ەلورداداعى «استانالىق» جابىق بازارىندا «بايقوڭىر» اۋدانى اكىمدىگىنىڭ قولداۋىمەن «AMANAT» پارتياسى استانا قالالىق فيليالى ۇيىمداستىرعان قۇقىقتىق كومەك كۇنى ءوتتى. ءىس-شارا «قۇقىق كومەك» جانە «قارىزسىز قوعام» پارتيالىق جوبالارى اياسىندا ۇيىمداستىرىلدى.

اكتسيانىڭ ماقساتى – حالىققا بىلىكتى قارجىلىق جانە زاڭگەرلىك كومەك كورسەتۋ، سونداي-اق قارجىلىق ساۋاتتىلىق دەڭگەيىن ارتتىرۋ.

ءىس-شارا اياسىندا 50-گە جۋىق ادام تۇرعىن ءۇي باعدارلامالارىنان باستاپ دەنساۋلىق ساقتاۋ سالاسىنداعى قۇقىقتىق اسپەكتىلەرگە، مەنشىكتى رەسىمدەۋگە جانە جك جابۋعا دەيىنگى كوپتەگەن ماسەلەلەر بويىنشا تەگىن كەڭەس الدى.

ءىس-شاراعا وتباسى بانكىنىڭ، «قارىزسىز قوعام» جوباسىنىڭ، بجزق، ادىلەت دەپارتامەنتىنىڭ، ادۆوكاتتار القاسى مەن زاڭ پالاتالارىنىڭ وكىلدەرى، سونداي-اق ءماسليحات دەپۋتاتتارى قاتىستى.

«وتباسى بانكى بويىنشا، مەرزىمى وتكەن كرەديتتەر بويىنشا، زاڭ ماسەلەلەرى بويىنشا، جەر ۋچاسكەلەرىن رەسىمدەۋدەن باستاپ جك جابۋ تۋرالى ءارتۇرلى ماسەلەلەر كوتەرىلدى. سونداي-اق، ەسەپكە قالاي تۇرۋ كەرەك، مۇگەدەكتىكتى قالاي الۋعا بولادى، ءمامس-ءتى پايدالانۋ سەكىلدى دەنساۋلىق ساقتاۋ ماسەلەلەرى بويىنشا كوپتەگەن وتىنىشتەر بار. ءبىز وسىنداي ءىس-شارالاردى ەلوردانىڭ باسقا دا ساۋدا ۇيلەرىندە وتكىزۋدى جوسپارلاپ وتىرمىز»، – دەدى «AMANAT» پارتياسى استانا قالالىق فيليالىنىڭ ءباسپاسوز حاتشىسى سۇلتان مۇستافين.

استانا قالاسى اكىمدىگىنىڭ كوممۋنالدىق تۇرعىن ءۇي قورىنىڭ كونسۋلتاتسيا جانە قۇجات اينالىمى ءبولىمىنىڭ باسشىسى بەكجان سيپات وتىنىشتەردىڭ كوپشىلىگى تۇرعىن ۇيگە قاتىستى ەكەنىن اتاپ ءوتتى.

«بۇگىنگى تاڭدا كەزەكتە تۇرعاندار باسپانا الا الاتىن بىرقاتار باعدارلامالار بار. اتاپ ايتقاندا، كەيىننەن ساتىپ الىناتىن جالعا بەرىلەتىن تۇرعىن ءۇي الەۋمەتتىك وسال ساناتتار مەن كوپبالالى وتباسىلارعا ارنالعان»، – دەپ ءتۇسىندىردى ول.

ءوز كەزەگىندە جەكە سوت ورىنداۋشىسى الماز ارستانبەك وزىنەن كەڭەس العان ازاماتتاردىڭ اليمەنت جانە كرەديتتەر بويىنشا بەرەشەك سەكىلدى ماسەلەلەر كوپ ەكەنىنە نازار اۋداردى.

«ازاماتتار شارتتاردى زەرتتەمەي نەسيە الادى، ال مەرزىمى وتكەن كەزدە ولار بۇل تۋرالى ۇمىتادى. ناتيجەسىندە بانكتەر سوتقا جۇگىنەدى. قارىز ەكى ەسە ءوسۋى مۇمكىن. ماسەلەنى بانككە جۇگىنىپ، جاعدايدى ءتۇسىندىرىپ، ەرتەرەك شەشكەن دۇرىس»، – دەپ اتاپ ءوتتى ول.

ءىس-شاراعا قاتىسۋشىلاردىڭ ءبىرى جالعا بەرىلەتىن تۇرعىن ءۇي ماسەلەلەرى بويىنشا كەڭەس الۋ ءۇشىن ارنايى كەلگەن. ول ەلوردا ماڭىندا تۇراتىنىن جانە استاناعا كوشۋ مۇمكىندىگىن قاراستىرىپ جاتقانىن ايتتى.

«مۇندا بارلىق قاجەتتى اقپاراتتى تەگىن الۋعا بولاتىندىعى وتە ماڭىزدى»، – دەدى ول.

قازىرگى جاھاندانۋ داۋىرىندە ادامداردىڭ تۇتىنۋشىلىق دەڭگەيى ارتقان سايىن، قارىزعا تاۋەلدىلىك تە ءوسىپ كەلەدى. اسىرەسە ەلىمىزدە تۇرعىن ءۇي، كولىك، ءبىلىم الۋ ءتىپتى تۇرمىستىق تەحنيكا الۋعا نەسيە راسىمدەۋ – قالىپتى جاعدايعا اينالدى. الايدا بۇل ادەتتىڭ شەكتەن تىس كەڭ ەتەك الۋى قوعامنىڭ قارجىلىق السىزدىگىن كورسەتىپ وتىر. وسى تۇرعىدا «قارىزسىز قوعام» يدەياسىن قالىپتاستىرۋ – تەك جەكە ادامداردىڭ ەمەس، تۇتاس ۇلتتىڭ بولاشاعىنا وڭ اسەر ەتەتىن ماڭىزدى باستاما.

قارىزعا بايلانعان ءومىر قاۋىپتى مە دەگەن سۇراق اينالاسىندا تەرەڭ ويلاناتىن كۇيگە جەتكەنىمىز دە شىن.

قارىز الۋ – كەيدە قاجەتتىلىك، كەيدە ادەتكە اينالعان تاڭداۋ. كوپ ادام قارجىلىق جوسپارسىز ءومىر سۇرەدى. جالاقى تۇسپەي تۇرىپ-اق الىنعان نەسيەلەر مەن بولشەكتەپ تولەۋ جۇيەلەرى ادامداردى قارىز قاقپانىنا تۇسىرەدى. بۇل تەك ماتەريالدىق ەمەس، پسيحولوگيالىق اۋىرتپالىققا دا اكەلەدى – كۇيزەلىس، مازاسىزدىق، ءومىر ساپاسىنىڭ تومەندەۋى. ال قارجىلىق ەركىندىك – ناعىز بوستاندىق ەكەنىن ازاماتتار تۇسىنگەنى دۇرىس.

تۇيىندەسەك，قارىزسىز ادام – ەركىن ادام. ول تابىسىن تولىق ءوزى ءۇشىن جۇمساي الادى، بولاشاعىن جوسپارلاپ، تىنىش ءومىر سۇرەدى. قوعامدا وسىنداي ازاماتتار سانى ارتقان سايىن، ەل ەكونوميكاسى دا تۇراقتى، قاۋىپسىز بولا تۇسەدى. قارىزسىز قوعام – قارجىلىق تاۋەلسىزدىككە باستار جول.

Abai.kz