اەس سالۋدى قولداۋ جونىندەگى حالىقتىق شتاب ەلىمىزدىڭ مۇنايلى استاناسى – اتىراۋعا كەلدى. مۇندا عىلىمي قاۋىمداستىقپەن، جەو قىزمەتكەرلەرىمەن، وندىرۋشىلەرمەن، مۇناي-گاز جانە حيميا ونەركاسىبىنىڭ وكىلدەرىمەن بىرقاتار كەزدەسۋ ءوتتى.

س. وتەباەۆ اتىنداعى اتىراۋ مۇناي جانە گاز ۋنيۆەرسيتەتىندە وقىتۋشىلارمەن جانە وڭىردەگى جوعارى وقۋ ورىنداردىڭ جاس عالىمدارمەن كەزدەسۋ ۇيىمداستىرىلدى. شتاب مۇشەلەرى عىلىمدى دامىتۋ جانە عالىمدارعا الەۋمەتتىك قولداۋ كورسەتۋ ماسەلەسى مەملەكەت باسشىسىنىڭ نازارىندا ەكەنىن اتاپ ءوتتى. قازىر عىلىمي قوعامداستىقتىڭ الدىندا ونەركاسىپتىك وندىرىسكە يننوۆاتسيالىق تەحنولوگيالار مەن ازىرلەمەلەردى ەنگىزۋگە قاتىستى ۇلكەن مىندەت تۇر.

يادرولىق فيزيكا ينستيتۋتىنىڭ باس ديرەكتورى سايابەك ساحيەۆ اتاپ وتكەندەي، حالىقتىق شتابتىڭ وڭىرلەرگە ساپارىنىڭ باستى ماقساتى – تۇرعىندارمەن اشىق ءارى شىنايى اڭگىمەلەسۋ.

«الەم ءبىر ورىندا تۇرمايدى. قازاقستان دا العا قادام باسۋدا. ءبىز تۇرعىندارعا اتوم سالاسىندا، اتوم ەنەرگەتيكاسىندا قانداي جاڭالىقتار بار ەكەنىن ايتىپ، ەلىمىزدىڭ جەتكەن جەتىستىكتەرمەن بولىسكىمىز كەلەدى. قازاقستان الەمنىڭ اجىراماس بولىگى رەتىندە ءبىزدىڭ دە ايتۋعا، ماقتانۋعا جانە كورسەتۋگە تۇرارلىق جەتىستىكتەرىمىز بار. اتوم ەنەرگەتيكاسى تەك اتوم ەلەكتر ستانتسياسى عانا ەمەس، سونىمەن قاتار ول ەكونوميكانىڭ كەز كەلگەن سالاسىندا قولدانىلادى. بۇل تۋرالى بۇگىن اتىراۋ وبلىسىنىڭ تۇرعىندارىمەن سويلەستىك، ولاردىڭ پىكىرلەرىن بىلدىك»، – دەدى ول.

اتىراۋ جەو ۇجىمىمەن كەزدەسۋدە شتاب مۇشەلەرى تكش جۇيەلەرىنىڭ قالىپتى جۇمىس ىستەۋى ءۇشىن تۇراقتى ءارى سەنىمدى ەنەرگيا كوزى قاجەت ەكەنىن ايتتى. بۇگىندە اتىراۋ وبلىسى ەڭ جوعارى جۇكتەمەلەر كەزىندە كوپ جاعدايدا رەسەيدەن جەتكىزىلەتىن ەنەرگياعا تاۋەلدى. قىرۋار قارجىلىق شىعىنداردان بولەك، ەنەرگيا جەتىسپەۋشىلىگى وندىرىستىك مىندەتتەردى دە شەشۋگە مۇمكىندىك بەرمەيدى. جۋىردا ەلىمىزدىڭ باتىس وڭىرلەرىن بىرىڭعاي ەنەرگيا جۇيەسىنە قوسۋ جۇمىسى باستالادى.

پروپيلەن وندىرەتىن «Kazakhstan Petrochemical Industries Inc.» جشس زاۋىتىندا شتاب مۇشەلەرى مۇناي-گاز جانە حيميا ونەركاسىبى وكىلدەرىمەن جۇزدەستى. جوعارى تەحنولوگيالىق ونەركاسىپتىك ءوندىرىستى ودان ءارى دامىتۋدىڭ جانە پرەزيدەنتتىڭ 2029 جىلعا قاراي ەلدەگى ءجىو-ءنى ەكى ەسە ارتتىرۋ جونىندەگى تاپسىرماسىن ورىنداۋدىڭ باستى فاكتورى – سەنىمدى ءارى تۇراقتى ەنەرگيا كوزى.

بۇدان سوڭ شتاب مۇشەلەرى «داۋلەت» يندۋستريالىق ايماعى كاسىپورىندارىنىڭ قىزمەتكەرلەرىمەن كەزدەستى. مۇندا كيىم تىگەتىن، نان، كونديتەرلىك ونىمدەر، ماكارون ونىمدەرىن، ەت كونسەرۆىلەرىن، اۋىز سۋ، قۇرىلىس قوسپالارىن جانە تاعى دا باسقا زاتتاردى وندىرەتىن كومپانيالار جۇمىس ىستەيدى. وزگە وڭىرلەردەگى سەكىلدى مۇنداعى بيزنەس وكىلدەرى دە قازىرگى ەنەرگيا تاپشىلىعى جاڭا تەحنولوگيالاردى ىسكە قوسۋعا مۇمكىندىك بەرمەيتىنىن جانە ءوندىرىستىڭ دامۋىن تەجەيتىنىن مالىمدەدى. كوپتەگەن پەرسپەكتيۆالى جوبالار ەلەكتر ەنەرگيا تاپشىلىعىنا بايلانىستى جۇزەگە اسىرىلماۋدا.

حالىقتىق شتابتىڭ ءباسپاسوز قىزمەتى