پرەزيدەنت – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆقا قورعانىس ۆەدومستۆوسىنىڭ بيىلعى اتقارعان قىزمەتى تۋرالى ەسەپ بەرىلدى.

اقوردا حابارلاعانداي، مەملەكەت باسشىسىنا بولىمشەلەردىڭ جاۋىنگەرلىك دايىندىعى مەن قارۋلى كۇشتەر قاتارىنا كۇزگى شاقىرۋ ناۋقانىنىڭ ناتيجەلەرى، سونداي-اق اسكەري قىزمەتتەگى ءتارتىپ پەن قاۋىپسىزدىكتى نىعايتۋعا، اسكەري قىزمەتشىلەردىڭ الەۋمەتتىك مارتەبەسى مەن جالاقىسىن ارتتىرۋعا باعىتتالعان شارالار جونىندە باياندالدى.

ارميانىڭ جاۋىنگەرلىك الەۋەتىن كەزەڭ-كەزەڭىمەن كوتەرۋ جانە اسكەردى دايارلاۋدىڭ جاڭا تاسىلدەرىنە كوشۋ ماسەلەلەرىنە ايرىقشا نازار اۋدارىلدى.

رۋسلان جاقسىلىقوۆ مەملەكەتتىك قورعانىس تاپسىرىسىنىڭ ورىندالۋ بارىسى تۋرالى بايانداپ، اسكەردىڭ قارۋ-جاراق پەن تەحنيكانىڭ جاڭا ۇلگىلەرىمەن، اتاپ ايتقاندا، ۇشقىشسىز باسقارىلاتىن اۆياتسيالىق جۇيەلەرىمەن، راديوەلەكتروندىق كۇرەس كەشەندەرىمەن جاراقتاندىرىلىپ جاتقانىن حاباردار ەتتى. بۇدان بولەك، جاۋىنگەرلىك ماشينالاردى جانە بايلانىس قۇرالدارىن جاڭعىرتۋ، راتسيوناليزاتورلىق جۇمىستى، سونداي-اق اسكەري ينفراقۇرىلىمدى دامىتۋ ماسەلەلەرى قاراستىرىلدى.

قاسىم-جومارت توقاەۆ ەلىمىزدىڭ بىتىمگەرلىك كونتينگەنتىنىڭ بۇۇ اياسىندا گولان جوتالارىندا اتقارىپ جاتقان قىزمەتى ماڭىزدى ەكەنىن اتاپ ءوتتى.

كەزدەسۋ سوڭىندا جوعارعى باس قولباسشى قاسىم-جومارت توقاەۆ مينيسترگە وتاندىق قورعانىس كاسىپورىندارىمەن ءوزارا ىقپالداستىقتى جانداندىرۋ، اۋماقتىق قورعانىس پەن ارنايى وپەراتسيا كۇشتەرىن دامىتۋ، الەۋمەتتىك-قۇقىقتىق جۇمىستى كۇشەيتۋ جونىندە ناقتى مىندەتتەر جۇكتەدى.

Abai.kz