ماجىلىستەگى VIII شاقىرىلىمىنىڭ III سەسسياسىندا اتقارىلعان جۇمىس بۇگىن «AMANAT» پارتياسى فراكتسياسىنىڭ جيىنىندا قورىتىندىلاندى. دەپۋتاتتار «حالىقپەن بىرگە!» سايلاۋالدى باعدارلاماسىنىڭ جۇزەگە اسىرىلۋ بارىسىن، سونداي-اق حالىق قالاۋلىلارىنىڭ سايلاۋشىلارمەن كەزدەسۋ ماقساتىنداعى وڭىرلەرگە الداعى ساپارىنا دايىندىق ماسەلەلەرىن تالقىلادى.

سۋرەت: amanatpartiasy.kz سايتىنان الىندى.

ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆاتاپ وتكەندەي، وتكەن سەسسيادا فراكتسيا مۇشەلەرى 62 زاڭعا باستاماشىلىق ەتتى. VIII شاقىرىلىمدا زاڭ جوبالارىنا بارلىعى 5300-دەن استام وزگەرتۋلەر مەن تۇزەتۋلەر ەنگىزىلدى. ءماجىلىستىڭ جالپى وتىرىستارىندا 626 دەپۋتاتتىق ساۋال جولداندى. بۇدان بولەك، بيۋدجەتتى ءاربىر بەكىتۋ كەزىندە دەپۋتاتتار وڭىرلەردە ينفراقۇرىلىمدىق جوبالاردى جۇزەگە اسىرۋ ءۇشىن 1,5 تريلليون تەڭگەگە دەيىن تۇزەتۋلەر ەنگىزىلۋىنە قول جەتكىزدى. وسىلايشا، ناقتى سايلاۋالدى ۋادەلەر قارجىمەن قامتاماسىز ەتىلۋدە.

سۋرەت: amanatpartiasy.kz سايتىنان الىندى.

«AMANAT» پارتياسى ادىلەتتى قازاقستاندى قۇرۋ جولىنداعى رەفورمالاردى جۇيەلى جۇزەگە اسىرۋدا. وسى ۇشىن بىز مەملەكەت باسشىسىنىڭ باستامالارىنا زاڭنامالىق قولداۋ كورسەتىپ كەلەمىز. ونىڭ بارلىعى ەكونوميكا ءوسىمىن قامتاماسىز ەتۋگە جانە قازاقستاندىقتاردىڭ ءال-اۋقاتىن جاقسارتۋعا باعىتتالعان. جالپى، ماجىلىستە قابىلدانعان ءاربىر زاڭ «AMANAT» فراكتسياسى دەپۋتاتتارىنىڭ بەلسەندى اتسالىسۋىمەن ازىرلەندى دەۋگە بولادى»، – دەدى ول.

ءماجىلىس سپيكەرى دەپۋتاتتار زاڭ شىعارۋ جۇمىسى بارىسىندا مەملەكەتتىڭ حالىق الدىنداعى الەۋمەتتىك مىندەتتەمەلەرىن ورىنداۋىنا، ونىڭ ىشىندە اۋىلداردى اۋىز سۋمەن قامتاماسىز ەتۋ، الەۋمەتتىك مەديتسينالىق ساقتاندىرۋ جۇيەسىن رەفورمالاۋ، تۇرعىن ءۇي قاتىناسىن جەتىلدىرۋگە باسا نازار اۋدارعانىن اتاپ ءوتتى. بۇعان قوسا، جاڭادان بيۋدجەت، سۋ جانە سالىق كودەكستەرى قابىلداندى.

سۋرەت: amanatpartiasy.kz سايتىنان الىندى.

ەرلان قوشانوۆ ازاماتتاردىڭ ناقتى ماسەلەلەرىن شەشۋگە باعىتتالعان پارتيالىق جوبالاردى جۇزەگە اسىرۋعا ەرەكشە نازار اۋداردى. اتاپ ايتقاندا، «جەر اماناتى» كوميسسياسى 12,5 ميلليون گەكتار جەردى مەملەكەت مەنشىگىنە قايتاردى. قارىز قامىتىن كيگەن 500 مىڭنان استام ادامعا «قارىزسىز قوعام»جوباسى اياسىندا كومەك كورسەتىلدى. مەملەكەت باسشىسىنىڭ تاپسىرماسى بويىنشا، بۇل جوبا جالپىۇلتتىق سيپاتقا يە بولدى. 2000-عا جۋىق اكىم «اكىمدەر مەكتەبى» ارنايى جوباسى اياسىندا وقۋدان ءوتتى. پارتيانىڭ وسى جانە وزگە دە باستامالارى قوعامدا كەڭ قولداۋ تاپتى. پارتيا توراعاسى اتاپ وتكەندەي، دەپۋتاتتار مۇنىڭ ءبارىن ازاماتتارعا بەلسەندى تۇردە تۇسىندىرۋگە تيىس.

ءوز كەزەگىندە، ماجىلىستەگى «AMANAT» پارتياسى فراكتسياسى جەتەكشىسىنىڭ ورىنباسارى پاۆەل كازانتسەۆ بىلتىر پارتيانىڭ سايلاۋالدى باعدارلاماسىن جۇزەگە اسىرۋ بويىنشا جول كارتاسى پۋنكتتەرىنىڭ ۇشتەن ەكىسى ورىندالعانىن اتاپ ءوتتى. ماسەلەن، ازاماتتىق قىزمەتشىلەردىڭ جەكەلەگەن ساناتتارىنىڭ جالاقىسى 20%-عا وستى، مەديانالىق تابىستان كەدەيلىك شەگىن انىقتاۋ ءۇشىن جاڭا ەسەپتەۋ جۇيەسى ەنگىزىلدى، قاراعاندى وبلىسىندا كەنشىلەر مەن مەتاللۋرگتەر ءۇشىن جەڭىلدىكپەن بەرىلەتىن يپوتەكانىڭ ارنايى باعدارلاماسى ىسكە قوسىلدى، باتىس قازاقستان وبلىسىنداعى 70 شالعاي ەلدى مەكەنگە ينتەرنەت تارتىلدى جانە ت.ب.

ءماجىلىس سپيكەرى فراكتسيا دەپۋتاتتارىنا شەكارا ماڭىنداعى اۋدانداردى، ساياجاي كووپەراتيۆتەرىن دامىتۋ ماسەلەلەرى بويىنشا زاڭ جوبالارىن ازىرلەۋ جۇمىسىن جەدەلدەتۋدى تاپسىردى. ولار كەلەسى سەسسيادا ماجىلىسكە ەنگىزىلەدى.

سۋرەت: amanatpartiasy.kz سايتىنان الىندى.

سونىمەن قاتار اۋىلدىق اۋماقتاردى كەشەندى دامىتۋعا، اۋىلدىق جەرلەردەگى بىلىم بەرۋ، دەنساۋلىق ساقتاۋ سالالارىن جاڭعىرتۋعا جانە ينكليۋزيۆتى ورتانى قامتاماسىز ەتۋگە باعىتتالعان «Baquatty audan» پيلوتتىق جوباسىنىڭ تاجىريبەسىن بىرقاتار اۋداندا تاراتۋ جوسپارلانۋدا. سونداي-اق دەپۋتاتتار جاستار جۇمىسسىزدىعى ماسەلەسىن شەشۋ بويىنشا جەكە جوبا ازىرلەۋگە نيەتتى. بۇل – اسىرەسە جۇمىسشى ماماندىقتارى جىلى وتە وزەكتى.

جيىن سوڭىندا ءماجىلىس سپيكەرى وڭىرلەرگە الداعى ساپار كەزىندە دەپۋتاتتارعا جۇكتەلەتىن بىرقاتار مىندەتتى ايقىندادى. ساپار بارىسىندا دەپۋتاتتار وندىرىستىك جانە الەۋمەتتىك نىسانداردى ارالاپ، ەڭبەك ۇجىمدارىمەن كەزدەسەدى. سونداي-اق ازاماتتاردىڭ جەكە ماسەلەلەرى بويىنشا قابىلداۋلار وتكىزەدى. شالعايداعى ەلدى مەكەندەرگە ەرەكشە نازار اۋدارىلادى. حالىق قالاۋلىلارى جاڭادان قابىلدانعان زاڭداردىڭ ءىس جۇزىندە قالاي جۇمىس ىستەيتىنىن جانە ولاردىڭ جەرگىلىكتى جەردە تۇرعىندار سۇرانىسىنا قانشالىقتى جاۋاپ بەرەتىنىن زەرتتەيدى. سونداي-اق دەپۋتاتتار جاڭادان قابىلدانعان زاڭدار تۋرالى ايتىپ، ازاماتتار كوتەرگەن ماڭىزدى ماسەلەلەرمەن تانىسادى. بولاشاقتا دەپۋتاتتار ساپار بارىسىندا جينالعان بارلىق اقپاراتتى زاڭ شىعارۋ جۇمىسى كەزىندە پايدالانادى.

«AMANAT» پارتياسىنىڭ ءباسپاسوز قىزمەتى

سۋرەتتەردى تۇسىرگەن: ءالي عالىم

Abai.kz