وڭتۇستىك كورەياداعى پرەزيدەنت سايلاۋىندا وپپوزيتسيالىق دەموكراتيالىق پارتيا كانديداتى لي چجە مەن جەڭىسكە جەتتى. ول سايلاۋشىلاردىڭ 50% داۋىسىن العان. ونىڭ نەگىزگى قارسىلاسى – باسقارۋشى "حالىق كۇشى" پارتياسىنىڭ كانديداتى كيم مۋن سۋعا سايلاۋشىلاردىڭ 41% داۋىس بەرگەن.

سايلاۋ ءۇش كۇنگە سوزىلعان، تىركەلگەن سايلاۋشىلاردىڭ 80% داۋىس بەرگەن. بۇل 1997 جىلدان بەرگى ەڭ جوعارى كورسەتكىش.

سايلاۋالدى ناۋقان كەزىندە لي چجە مەن قارسىلاسى كيم مۋن سۋدى جانە باسقارۋشى پارتيا وكىلدەرىن بيلىكتەن شەتتەتىلگەن يۋن سوك ەلگە بيلىكتى ۇستاپ قالۋعا كومەكتەستى دەپ ايىپتاعان.

لي چجە مەن 2022 جىلى دا پرەزيدەنت سايلاۋىنا قاتىسىپ، بىراق يۋن سوك ەلدەن 1% ايىرماشىلىقپەن جەڭىلىپ قالعان.

وعان الدىنعى پرەزيدەنت سايلاۋىندا بىرنەشە قىلمىس بويىنشا ايىپ تاعىلعان. اتاپ ايتقاندا، سايلاۋ زاڭناماسىن بۇزدى جانە 2019 جىلى سوت پروتسەسى كەزىندە كۋاگەردى جالعان كۋالىك بەرۋگە ماجبۇرلەدى دەپ ايىپتالعان. ەگەر سوت ونى كىنالى تانىسا، وكىلەتىن تاستاۋعا تۋرا كەلەدى.

بىلتىر جەلتوقساندا سول كەزدەگى پرەزيدەنت يۋن سوك ەل ەلدە اسكەري جاعداي ەنگىزىپ، اسكەريلەرگە پارلامەنتتى باقىلاۋعا الۋعا بۇيرىق بەرگەن. ونىڭ بۇل ارەكەتى ءساتسىز اياقتالىپ، ىزىنشە ول بيلىكتەن كەتىرىلىپ، ساياسي داعدارىس ورنادى.

ءساۋىر ايىندا كونستيتۋتسيالىق سوت يۋن سوك ەلدى بيلىكتەن كەتىرۋ تۋرالى شەشىمدى قولدادى. وسىدان كەيىن ەلدە مەرزىمىنەن بۇرىن پرەزيدەنت سايلاۋى تاعايىندالىپ لي چجە مەنگە بيلىك باسىنا كەلۋگە جول اشىلدى.

شەتەل باسىلىمدارى ونى ساياسي تۇراقسىزدىقتان پايدالانىپ جوعارى بيلىككە جەتكەن باعىزور ساياساتكەر دەپ باعالاۋدا.

لي چجە مەن 1963-جىلى قاراپايىم وتباسىندا دۇنيەگە كەلگەن. جەتى بالانىڭ بەسىنشىسى ەكەن. تۇرمىستارى تومەن بولعاندىقتان ول كامەلات جاسقا تولماي ورتا مەكتەپتى بىتىرمەي-اق ەڭبەككە ارالاسقان. 13 جاسىندا ساۋساقتارى زاۋىت ستانوگىنا جانشىلىپ زاقىمدانعان. 1980-جىلى 27 جاسىندا ۋنيسەرسيتەتكە ءتۇسىپ، 1986-جىلى ادۆاكات كۋالىگىن العان. 20 جىل قۇقىق قورعاۋشى بولىپ جۇمىس اتقارعان.

2005-جىلى قازىرگى دەموكراتيالىق پارتياعا مۇشە بولعان. ونىڭ كەدەي وتباسىنان شىققانى ساياسي باسەكەلەستەرى اراسىندا كۇلكىگە اينالعانمەن، جۇمىسشالار مەن جوعارى تاپتاعى ساياساتكەرلەردى جەك كورەتىندەر وعان قولداۋ بىلدىرگەن. وسى جولعى سايلاۋدا ول تابىسى تومەندەرگە تۇراقتى ايلىق تولەپ، باي مەن كەدەيدىڭ اراسىن تەڭەستىرۋگە ۋادە بەرگەن. امەريكامەن ساۋدانى دامىتۋعا دا نيەت بىلدىرگەن.

Abai.kz