بۇگىندە ەلىمىزدە جاستار ساياساتىن جۇرگىزۋدە «جاستار رەسۋرستىق ورتالىعىنىڭ» ماڭىزى زور. رەسپۋبليكامىزدىڭ تۇكپىر -تۇكپىرىندە بەلسەندى ءجۇمىس اتقارىپ جاتقان ورتالىقتاردىڭ باستى مىندەتى- جاستارىمىزدىڭ ەل دامۋىنا ۇلەس قوسۋعا بەلسەندى بولۋعا شاقىرۋ. ەلىمىز بەن قوعامىمىزدىڭ ءبىر بولشەگىنە اينالۋ.

تۇركىستان وبلىسىنا قاراستى جەتىساي اۋداندىق جاستار رەسۋرستىق ورتالىعىنىڭ جەتەكشىسى بەكارىس ءىلياسۇلى ورتالىق اتقاراتىن نەگىزگى جۇمىستارعا توقتالدى. ونىڭ ايتۋىنشا، جاستار رەسۋرستىق ورتالىعى - اۋدانداعى بەلسەندى جاستاردى بىرىكتىرەتىن وردا ەكەن.

«جاستار رەسۋرستىق وررتالىعىنىڭ باستى ماقساتى- اۋدانداعى بەلسەندى جاستاردى ءبىر ارناعا جيناۋ. جاستار ارقىلى قوعامداعى  ماڭىزدى ماسەلەلەرگە ءۇن قوسۋ، ورتاق ماسەلەلەردى شەشۋ.  ءبىزدىڭ  ورتالىقتا جاستارمەن جۇمىس ىستەيتىن پسيحولوگ، يدەولوگ ماماندار بار. ولاردىڭ ءوز فۋنكتسياسى بار. مىسالى پسيحولوگ مامان مەكتەپ پەن كوللەدج ستۋدەنتتەرىمەن ءجيى كەزدەسۋ ۇيىمداستىرىپ، ناشاقورلىق پەن ىشىمىدىك، تەمەكى سىندى زياندى ارەكەتتەردەن اۋلاق بولۋ ماقساتىن كوزدەيتىن سەمينارلار وتكىزەدى. سونىمەن قاتار قىز كەلىنشەكتەرگە ارنالعان تانىمدىق جيىندار وتكىزەدى. جاستار ورتالىعىنىڭ ماماندارى اۋداندىق پوليتسيا بولىمىمەن بىرلەسىپ جاسوسپىرىمدەر اراسىندا قىلمىستى ازايتۋ ماقساتىندا اقپاراتتىق ءتۇسىندىرۋ جۇمىستارىنا بەلسەنە ارالاسادى. ودان بولەك اۋدان جاستارىن جۇمىسپەن قامتۋعا ارنالعان مەملەكەتتىك باعدارلامالارمەن تانىستىرۋ ماقساتىندا ۇگىت-ناسيحات جۇمىستارىنا قاتىسادى. اۋداندا بولىپ جاتقان قوعامدىق جۇمىستارعا بەلسەنە ارالاسامىز.  ەرىكتى جاستارىمىز قايىرىمدىلىق اكتسيالارىنا قاتىسادى»،- دەيدى بەكارىس ءىلياسۇلى.

ەل ەرتەڭى جاستارىمىزدىڭ، ەل دامۋىنا بەلسەندى ارالاسۋى بارىنەن دە ماڭىزدى. ەل قامىن ويلايتىن جاستارىمىز كوپ بولسىن.

Abai.kz