مەملەكەت باسشىسى قاسىم-جومارت توقاەۆتىڭ ءباسپاسوز حاتشىسى رۋسلان جەلدىباي تاعى ءبىر قىزمەتكە تاعايىندالدى.

ەندى ول حالىقارالىق دزيۋدو فەدەراتسياسىنىڭ (IJF) جاڭا تەحنولوگيالار جانە تيىمدىلىكتى ارتتىرۋ بويىنشا كوميسسياسىنىڭ ديرەكتورى لاۋازىمىن قوسا اتقارادى.

بۇل تۋرالى رۋسلان جەلدىباي Facebook پاراقشاسىندا مالىمدەدى.

"حالىقارالىق دزيۋدو فەدەراتسياسىنىڭ (IJF) جاڭا تەحنولوگيالار جانە تيىمدىلىكتى ارتتىرۋ بويىنشا كوميسسياسىنىڭ ديرەكتورى قىزمەتىنە تاعايىندالدىم.

بۇل – قوسىمشا قوعامدىق قىزمەت. سەنىم بىلدىرگەن IJF باسشىلىعىنا، ماريۋس ۆيزەر مىرزاعا العىس بىلدىرەمىن.

ەلىمىزدىڭ حالىقارالىق سپورت ۇيىمدارىندا وكىلدەرىنىڭ بولۋى – وتە ماڭىزدى. بۇل قادام ارقىلى ەلىمىزدىڭ بەدەلىن نىعايتۋمەن قاتار، تاجىريبە دە الماسامىز.

دزيۋدودان ەلىمىزدە دامىتۋ باعىتىندا ءبىراز جۇمىس اتقارىلىپ جاتىر. ءالى دە ماسەلە جەتەرلىك. دزيۋدونى كەڭىنەن دامىتۋ ءۇشىن ارنايى اكادەميا، ال ايماقتاردا ورتالىقتار قاجەت بولىپ تۇر. حالىقارالىق ىنتىماقتاستىقتى دا ارتتىرامىن.

وسى ىسكە بارىنشا ءوز ۇلەسىمدى قوسامىن", –  دەپ جازدى رۋسلان جەلدىباي پاراقشاسىندا.

Abai.kz