سىبايلاس جەمقورلىققا قارسى قىزمەت ىزدەۋدە جۇرگەن تۇلعادان قۇنى 2,3 ملرد تەڭگەدەن استام مۇلكىن تاركىلەدى

سىبايلاس جەمقورلىققا قارسى قىزمەت مەملەكەت باسشىسىنىڭ تاپسىرماسىن ورىنداۋ اياسىندا اكتيۆتەردى قايتارۋ جانە كەلتىرىلگەن زالالدى وتەۋ بويىنشا جۇمىستى جالعاستىرۋدا.

ونى ىسكە اسىرۋدىڭ ءبىر ءتاسىلى زاڭسىز جولمەن الىنعان مۇلىكتى سوتقا دەيىن تاركىلەۋ بولىپ تابىلادى. ول حالىقارالىق ىزدەستىرۋگە جاريالانعان نە ولارعا قاتىستى راقىمشىلىق جاساۋ اكتىسىنىڭ سالدارىنان، ەسكىرۋ مەرزىمىنىڭ وتۋىنە نەمەسە قايتىس بولۋىنا بايلانىستى قىلمىستىق قۋدالاۋ توقتاتىلعان ادامدارعا قولدانىلادى.

سىبايلاس جەمقورلىققا قارسى قىزمەت قابىلداعان شارالاردىڭ ناتيجەسىندە 2022 جىلدان بەرى حالىقارالىق ىزدەۋدە جۇرگەن جانە اقشانى زاڭداستىرۋعا قاتىسى بار دەپ كۇدىككە ىلىنگەن تۇلعانىڭ اقشالاي قاراجاتى مەن مۇلىكتىك اكتيۆتەرىنىڭ قىلمىستىق جولمەن الىنعانى دالەلدەندى.

ول جىلجىمالى جانە جىلجىمايتىن مۇلىكتىڭ قىمبات نىساندارىن، ونىڭ ىشىندە جۇبايىنا رەسىمدەلگەن نىسانداردى ساتىپ الۋ ءۇشىن شامامەن 1,5 ملرد تەڭگە زاڭعا قايشى اقشانى پايدالانعان. ولاردىڭ قاتارىنا الماتى قالاسى مەن الماتى وبلىسىنداعى ليۋكس اۆتوموبيل، پاتەر، جەر ۋچاسكەلەرى، تۇرعىن ۇيلەر مەن قۇرىلىستار جاتادى.

قارجىلىق تەرگەۋ قوسىمشا 1,7 ملن اقش دوللارىن (872 ملن تەڭگەدەن استام) جانە قازاقستاننىڭ ەكىنشى دەڭگەيدەگى بانكتەرىندەگى ايىپتالۋشى مەن ونىڭ جۇبايىنىڭ شوتتارىندا 47 ملن تەڭگە انىقتادى. ولار قىلمىس جاساۋ كەزەڭىندە الىنعان جانە ولاردىڭ رەسمي تابىستارىنا سايكەس كەلمەيدى.

اعىمداعى جىلعى 16 ماۋسىمداعى سوت قاۋلىسىمەن اقشالاي قاراجات پەن مۇلىكتىك وبەكتىلەر مەملەكەت كىرىسىنە تاركىلەندى.

جالپى، جىل باسىنان بەرى سىبايلاس جەمقورلىققا قارسى قىزمەت قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ (جىلىستاتۋ) فاكتىلەرى بويىنشا وتىزعا جۋىق قىلمىستىق ءىستى تەرگەۋدى باستادى. ءىستىڭ ءبىر بولىگى سوتقا جىبەرىلىپ، ايىپتاۋ ۇكىمى شىعارىلدى.

زاڭعا قايشى تابىستار تۋىستارىنىڭ، اففيليرلەنگەن كومپانيالاردىڭ اتىنان زاڭدى وپەراتسيالار رەتىندە بۇركەمەلەنەتىن، قىمبات مۇلىكتى، كريپتوۆاليۋتالاردى، باعالى قاعازداردى، ونىڭ ىشىندە ينۆەستيتسيالىق قۇرالداردى قولدانا وتىرىپ ساتىپ الۋدا پايدالانىلاتىن جاعدايلارعا ەرەكشە نازار اۋدارىلادى.

مىسالى، سپورتتى دامىتۋعا بولىنگەن بيۋدجەت قاراجاتىنان 745 ملن تەڭگەدەن استام سومانى جىمقىرۋ فاكتىسى بويىنشا قىلمىستىق جاۋاپكەرشىلىككە تارتىلىپ جاتقان بۇرىنعى لاۋازىمدى ادامنىڭ قارجىلىق اعىندارىنا جۇرگىزىلگەن تالداۋ ناتيجەسىندە، ونىڭ قىلمىستىق جولمەن الىنعان قاراجاتقا ەكى قىمبات اۆتوكولىك ساتىپ العانى جانە 240 ملن تەڭگەدەناستام سومانى جوعارى تابىس الۋ ماقساتىندا ءوزى باقىلاۋىنداعى كومپانيانىڭ شوتىنا اۋدارعانى انىقتالدى.

تاعى ءبىر جاعداي، كۇدىكتىلەر جەكە كاسىپكەر بولىپ تابىلاتىن تۋىستارى ارقىلى ينفراقۇرىلىمدىق، قالا قۇرىلىسى جوبالارىن ىسكە اسىرۋعا بيۋدجەتتەن بولىنگەن 237 ملن تەڭگەدەن استام قاراجاتتى قولما-قول اقشاعا اينالدىرىپ، ولاردان پاتەرلەر، اۆتوكولىكتەر جانە باسقا دا مۇلىكتەر ساتىپ العان.

سوتتىڭ سانكتسياسىمەن مۇلىكتىك وبەكتىلەرگە تىيىم سالىندى.

قىلمىستىق ءىس جۇرگىزۋ كودەكسىنىڭ 201-بابىنا سايكەس تەرگەۋ مۇددەسىندە وزگە دەاقپارات جاريا ەتىلۋگە جاتپايدى.

اكتيۆتەردى قايتارۋ بويىنشا جۇمىس جالعاسۋدا.

Abai.kz