2024 جىلدىڭ 24-30 قاراشاسى ارالىعىندا الماتى مادەنيەت پەن كينو ونەرىنىڭ ورتالىعىنا اينالادى. جىلدىڭ ەڭ ماڭىزدى مادەني شارالارىنىڭ ءبىرى – XVII حالىقارالىق «ەۋرازيا» كينوفەستيۆالى ءوز شىمىلدىعى قازاقستاندىق «بىزگە دارىگەر كەرەك» ءفيلمىنىڭ كورسەتىلىمىمەن اشىلادى.

بۇل وتباسىعا ارنالعان تۋىندى ادامگەرشىلىك، كاسىبي شەبەرلىك جانە ومىردە ورىن الاتىن كۇتپەگەن وقيعالار جايلى سىر شەرتەدى. ول كورەرمەندەردى تەرەڭ سەزىم، اسەرلى ءازىل جانە ومىرلىك فيلوسوفياعا تولى ەرەكشە الەمگە جەتەلەيدى. كارتينا سيۋجەتى الماتىداعى اۋرۋحانالاردىڭ بىرىندە ءوربيدى. وندا بىلىكتى دارىگەر نيكولاي اناتولەۆيچ گراچەۆتىڭ 70 جىلدىق مەرەيتويى تويلانباق. تۋعان كۇن سالتاناتتى تۇردە باستالعانىمەن، وقيعا كۇتپەگەن ارناعا ءتۇسىپ، ادامدار اراسىنداعى شىنايى قارىم-قاتىناستاردى اشادى.

كورەرمەندەر ءۇشىن «بىزگە دارىگەر كەرەك» ءفيلمى تەك وقيعا جەلىسىن عانا ەمەس، سونىمەن قاتار دارىگەرلەردىڭ ادال ەڭبەگىن، ومىرلىك قۇندىلىقتار مەن ۇمىتكە تولى تەرەڭ ەموتسيالاردى جەتكىزەدى. اتالمىش فيلم «ەۋرازيا» كينوفەستيۆالىنىڭ ايرىقشا تۋىندىسى بولماق.

«بۇل مۋزىكالىق كومەديا برودۆەيلىك ستيلدەگى ميۋزيكل جانرىندا تۇسىرىلگەن. ءبىز تەك ءان ايتۋمەن شەكتەلمەيمىز. ءاربىر ءان سيۋجەتتىڭ وربۋىنە ۇلەس قوسادى. وسىنداي ءفيلمدى قازاقستاندا بۇرىن-سوڭدى كورگەن ەمەسپىن»، – دەيدى فيلم رەجيسسەرى راۆيل ترۋموۆ.

بۇل تۋىندى قازاقستاندىق كينو شەبەرلەرىنىڭ ناتيجەلى جۇمىسىنىڭ جەمىسى. ءفيلمنىڭ ستسەناريىن اسقار بيسەمبين، ساكەن توكتاعۇلوۆ، مەيىرمان ءابدىرايموۆ جانە راۆيل ترۋموۆ جازعان. كومپوزيتور الەكسەي ماكلايدىڭ مۋزىكاسى وقيعالاردىڭ شىنايىلىعىن اسەرلى ەتىپ، اركىمنىڭ سەزىمىن تەربەتەدى. قويۋشى وپەراتورلار ەۆگەني ماحمەتوۆ پەن قازبەك ءامىرجانوۆتىڭ شەبەرلىگى ءار كورىنىستى كوركەمدەي ءتۇستى.

كورەرمەندەر فيلمدەگى كەيىپكەرلەردىڭ جان دۇنيەسىمەن اكتەرلەردىڭ شىنايى ويىنى ارقىلى تانىسادى. اسىرەسە، سەرىك ءشارىپ پەن قاراقات باشانوۆا ءوز رولدەرىن شەبەرلىكپەن سومداپ، فيلمگە ەرەكشە جىلۋلىق سىيلادى. اكتەرلىك انسامبل قازاقستاندىق كينەماتوگرافتىڭ جوعارى دەڭگەيىن كەزەكتى رەت دالەلدەيدى.

ءداستۇرلى فەستيۆالدىڭ نەگىزىن قالاۋشى جانە ۇيىمداستىرۋشى – قر مادەنيەت جانە اقپارات مينيسترلىگى. كينوفەستيۆالدى تىكەلەي ۇيىمداستىرۋ شاكەن ايمانوۆ اتىنداعى «قازاقفيلم» ۇلتتىق كينوستۋدياسىنا جۇكتەلگەن.

باس دەمەۋشى: Bazis-A حالىقارالىق قۇرىلىس كومپانياسى.

ايتا كەتەيىك، ءىس-شاراعا KAZ Minerals كەن ءوندىرۋ كومپانياسى، Sarens Kazakhstan, Eurasian Resources Group (ERG), Salem Entertainment, Kinopark Theatres كينوتەاترلار جەلىسى، Astana Motors, «قازاقتەلەكوم» اق جانە A-Event KZ دەمەۋشىلىك ەتتى.

اقپاراتتىق سەرىكتەستەر: «حابار» اق، Qazaqstan تەلەارناسى، «نتك» تەلەارناسى، «ەۆروپا پليۋس كازاحستان»، «ەلدوراديو»، Qazaq Gazetteri, Egemen Qazaqstan, «كازاحستانسكايا پراۆدا»، «انتەننا كازاحستان»، «نوۆوە پوكولەنيە»، ORDA, «قازاقپارات» حاا، ArbatMedia, El.kz, Baq.kz, BaigeNews.

Abai.kz