وزبەكستاندا 2025 جىلى اجىراسۋ دەڭگەيى جوعارى بولىپ قالا بەرەدى. بۇل تۋرالى Upl.uz وزبەكستان رەسپۋبليكاسى جوعارعى سوتىنىڭ دەرەكتەرىنە سىلتەمە جاساپ حابارلادى.

وزبەكستاندا كۇن سايىن جۇزگە جۋىق ەرلى-زايىپتى وتباسىلىق قارىم-قاتىناسىن رەسمي تۇردە توقتاتادى. بيىلعى العاشقى ءۇش ايدا سوتتار اجىراسۋ تۋرالى ىستەردىڭ ەداۋىر بولىگىن قارادى. سونىمەن قاتار جالپى سوماسى تريلليونداعان سۋمعا باعالانعان ءىرى كولەمدەگى اقشانى ماجبۇرلەپ ءوندىرىپ الۋ تۋرالى شەشىم شىعاردى.

2025 جىلدىڭ قاڭتارى مەن ناۋرىزى ارالىعىندا ازاماتتىق سوتتار نەكەنى بۇزۋ تۋرالى 17 مىڭنان استام ارىزدى قارادى. ونىڭ ىشىندە 9 000 ءوتىنىش قاناعاتتاندىرىلىپ، ناتيجەسىندە اجىراسۋ زاڭدى تۇردە اياقتالدى. 6 مىڭعا جۋىق تالاپ-ارىزدى سوت ورگاندارى ءارتۇرلى نەگىز بويىنشا قاناعاتتاندىرۋدان باس تارتسا، 2 مىڭنان استام ءىس نە سوتتا قاراۋسىز قالدى، نە باسقا پروتسەسسۋالدىق سەبەپتەرمەن توقتاتىلدى. ۇسىنىلعان دەرەكتەر قوعامدا بولىپ جاتقان الەۋمەتتىك ترانسفورماتسيالاردى كورسەتەتىن اجىراسۋ پروبلەماسى ەلدىڭ سوت جۇيەسى ءۇشىن وزەكتى بولىپ قالا بەرەتىنىن كورسەتەدى.

رەسپۋبليكا سوتتارى نەكەنى بۇزۋ تۋرالى ىستەردى قاراۋمەن قاتار مىندەتتى تولەمدەردى ءوندىرىپ الۋ بويىنشا ءىس-شارالاردى بەلسەندى جۇرگىزدى. وسى جىلدىڭ باسىنان بەرى ازاماتتاردى جالپى سوماسى 2 تريلليون سۋمنان (1 اقش دوللارى — 12 970,49 سۋم) اساتىن تولەمدەردى تولەۋگە مىندەتتەيتىن 299,4 مىڭعا جۋىق سوت بۇيرىعى شىعارىلدى. بۇل تولەمدەردىڭ قۇرىلىمىنا كامەلەتكە تولماعان بالالاردى ۇستاۋعا ارنالعان اليمەنت، جالاقى بويىنشا بەرەشەك جانە باسقا دا بالاما تولەمدەر، سونداي-اق تۇتىنىلعان كوممۋنالدىق قىزمەتتەر ءۇشىن بەرەشەك كىرەدى. سونىمەن قاتار بۇل ساناتقا بورىشكەرلەر مويىنداعان ەرىكتى جازباشا كەلىسىمدەرگە نەگىزدەلگەن تالاپتار جاتادى.

Abai.kz