مەملەكەت باسشىسى ەقىۇ-نىڭ ءىس باسىنداعى توراعاسى ەلينا ۆالتونەندى قابىلدادى.

قاسىم-جومارت توقاەۆ ۇيىمدى ايماقتىق جانە جاھاندىق قاۋىپسىزدىك سالاسىنداعى كۇردەلى كەزەڭدە باسقارىپ وتىرعان ەلينا ۆالتونەننىڭ قىزمەتىنە قولداۋ ءبىلدىردى. بۇل تۋرالى اقوردانىڭ ءباسپاسوز قىزمەتى حابارلادى.

«بيىل ءبىز حەلسينكي قورىتىندى اكتىسىنىڭ 50 جىلدىعىن اتاپ وتەمىز. جارتى عاسىر وتسە دە، بۇل قۇجات ەگەمەندىك، اۋماقتىق تۇتاستىق جانە ادام قۇقىقتارىن قۇرمەتتەۋ قاعيداتتارىن بەكىتە وتىرىپ، ەۋروپالىق قاۋىپسىزدىكتىڭ نەگىزى بولىپ قالا بەرمەك. قازاقستان وسى قۇندىلىقتاردى بەرىك ۇستانادى»، – دەدى قاسىم-جومارت توقاەۆ.

پرەزيدەنت قازاق-فين بايلانىستارىنىڭ جاي-كۇيىنە جوعارى باعا بەردى. فينليانديانى استانانىڭ سكانديناۆيا ايماعىنداعى بۇرىننان كەلە جاتقان سەرىكتەسى دەپ اتاپ، قارىم-قاتىناستى ودان ءارى جانداندىرۋعا ءازىر ەكەنىن ءمالىم ەتتى.

ەلينا ۆالتونەن ەقىۇ قازاقستانمەن جانە ورتالىق ازيامەن بايلانىستى دامىتۋعا باسا ءمان بەرەتىنىنە توقتالدى.

«قازاقستاننىڭ حالىقارالىق ارەناداعى ابىرويىن بەكىتۋگە ۇلكەن كۇش-جىگەر جۇمساپ وتىرسىز. سونىڭ ارقاسىندا ەلىڭىز ءوزىن ايماقتا جانە الەمدە ىقپالدى ورتا دەرجاۆا رەتىندە تانىتتى. قازاقستان ەقىۇ سەكىلدى ۇيىمداردىڭ جۇمىسىنا بەلسەندى اتسالىسۋ ارقىلى جاھاندىق دەڭگەيدەگى بەدەلىن نىعايتا بەرەدى. ءبىز ءسىزدىڭ قازىرگىدەي كۇردەلى كەزەڭدەگى، اسىرەسە، ەكونوميكا جانە ەكولوگيا سالالارىنداعى قىزمەتىڭىزدى جوعارى باعالايمىز. ەقىۇ-نىڭ استاناداعى باعدارلامالىق كەڭسەسىمەن ىنتىماقتاستىق ايتارلىقتاي تابىستى دامىپ كەلەدى»، – دەدى ەقىۇ-نىڭ ءىس باسىنداعى توراعاسى.

كەزدەسۋ سوڭىندا مەملەكەت باسشىسى فينليانديا پرەزيدەنتى الەكساندر ستۋببقا سالەم جولداپ، ەكى ەل اراسىنداعى دوستىق پەن ىنتىماقتاستىقتى نىعايتۋ ءۇشىن تىعىز ىقپالداستىققا دايىن ەكەنىن راستادى.

Abai.kz