رەسەي ارمياسىنىڭ نەگىزگى كۇشتەرى جازعى شابۋىل ناۋقانى اياسىندا، پوكروۆسكى باعىتىنىڭ شىعىس بولىگىندە اسكەر شوعىرلاندى. بۇل تۋرالى «حورتيتسا» جەدەل-ستراتەگيالىق اسكەر توبىنىڭ وكىلى ۆيكتور ترەگۋبوۆ «سۋسپىلنە» تەلەارناسىنىڭ ەفيرىندە مالىمدەدى.

ونىڭ ايتۋىنشا، بۇگىنگى تاڭدا مايداندا ەكى نەگىزگى باعىت بار - پوكروۆسكى (اسىرەسە كونستانتينوۆكاعا اپاراتىن جولدىڭ شىعىس بولىگى) جانە نوۆوپاۆلوۆسكى. ەكى ۋچاسكەدە دە ەڭ ءىرى جاۋىنگەرلىك بەلسەندىلىك تىركەلىپ وتىر.

«مايدان شەبىندەگى قاقتىعىستاردىڭ سانى باسقا باعىتتار بويىنشا ايتارلىقتاي ازايعان. رەسەيلىكتەردىڭ ناق وسى نوۆوپاۆلوۆسكىگە جانە پوكروۆسكىگە باسا نازار اۋدارىپ وتىرعانى انىق بايقالادى جانە وندا قازىر ەڭ اۋىر ۇرىستار ءجۇرىپ جاتىر»، - دەيدى ترەگۋبوۆ.
ترەگۋبوۆ: «نوۆوپاۆلوۆ باعىتىندا رەسەيلىك اسكەرلەر دونەتسك جانە دنەپروپەتروۆسك وبلىستارىنىڭ اكىمشىلىك شەكاراسى بويىندا بارىنشا قىسىم كورسەتىپ وتىر»، - دەيدى.

سونداي-اق، ونىڭ ايتۋىنشا، رەسەيلىكتەر دنەپروپەتروۆسك اۋماعىنا كىرۋ تۋرالى جالعان حابارلامالار تاراتىپ، بەلسەندى اقپاراتتىق سوعىس جۇرگىزىپ جاتىر.

«دنەپروپەتروۆسك وبلىسىنداعى داچنوە ەلدىمەكەنىن ۋكراينا قورعانىس كۇشتەرى تولىعىمەن باقىلاۋدا ۇستاپ وتىر»، - دەدى ۋكراينا قارۋلى كۇشتەرىنىڭ وكىلى.

پوكروۆسكى باعىتىنا قاتىستى: ترەگۋبوۆ ءدال وسى جەردە شىعىستان كونستانتينوۆكاعا وتۋگە تىرىساتىن رەسەيلىكتەردىڭ نەگىزگى كۇشتەرى شوعىرلانعانىن اتاپ ءوتتى. بۇل قالانى باسىپ الۋ ءۇشىن تورەتسك پەن چاسوۆوي يار جاقتان جاسالعان بۇعان دەيىنگى شابۋىلدار ورىستار ءۇشىن تابىستى بولعان جوق.

ترەگۋبوۆ: «تورەتسك جانە چاسوۆوي يار اۋدانىندا شايقاستاردىڭ سانى ايتارلىقتاي ازايدى. مەنىڭ ويىمشا، رەسەيلىكتەر ول باعىتتان ۇمىتتەرىن ۇزە باستادى. قازىر باسقا باعىتتاردا شابۋىلداۋدا»، - دەپ حابارلادى.
ۋكراينا قك اقپاراتى بويىنشا، قازىر پوكروۆسكى باعىتىنا رەسەيلىكتەر 100 مىڭنان استام اسكەردى شوعىرلاندىرعان. پوكروۆسك باعىتى وەسەي اسكەرىنىڭ جازعى شابۋىلىنىڭ نەگىزگى باعىتى بولماق. ال ۋكراينانىڭ قورعانىس كۇشتەرى ءوز پوزيتسيالارىن ۇستاپ، رەسەيلىك اسكەردىڭ قىسىمىن تەجەۋدى جالعاستىرۋدا.

Abai.kz