بۇگىن تاڭەرتەڭ يرانداعى اردەبيل قالاسىنان اكتريسا سايا ابباسپۋر جازىپتى، سۋرەتتەرىن دە جىبەرگەن ەكەن... 2018 جىلى اقتاۋداعى حالىقارالىق فەستيۆالدە تانىسقانبىز. "سەن مەنىڭ قولىمنان ۇستاعانسىڭ..." سپەكتاكلىن كورسەتكەن. باستى رولدە سايا ابباسپۋر وينادى. ونىڭ ساحناداعى ويىنى، پلاستيكاسى، ءۇنى، قوزعالىسى، كوزقاراسى ءالى ەسىمدە... تالانتتى دا كورىكتى اكتريسا.

س.ەسەنين جىرلايتىن ناعىز "شاگانە، تى مويا شاگانە".

مەن يراننىڭ فيلمدەرىن بىلگەنمەن، تەاتر ونەرىنەن حابارىم جوق-تى... باياعىدا كينوفەستيۆالگە بارعانىمدا تەگەران، يسفاحان سياقتى ۇلكەن تاريحي قالالارىن كورگەنمەن، اردەبيلگە بارعان ەمەسپىز. يراننىڭ سولتۇستىگىندە ورنالاسقان بۇل قالا — سابلان، تالەش، بوزعۇش تاۋلارىنىڭ ەتەگىندە. قالا شەيح سەفي اد- دين اردەبيلدىڭ اتىمەن اتالعان. سەۆەفيد مەملەكەتىنىڭ ىرگەسىن قالاعان شاح 1334 جىلى وسى جەردە قايتىس بولعان سوڭ قالا وسىلاي اتالعان. يۋنەسكو-عا كىرەتىن ونىڭ ماۆزولەيى ءالى كۇنگە ساقتالعان. اردەبيلدە قازىر 600 مىڭعا جۋىق حالىق تۇرادى. باسىم كوپشىلىگى شيتتەر. تەاترلار مەملەكەت قاراۋىندا.

بۇگىن سول يراندا تۇراتىن اكتريسا سايا ابباسپۋردىڭ ماعان جازعان حاتىن ءبولىسۋدى ءجون كوردىم.

سايانىڭ حاتىن سول قالپىندا سالىپ وتىرمىن:

— تالعات اعا! قالايسىز؟..

...قازىر يراندا سوعىس ءجۇرىپ جاتىر، ەلدىڭ جاعدايى وتە اۋىر. ءبىز ءبارىمىز

قورقىنىش پەن بەلگىسىزدىكتە ءومىر ءسۇرىپ وتىرمىز. بۇگىن ءتىرىمىز، ءومىر ءسۇرىپ جاتىرمىز، بىراق ەرتەڭ نە بولاتىنى بەلگىسىز — امان قالامىز با، جوق پا، ەشكىم بىلمەيدى. ەندى ءبىزدىڭ جانىمىزعا ەشتەڭە قۋانىش اكەلمەيدى، ءتىپتى تەاتر دا ءمانسىز بولىپ قالدى. ينتەرنەت ءجيى وشىرىلەدى. حالىق ءبىر قالادان ەكىنشى قالاعا ۇدەرە كوشۋدە. باعالار كۇن ساناپ شارىقتاپ بارادى. يران حالقىنىڭ ءومىرى قاۋىپكە تولى. ءبىز ءۇشىن، يران ءۇشىن دۇعا ەتىڭىزدەر...

مەنى ۇمىتپاعاندارىڭىز ءۇشىن كوپ راحمەت! سوعىس بىتكەن سوڭ سىزدەرگە جاقسى تەاترمەن كەلەمىز دەپ ۇمىتتەنەمىن. مەن سىزدەردى ءجيى ويلايمىن... مەن قازاقستانمەن جانە سىزدەرمەن بولعان ەستەلىكتەرىمدى ەشقاشان ۇمىتپايمىن. ولار مەنىڭ ومىرىمدەگى ەڭ جاقسى كۇندەر...

كورەرمەندى ونەرىمەن، كوركىمەن، كوركەم مىنەزىمەن، اقىل-پاراساتىمەن باۋراعان سايا سۇلۋ قىپ-قىزىل ءورتتىڭ ىشىندە ءجۇرىپ ماعان حات جولداعانىنا ءارى قۋاندىم، ءارى قوبالجىدىم. سوعىس دەگەن زۇلمات اياقاستى ەكەن-اۋ... بەيبىت كۇننىڭ قادىرىن وسىندايدا ويلايسىڭ... ەرتەڭگە الاڭدايسىڭ... ونىڭ بەتىن ارى قىلسىن!..

سايا، امان بولىڭدار! مەنىڭ بىلەتىنىم، سوعىس توقتايدى. بەيبىت ءومىر قايتا كەلەدى. كۇن مەن تۇندەي جاقسىلىق پەن جاماندىق قاتار جۇرەدى. جانە الەمدى مەيىرىم مەن ماحاببات، ونەر مەن ولەڭ قۇتقاراتىنىنا سەنەم. ويتكەنى، ونەردىڭ ميسسياسى — ءومىردى جاقسىلىق پەن سۋيىسپەنشىلىكتى، ارايلاپ اتقان اق تاڭ مەن جۇلدىزدى اسپاندى جىرلاۋ... سەن سونداي قىزسىڭ!..

سايا، ءبىز سەندەرگە اللادان تەك، سابىرلىلىق پەن اماندىق تىلەيمىز! ءوزىڭ ايتقانداي، دۇعادا بولامىز...

تالعات تەمەنوۆ

Abai.kz