قازىرگى قوعامدا ستۋدەنتتەر اراسىندا قۇقىق بۇزۋشىلىقتاردىڭ ءوسۋى الاڭداتارلىق جاعداي تۋعىزۋدا.الماتى قالاسىنىڭ پروكۋراتۋراسى قۇقىق بۇزۋشىلىقتاردىڭ الدىن-الۋ جانە ولارمەن كۇرەس ماقساتىندا «Zhastarmen» جوباسىن ىسكە اسىرىپ، ستۋدەنتتەرگە قۇقىق بۇزۋشىلىقتارعا قارسى بەلسەندى كۇرەسۋگە مۇمكىندىك بەرۋدە. بۇل باستامانىڭ باستى ماقساتى – ستۋدەنتتەردى زاڭسىز ارەكەتتەردەن ساقتاندىرۋ جانە قۇقىق بۇزۋشىلىققا بايلانىستى جەدەل اقپاراتپەن بولىسۋگە شاقىرۋ. جوبانىڭ ءبىر مىسالى رەتىندە المالى اۋدانىندا ۆەيپ ساتاتىن دۇكەندى انىقتاعان ستۋدەنتتىڭ ارەكەتى كورسەتىلەدى، بۇل فاكتى نەگىزىندە رەيد جۇرگىزىلىپ، زاڭ بۇزۋشىلىق دالەلدەندى.

جوبا بارىسىندا «جاستار» تەلەگرامم كانالىنىڭ بەلسەندى قاتىسۋشىلارىمەن جانە پوليتسيا قىزمەتكەرلەرىمەن بىرلەسىپ الكوگول ءونىمىن زاڭسىز وتكىزۋ جانە باسقا دا قۇقىق بۇزۋشىلىقتاردى انىقتاۋ بويىنشا رەيدتىك ءىس-شارالار وتكىزدى. ءار ءتۇرلى قۇقىق بۇزۋشىلىقتار ءۇشىن 16 اكىمشىلىك حاتتاما تولتىرىلدى.المالى اۋدانى پروكۋراتۋراسى ءال-فارابي اتىنداعى قازۇۋ ستۋدەنتتەرىنىڭ وتە بەلسەندى بولعانىن اتاپ ءوتىپ،سىيلىق سەرتيفيكاتتارىن تابىستاپ،العىس ءبىلدىردى.الداعى وتەتىن شارالارعا بەلسەندى قاتىسۋعا شاقىردى.مۇنداي جوبالار ستۋدەنتتەر اراسىندا قۇقىقتىق مادەنيەتتى ارتتىرۋعا، زاڭعا قارسى ارەكەتتەرگە جول بەرمەۋگە باعىتتالعان ماڭىزدى قادامدار بولىپ تابىلادى. جاستاردىڭ قۇقىقتىق ءبىلىمىن ارتتىرۋ جانە ولاردى زاڭدى ساقتاۋعا باۋلۋ قوعامداعى ءتارتىپ پەن ادىلەتتىلىكتى نىعايتۋعا ۇلەس قوسادى.

ستۋدەنتتەر اراسىنداعى قۇقىق بۇزۋشىلىقتار كوبىنەسە زاڭعا دەگەن نەمقۇرايلىقتان جانە باقىلاۋدىڭ السىزدىگىنەن تۋىندايدى. ونىڭ ىشىندە ۆەيپ،الكوگول،ەسىرتكى ونىمدەرىن ت.ب پايدالانۋ، تىيىم سالىنعان زاتتاردى تاراتۋ جانە قولدانۋ ستۋدەنتتەر اراسىندا ءجيى كەزدەسەتىن قۇقىق بۇزۋشىلىق تۇرىنە اينالدى.جاستار اراسىنداعى قۇقىقتىق مادەنيەتتى قالىپتاستىرۋدىڭ ماڭىزدى قادامدارىنىڭ ءبىرى – قۇقىقتىق ساۋاتتىلىقتى ارتتىرۋ.وسىنى نازارعا الا وتىرا، ءال-فارابي اتىنداعى قازۇۋ زاڭ فاكۋلتەتى قىلمىستىق قۇقىق، قىلمىستىق ءىس جۇرگىزۋ جانە كريميناليستيكا كافەدراسىنىڭ پروفەسسورلىق-وقىتۋشىلار قۇرامى  ءبىلىم الۋشىلارعا ارنايى جۇمىس جۇرگىزىپ، ترەنينگتەر مەن سەمينارلار وتكىزىپ وتىرادى.ستۋدەنتتەردى زاڭدى ساقتاۋعا جانە قۇقىقتىق نورمالاردى بۇزباۋعا شاقىرادى.

                                                                               مۋحاماديەۆا گ.ن

ءال-فارابي اتىنداعى

قازۇۋ زاڭ فاكۋلتەتى قىلمىستىق قۇقىق، قىلمىستىق

ءىس جۇرگىزۋ جانە كريميناليستيكا كافەدراسىنىڭ دوتسەنتى،ز.ع.ك

انداربەك ن.ە

ءال-فارابي اتىنداعى

قازۇۋ زاڭ فاكۋلتەتىنىڭ 2 كۋرس ستۋدەنتى