التايدى جۇتقاسىن، بىزگە دە اۋىز سالادى! باشقۇرت بەلسەندىسى ءپۋتيننىڭ استىرتىن جوسپارىن جاريا ەتتى...

پۋتين رەسەي قۇرامىنداعى ۇلتتىق رەسپۋبليكالاردى بولشەكتەۋ ۇستىندە. وسى جولى ماسكەۋدىڭ نازارىنا التاي رەسپۋبليكاسى مەن باشقۇرتستان ىلىككەن دەپ جازادى Ertenmedia.kz. باشقۇرت بەلسەندىسى رۋسلان عابباسوۆتىڭ ايتۋىنشا، التاي رەسپۋبليكاسىنىڭ اتا زاڭىنا جەرگىلىكتى دەپۋتاتتار تاراپىنان قاۋىپتى تۇزەتۋ ەنگىزىلگەن.

رەسپۋبليكانىڭ كونستيتۋتسياسىنان «اۋماقتىق تۇتاستىق» اتتى ۇعىم الىنىپ تاستالعان. كرەمل التاي رەسپۋبليكاسىن كورشى التاي ولكەسىمەن بىرىكتىرىپ، ۇلتتىق مارتەبەسىن تۇبەگەيلى جويماق.

بۇل قادام جۇزەگە اسسا، التايلىقتاردىڭ سانى ازشىلىققا اينالىپ، ساياسي ىقپالى السىرەيدى. قازىرگى تاڭدا التاي رەسپۋبليكاسىندا 70 مىڭعا جۋىق التايلىق تۇرادى. ولار جالپى حالىقتىڭ شامامەن 35 پايىزى. ال ورىس حالقىنىڭ ۇلەسى 55 پايىز نەمەسە 115 مىڭ ادام. وسىنداي قاتىناستا التايلىقتار بيلىككە ارالاسىپ، ۇلتتىق مادەنيەتىن، ءتىلىن قورعاۋعا مۇمكىندىك تاۋىپ وتىر. ال التاي ولكەسىندەگى جاعداي مۇلدە بولەك. وندا التايلىقتاردىڭ ۇلەسى نەبارى 0,1 پايىز (شامامەن 3 مىڭ ادام), ورىستاردىڭ ۇلەسى 95 پايىز (2 ميلليوننان استام).

ەگەر التاي رەسپۋبليكاسى وسى ولكەنىڭ قۇرامىنا قوسىلسا، التايلىقتاردىڭ ۇلەسى 3 پايىزعا دەيىن تومەندەپ، ساياسي جانە مادەني ىقپالىنان ءبىرجولا ايىرىلىپ تىنادى.

عابباسوۆتىڭ ايتۋىنشا، كرەمل ۇلتتىق رەسپۋبليكالاردى رەسەيدىڭ باسقا ايماقتارىمەن بىرىكتىرىپ، فەدەراتسيانىڭ قابىرىن قازۋدا. التاي رەسپۋبليكاسىنا قاتىستى جوسپار ءساتتى ورىندالسا، بۇل ءادىس وزگە دە ۇلتتىق رەسپۋبليكالارعا قولدانىلاتىن بولادى.

«بۇعان دەيىن باشقۇرتستاندى چەليابى وبلىسىمەن بىرىكتىرۋ جوسپارى ايتىلعان. كرەملدىڭ ويى جۇزەگە اسسا، باشقۇرتستانداعى بايىرعى ۇلتتىڭ ۇلەسى 31,5 پايىزدان 21 پايىزعا دەيىن كەمىپ، ورىس حالقىنىڭ ۇلەسى 60 پايىزدان اسىپ كەتەدى. باشقۇرتتار ساياسي، مادەني ىقپالىن جوعالتىپ، ءوز قۇقىعىن قورعاي المايتىن حالگە تۇسەدى»، – دەيدى رۋسلان عابباسوۆ.

بەلسەندىنىڭ پىكىرىنشە، رەسەيدەگى ۇلتتىق رەسپۋبليكالار تىلدىك، مادەني جانە ساياسي قۇقىعىنان ايىرىلۋدىڭ الدىندا تۇر.

Abai.kz