پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا توتەنشە جاعدايلار جونىندەگى ۆيتسە-مينيستر كەگەن تۇرسىنباەۆ ەلدى مەكەندەردى سۋ باسۋدان قورعاۋ بويىنشا قابىلدانعان شارالار تۋرالى ايتتى. وسىلايشا، بارلىق سۋ تاسقىنى قاۋىپتى ۋچاسكەلەردى، سونداي-اق گيدروتەحنيكالىق قۇرىلىستاردى باقىلاۋ كۇشەيتىلدى. ەل وڭىرلەرىندە 590 شاقىرىم قورعانىس بوگەتتەرى مەن بىلىكتەرى تۇرعىزىلىپ، جوندەلدى، 164 شاقىرىم درەناج جۇيەسى جوندەلدى جانە سالىندى، 800 شاقىرىمنان استام ارىقتار تازارتىلدى.

10 اقپاننان باستاپ قازاقستاندا تجم جەدەل سۋ تاسقىنىنا قارسى شتابى جۇمىس ىستەيدى، وعان ءارتۇرلى ۆەدومستۆولاردىڭ وكىلدەرى كىرەدى. وسىعان ۇقساس شتابتار سۋ تاسقىنىنىڭ قاۋىپسىز ءوتۋى جونىندەگى ءىس-قيمىلداردى ۇيلەستىرە وتىرىپ، وڭىرلەردە دە جۇمىس ىستەيدى.

سونىمەن قاتار، كەگەن تۇرسىنباەۆ ەلدىڭ وڭتۇستىگى مەن باتىسىندا سۋ تاسقىنى كەزەڭى اۋىر زارداپتارسىز اياقتالعانىن، ال اقمولا وبلىسىندا تۇرعىن ۇيلەردى سۋ باسقانىن اتاپ ءوتتى. بۇل وڭىردە حالىقتى ەۆاكۋاتسيالاۋ جانە استانا قالاسى مەن قاراعاندى وبلىسىنان، سونداي-اق تجم اسكەري بولىمدەرىنەن زارداپتاردى جويۋ ءۇشىن جەدەل تۇردە قوسىمشا كۇشتەر مەن قۇرالدار جىبەرىلدى.

ازاماتتاردى شۇعىل ەۆاكۋاتسيالاۋ جۇزەگە اسىرىلدى، اۆاريالىق-قۇتقارۋ جانە شۇعىل جۇمىستار جۇرگىزىلدى
سۋ تاسقىنىنىڭ كەلەسى كەزەڭى سولتۇستىك قازاقستان جانە شىعىس قازاقستان وبلىستارىندا كۇتىلەدى. الدىن الۋ ءىس-شارالارى بەلسەندى جالعاسىپ جاتىر. بۇعان دەيىن بۇل وڭىرلەرگە رەزەرۆتىك كۇشتەر مەن قۇرالدار، ونىڭ ىشىندە اسكەري بولىمدەر جىبەرىلگەن بولاتىن.

اقمولا وبلىسىنىڭ ۋاقىتشا كولىك قاتىناسىنسىز قالعان ەلدى مەكەندەرى ءۇشىن وتكەل ۇيىمداستىرىلدى، ازىق-تۇلىك قورى بار. قازىرگى ۋاقىتتا جەرگىلىكتى وزەندەردەگى سۋ دەڭگەيى تومەندەۋدە.

«سۋ تاسقىنى كەزەڭىنىڭ باسىنان بەرى ەلىمىز بويىنشا شامامەن 4,3 ملن تەكشە مەتر سۋ سورىلدى، 600 مىڭنان استام قاپشىق توسەلدى، 800 مىڭ شاقىرىمنان استام ارىق تازارتىلدى. الدىن الا 383 ادام ەۆاكۋاتسيالاندى»، — دەپ اتاپ ءوتتى ۆيتسە-مينيستر.

سونداي-اق، ول 51 مىڭنان استام اۋىل شارۋاشىلىعى جانۋارلارى قاۋىپسىز جەرلەرگە كوشىرىلگەنىن ايتتى. قازىرگى ۋاقىتتا بارلىعى قايتارىلدى.

توتەنشە جاعدايلار مينيسترلىگىنىڭ مالىمەتىنشە، جولداردا 176 سۋ تاسقىنى جانە 25 سۋ شايىلعان ۋچاسكەلەر تىركەلگەن. ماگيسترالداردىڭ 21 ۋچاسكەسىندەگى سۋ تاسقىنى باقىلاۋدا. مينيسترلىك سۋ تاسقىنىنا قارسى ءىس-شارالاردى ۇيلەستىرۋدى جانە كۇندەلىكتى مونيتورينگ جۇرگىزۋدى جالعاستىرۋدا.

Abai.kz