسى ولجاس بەكتەنوۆتىڭ اتىنا دەپۋتاتتىق ساۋال جولداي وتىرىپ.

ونىڭ مالىمەتىنشە، بۇگىندە 37 مىڭنان استام سوتتالعانداردىڭ 8% ەسىرتكى قىلمىسىنا قاتىستى جازاسىن وتەپ جاتىر.

حالىق قالاۋلىسىن ەسىرتكى قىلمىسىنىڭ جەتەگىنە ەرگەن ازاماتتاردىڭ جاس مولشەرىنىڭ 16-17 جاسقا تومەندەۋى مەن ايەل قىلمىسكەرلەر سانىنىڭ ءوسۋى الاڭداتادى.

ودان ءارى ءماجىلىس دەپۋتاتى پرەمەر-ءمينيستردىڭ نازارىنا ناشاقورلىققا قاتىستى قوعامدى تولعاندىراتىن سۇراقتارىن جولدادى.

ءبىرىنشى: ەلىمىزدىڭ ايماقتارىندا جاسىرىن ەسىرتكى لابوراتوريالارى قارقىندى جۇمىس ىستەيتىنى جانە ولاردى ءتۇرلى ورگاندار قورعايتىنى جايلى پىكىر قالىپتاسقان. وسى باعىتتا تەكسەرۋ جۇمىستارىن ۇيىمداستىرۋ قاجەت.

ەكىنشى: ەسىرتكىنىڭ ەلگە كىرۋ كوزدەرىنىڭ ءبىرى شەكارا بولعاندىقتان، شەكارا قىزمەتى قاجەتتى ماتەريالدىق-تەحنيكالىق قۇرالدارمەن قانشالىقتى ساپالى جابدىقتالعان ؟

ءۇشىنشى: ەسىرتكى ساتۋعا قولدانىلاتىن شەتەلدىك مەسسەندجەرلەردە ەسىرتكى ساتۋدى ۇيىمداستىرۋشىلار جايلى قانشا ۇسىنىس جولدانىپ، قانشاسى قولداندى، قانشاسى قاراۋسىز قالدى؟ ولارمەن ىنتىماقتاستىق قاي دەڭگەيدە؟

ءتورتىنشى: ەسىرتكىنىڭ جاڭا تۇرلەرىن انىقتايتىن زاماناۋي سوت ساراپتاماسى ورگاندارىنىڭ ماتەريالدىق-تەحنيكالىق جابدىقتالۋى جانە ساراپتاما مەرزىمىن قىسقارتۋ جۇمىسى قانشالىقتى تولىق اتقارىلۋدا ؟

بەسىنشى: ءبىز ەسىرتكىمەن كۇرەستى قارجى ساۋاتى تومەن، ءبىلىمى جوق، الەۋمەتتىك جاعدايى ناشار «زاكلادچيكتەرمەن» شەكتەلىپ وتىرمىز؟ قوعام نەگە وسى بالالارعا ەسىرتكى ساتۋعا يتەرمەلەپ وتىرعان قىلمىستىق توپتاردىڭ ۇستالعانىن ەستىمەيدى؟ بۇگىن ءبىز ماسەلەنىڭ سالدارىمەن كۇرەسۋدەمىز.

«وسى توپتاردىڭ ارتىندا جوعارى لاۋازىمدى مۇددەلى تۇلعالار بار ەكەن انىق. وسىعان وراي ناشاقورلىققا جانە ەسىرتكى بيزنەسىنە قارسى كۇرەسكە باعىتتالعان 5 جىلدىق كەشەندى جوسپاردا ىشكى ىستەر، ادىلەت، دەنساۋلىق ساقتاۋ، عىلىم جانە جوعارى ءبىلىم، وقۋ-اعارتۋ، تسيفرلىق دامۋ مينيسترلىكتەرى، شەكارا قىزمەتى مەن ۇلتتىق قاۋىپسىزدىك كوميتەتىنە ناقتى شارالاردى بەكىتىپ، الدىن الۋ، سەبەپتەرىن انىقتاۋ جانە سالدارىمەن كۇرەسۋگە قاتىستى تولىقتىرۋلاردى بىرلەسىپ ەنگىزۋدى ۇسىنامىن»، - دەيدى ر. بەردەنوۆ.

Abai.kz