«ەڭ ۇلكەن پروبلەمانىڭ ءبىرى – مۇمكىندىگى شەكتەۋلى جانداردىڭ نىسانداردى ەركىن ءجۇرىپ-تۇرۋى. بۇل ايتا-ايتا جاۋىر بولعان ماسەلەگە اينالدى. اتقارىلىپ جاتقان جۇمىستار ماردىمسىز. مۇگەدەك جاندار ءۇشىن نىسانداردىڭ قولجەتىمدىلىگى 45%-دان اسپايدى. ونىڭ ۇستىنە، كەدەرگىسىز ورتا قالىپتاستىرۋ جۇمىستارى بەلسەندى ءجۇرىپ جاتقان ءىرى قالالاردىڭ وزىندە كوزگە كورىنەتىندەي ناتيجە جوق. مۇنى مۇگەدەكتەر ارباسىمەن قوزعالاتىن ەركەبۇلان رۇستەموۆ الەۋمەتتىك جەلىلەردە ءجيى كوتەرىپ، ەلوردانىڭ وزىندە كوپتەگەن پاندۋستار مەن اۋىسپا جولداردىڭ قوزعالۋعا مۇلدەم جارامسىز ەكەنىن كورسەتىپ كەلەدى. ءتىپتى، كەيبىر پاندۋستار مەن اۋىسپا جولداردان وتەر كەزدە بەسىك اربامەن جۇرگەن اتا-انالار دا الەككە ءتۇسىپ جاتادى»، - دەدى ولجاس بەكتەنوۆ ۇكىمەت وتىرىسىندا.

ۇكىمەت باسشىسىنىڭ ايتۋىنشا، مۇگەدەك جاندارعا ارنالعان ليفتىلەر مەن كوتەرگىشتەر جۇمىس ىستەمەيدى. سونداي-اق، بيىك بورديۋرلەر جولدى كەسىپ وتۋگە كەدەرگى كەلتىرەدى.

«قولايلى ورتا قالىپتاستىرۋ بويىنشا ىستەلىپ جاتقان جۇمىستاردا كوزبوياۋشىلىق كوپ. وبەكتىلەردى مۇگەدەكتىگى بار ادامداردىڭ، قارتتاردىڭ ىڭعايىنا قاراي بەيىمدەۋ جۇمىسىن كۇشەيتۋ قاجەت. بۇل، اسىرەسە الەۋمەتتىك وبەكتىلەرگە، دارىحانالارعا، ازىق-تۇلىك دۇكەندەرى مەن ساۋدا ورتالىقتارىنا قاتىستى. ونەركاسىپ جانە قۇرىلىس مينيسترلىگىنە قۇرىلىستىڭ ساپاسى مەن جاۋاپكەرشىلىكتى ارتتىرۋ ءۇشىن قولدانىستاعى ستاندارتتاردى قايتا قاراۋدى تاپسىرامىن. نورمالاردىڭ ساقتالۋىن باقىلاۋ قاجەت»، - دەيدى ول.

Abai.kz