مەملەكەت باسشىسىنىڭ تاپسىرماسىنا سايكەس بيىل قازاقستاندا قارجى زاڭناماسىن رەفورمالاۋدىڭ ۇلكەن پاكەتى دايىندالۋدا. بۇل تۋرالى قر ۇلتتىق بانكىنىڭ توراعاسى تيمۋر سۇلەيمەنوۆ ۇكىمەت وتىرىسىندا مالىمدەدى.

ول ۇلتتىق بانك ماكروەكونوميكالىق جانە قارجىلىق تۇراقتىلىقتى قامتاماسىز ەتۋ بويىنشا جۇمىستاردى جالعاستىرا بەرەتىنىن اتاپ ءوتتى.

ينفلياتسيانىڭ ءوسۋ تاۋەكەلىن ازايتۋ ءۇشىن رەسپۋبليكادا دەزينفلياتسيالىق ساياسات جۇرگىزىلمەك. اقشا-كرەديت ساياساتى قۇرالدارىنان بولەك قوسىمشا شارالار قابىلدانادى.

- التىن ساتىپ الۋ شەڭبەرىندە ۆاليۋتالىق وپەراتسيالاردى تەڭدەستىرۋ جالعاسپاق.

- جەكە تۇلعالاردىڭ نەسيەلەرى بويىنشا كونترتسيكلدىك كاپيتال بۋفەرىن ەنگىزۋ تۋرالى شەشىم قابىلداندى.

- بانكتەر ءۇشىن مىندەتتى رەزەرۆتەردىڭ ەڭ تومەنگى تالاپتارىن ارتتىرۋ جۇمىسى پىسىقتالۋدا.

- اكتيۆتەردى باسقارۋ اياسىندا ۇلتتىق قور مەن بىرىڭعاي جيناقتاۋشى زەينەتاقى قورىنىڭ پورتفەلىندە جوعارى كىرىستىلىككە يە اكتيۆتەردىڭ ۇلەسىن ۇلعايتۋ كوزدەلىپ وتىر.

- قارجى سەكتورىنىڭ تسيفرلىق ترانسفورماتسياسى جالعاسادى. تسيفرلىق تەڭگەنى ماسشتابتاۋ جۇمىستارى جۇرگىزىلەدى. بۇل تسيفرلىق تەڭگەنى مەملەكەتتىك قارجىنىڭ جاڭا باعىتتارىندا ەنگىزۋ مۇمكىندىكتەرىن پىسىقتاۋدى قامتيتىن بولادى.

- بيىل مەملەكەت باسشىسىنىڭ تاپسىرماسىنا سايكەس ەلىمىزدىڭ قارجى زاڭناماسى بويىنشا اۋقىمدى رەفورمالار توپتاماسى ازىرلەنۋدە. بۇل توپتامادا بانكتەر، تولەمدەر، باعالى قاعازدار نارىعىن دامىتۋ جانە باسقا دا ماسەلەلەر قامتىلعان. وعان قوسا تسيفرلىق قارجى اكتيۆتەرىن رەتتەۋدى جانە ۇلتتىق تسيفرلىق قارجى ينفراقۇرىلىمىن ەنگىزۋ جوسپارلانۋدا. تولەم نارىعىن ودان ءارى دامىتۋدى جالعاستىرامىز. اتالعان شارالار قارجى سەكتورىنىڭ ەكونوميكانى دامىتۋعا جانە ازاماتتاردىڭ ءال-اۋقاتىن جاقسارتۋعا قوسىپ جاتقان ۇلەسىن ارتتىرادى، ونىڭ ءداستۇرلى سەكتورلارىنا دا، جاڭا سالالارعا دا سەرپىن بەرەدى.

Abai.kz