تۇراقتى دامۋ ماقساتتارى  - 2015 جىلى بىرىككەن ۇلتتار ۇيىمى قابىلداعان جانە 2030 جىلعا دەيىن جۇزەگە اسىرۋعا باعىتتالعان 17 اۋقىمدى ماقساتتار جيىنتىعى.

تۇراقتى دامۋ ماقساتتارىنىڭ 3-ماقساتى «جاقسى دەنساۋلىق جانە ءال-اۋقات». بۇل ماقسات تۇراقتى دامۋدىڭ ماڭىزدى قۇرامداس بولىگى بولىپ تابىلادى، سەبەبى دەنى ساۋ جانە جاقسى ءومىر سۇرەتىن قوعام – ەكونوميكالىق جانە الەۋمەتتىك دامۋعا نەگىز بولا الادى. دەنى ساۋ ۇلت-تۇراقتى دامۋدىڭ نەگىزى. بۇل ماقساتقا جەتۋ ءۇشىن مەملەكەتتەر، ۇيىمدار جانە جەكە تۇلعالار بىرىگىپ، قوعامدىق دەنساۋلىق ساقتاۋ جۇيەلەرىن نىعايتۋى، ساپالى مەديتسينالىق كومەك كورسەتۋى جانە الدىن-الۋ شارالارىن كۇشەيتۋى قاجەت.جاقسى دەنساۋلىق ءار ادام ءۇشىن باقىتتى جانە ۇزاق ءومىردىڭ نەگىزى بولسا، جالپى قوعام ءۇشىن ءتيىمدى جۇمىس كۇشىن، الەۋمەتىك تەڭدىكتى جانە يننوۆاتسيالاردى دامىتۋ مۇمكىندىگىن ۇسىنادى.وسى جايتتى ەسكەرە وتىرا،ءال-فارابي اتىنداعى قازۇۋ مەديتسينا جانە دەنساۋلىق ساقتاۋ فاكۋلتەتىن اشقان بولاتىن. فاكۋلتەت  باكالاۆريات، ماگيستراتۋرا، رەزيدەنتۋرا، دوكتورانتۋرا – ءبىلىم بەرۋدىڭ بارلىق دەڭگەيدەگى مەديتسينالىق كادرلاردى دايىنداۋ باعدارلامالارى حالىقارالىق ستاندارتتارعا ساي جانە سوڭعى عىلىمي جەتىستىكتەرگە نەگىزدەلىپ جۇزەگە اسۋدا. سونىمەن قاتار، دەنساۋلىق ساقتاۋ جانە ونى جاقسارتۋ ماقساتىندا جاڭا باعدارلامالار دايىنداۋ، ونى جۇزەگە اسىرۋ جانە ارى قاراي دامىتۋمەن اينالىساتىن شاعىن جانە ورتا بيزنەس وكىلدەرى، ءتۇرلى باعىتتاعى ماماندار مەن ۇيىمدارعا قوسىمشا كاسىبي ءبىلىم بەرۋ دە قاراستىرىلعان.

مەملەكەت باسشىسى قاسىم-جومارت توقاەۆ وتكەن جولداۋىندا دەنساۋلىق ساقتاۋ جۇيەسىنىڭ تيىمدىلىگىن ارتتىرۋعا ەرەكشە نازار اۋداردى.بۇل رەتتە پرەزيدەنت تاپسىرماسىن ورىنداۋ ماقساتىندا قازاقستان ۇكىمەتىنىڭ 2021 جىلعى 12 قازانداعى قاۋلىسىمەن «دەنى ساۋ ۇلت» ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ ۇلتتىق جوباسى بەكىتىلىپ، جۇزەگە اسىرىلۋدا. جوبانىڭ ماقساتى – ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋدى قامتاماسىز ەتۋ، ول 2025 جىلعا دەيىن ەسەپتەلگەن جانە ءتورت ءتۇرلى باعىتتا جۇزەگە اسىرىلادى: ءبىرىنشى باعىت – مەديتسينالىق كومەكتىڭ قولجەتىمدىلىگى مەن ساپاسىن ارتتىرۋ. ەكىنشى باعىت – ەپيدەميالىق بولجاۋ مەن دەن قويۋدىڭ زاماناۋي جۇيەسىن قالىپتاستىرۋ. ءۇشىنشى باعىت – وتاندىق فارماتسەۆتيكا سالاسىنىڭ دامۋىنا ىقپال ەتۋ. ءتورتىنشى باعىت – سالاۋاتتى ءومىر سالتىن ۇستاناتىن حالىقتىڭ ۇلەسىن ارتتىرۋعا جانە بۇقارالىق سپورتتى دامىتۋعا باعىتتالعان ءىس-شارالار. پرەزيدەنت بولاشاققا باعىتتالعان بايىپتى باعدارلار مەن مىندەتتەردى سارالاۋ بارىسىندا دەنساۋلىق ساقتاۋ سالاسىنا دا ايرىقشا نازار اۋدارۋ قاجەتتىگىن باسا ايتتى. ەلىمىزدىڭ باستى قۇندىلىعى – ادام. ۇلت ساۋلىعى جاقسى بولسا عانا، قوعام ورنىقتى داميدى. دەنساۋلىقتى  ساقتاۋ – ادامداردىڭ ءومىر ءسۇرۋ ساپاسىن ارتتىرۋعا جانە حالىقتىڭ جالپى ءال-اۋقاتىن جاقسارتۋعا باعىتتالعان نەگىزگى سالالاردىڭ ءبىرى. قولجەتىمدى جانە ساپالى مەديتسينالىق قىزمەت كورسەتەتىن دەنساۋلىق ساقتاۋ جۇيەسىن دامىتۋ ارقىلى قوعامنىڭ تۇراقتىلىعىنا  ۇلەس قوسۋعا بولادى.

ءال-فارابي اتىنداعى قازۇۋ ەكونوميكا جانە جوعارى بيزنەس مەكتەبى

ە.ع.د.، پروفەسسور ابراليەۆ و. ا.

اعا وقىتۋشىلار: بايمبەتوۆا ا. ا.

كۋسمولداەۆا ج. ن.

Abai.kz