ءماجىلىس پەن سەنات قاراۋىنان وتكەن جاڭا سالىق كودەكسىنە جاقىندا پرەزيدەنت قول قويماق. ال جاڭا سالىق كودەكسىندە نە وزگەردى؟ 

ققس (قوسىلعان قۇن سالىعى) تولەۋشىلەر سانى ارتادى

شۋلى بولعان قوسىلعان قۇن سالىعى (ققس) اقىرى ەنگىزىلدى. ەندى بۇل سالىقتى تولەۋشىلەر قاتارى ارتادى دەپ كۇتىلۋدە. بۇرىن جىلدىق اينالىمى 20 مىڭ اەك-تەن (78,6 ملن تەڭگە) اساتىن كاسىپكەرلەر عانا ققس تولەسە، ەندى 10 مىڭ اەك-كە (39,3 ملن تەڭگە) جەتەتىن تابىسى بارلار دا وسى ساناتقا ەنەدى. ۇكىمەت بۇل وزگەرىس ارقىلى بيۋدجەت تاپشىلىعىن جابۋدى كوزدەپ وتىر.

قوسىلعان قۇن سالىعىنىڭ (ققس) مولشەرلەمەسى 12-دەن 16%-عا كوتەرىلەدى.

جەكە تابىس سالىعى (جتس) پروگرەسسيۆتى بولادى: كوپ تابىس - كوپ سالىق فورماتى ەنگىزىلەدى.

جەكە تابىس سالىعى (جتس) ەندى پروگرەسسيۆتى جۇيە بويىنشا ەسەپتەلەدى. ياعني تابىسى ارتقان سايىن سالىق كولەمى دە وسەدى. جىلىنا 33 ملن تەڭگەگە دەيىن تابىس تاباتىندار ءۇشىن ستاۆكا 10% كۇيىندە قالادى. ال بۇل مەجەدەن اسقاندار ءۇشىن سالىق جوعارىلايدى.

بانكتەر مەن ويىن بيزنەسىنە سالىق كوبەيەدى، اۋىل شارۋاشىلىعىنا ازايادى.

كورپوراتيۆتى تابىس سالىعىنىڭ (كتس) جالپى مولشەرلەمەسى 20% دەڭگەيىندە ساقتالادى. الايدا كەيبىر سالالار ءۇشىن وزگەرەدى:

- كازينو، ويىن اۆتوماتتارى زالى، توتاليزاتورلار، بۋكمەكەرلىك كەڭسەلەر مەن بانكتەر ءۇشىن ستاۆكا 25% بولادى.

- اۋىل شارۋاشىلىعى جانە بالىق شارۋاشىلىعى ونىمدەرىن وندىرۋشىلەر ءۇشىن كتس 10%-دان 3%-عا دەيىن تومەندەيدى.

- اۋىل شارۋاشىلىعى كووپەراتيۆتەرى ءۇشىن ستاۆكا 6% مولشەرىندە بەلگىلەنەدى.

«ۋپروششەنكا» شەكتەۋلى بولادى: سالىق رەجيمدەرى قىسقارادى.

قازىرگى تاڭدا ەلدە 7 ءتۇرلى سالىق رەجيمى بار. جاڭا سالىق كودەكسى قابىلدانسا، ولاردىڭ سانى 3-ەۋگە دەيىن قىسقارادى:

- ءوزىن-ءوزى جۇمىسپەن قامتيتىندار ايىنا 1,17 ملن تەڭگەگە (300 اەك) دەيىن تابىس تاباتىن بولسا، ارنايى سالىق رەجيمىن (اسر) پايدالانا الادى. بۇل رەتتە جتس ستاۆكاسى – 0%، ال ارنايى تولەمدەر بويىنشا – 4%.

- جەڭىلدەتىلگەن دەكلاراتسيا نەگىزىندەگى اسر-دى جىلدىق تابىسى 600 مىڭ اەك (2,36 ملرد تەڭگە) بولاتىن كومپانيالار قولدانا الادى.

-جەڭىلدەتىلگەن دەكلاراتسيا نەگىزىندەگى اسر-دى جىلدىق تابىسى 600 مىڭ اەك (2,36 ملرد تەڭگە) بولاتىن كومپانيالار قولدانادى.

ال مىنا سالىق رەجيمدەرى جويىلادى:

• بولشەك سالىق;
• پاتەنت نەگىزىندەگى اسر;
• ارنايى ءموبيلدى قوسىمشا ارقىلى اسر;
• تۇراقتى شەگەرىمدى قولدانۋ ارقىلى اسر;
• اۋىل شارۋاشىلىعى تاۋارىن وندىرۋشىلەر مەن كووپەراتيۆتەرگە ارنالعان اسر.

ءسان-سالتانات سالىعى ەنگىزىلەدى.

ەندى ازاماتتار قىمبات كولىك، ۇشاق نەمەسە كەمە ساتىپ العانى ءۇشىن عانا ەمەس، ەل ىشىندە ساتقان جاعدايدا دا سالىق تولەيدى.

قۇنى 75 ملن تەڭگەدەن اساتىن كولىك ءۇشىن 10%-عا دەيىن سالىق سالىنادى. باعاسى 100 ملن تەڭگەدەن جوعارى ياحتا مەن جەكە ۇشاقتارعا دا اكتسيز سالىعى ەنگىزىلەدى. 450 ملن تەڭگەدەن جوعارى باعالاناتىن جىلجىمايتىن مۇلىككە 2% مولشەرىندە مۇلىك سالىعى تولەنەدى.

ايىم الماسقىزى

Abai.kz