بۇل ادەبي بايقاۋ 2025 جىلدىڭ «جۇمىسشى ماماندىقتار جىلى» دەپ جاريالانۋىنا وراي ۇيىمداستىرىلىپ وتىر. «پرەزيدەنت قاسىم-جومارت كەمەلۇلى توقاەۆ قازاقستاننىڭ بولاشاعى ينجەنەرلىك كادرلاردى دايىنداۋ ساپاسىنا تىكەلەي بايلانىستى ەكەندىگىن، سونداي-اق، وسى سالانى دارىپتەۋ ارقىلى جۇمىسشى ماماندىقتارى بەدەلى مەن ءيميدجىن كوتەرە وتىرىپ، قوعامدا ەڭبەكقور جانە ناعىز مامان بولىپ قالىپتاسۋ يدەياسىن ناسيحاتتاۋ قاجەتتىگىن ايتقان ەدى. بۇل بايقاۋ ەل پرەزيدەنتىنىڭ رەفورماسىنا سايكەس، «ەڭبەك ادامى – ءوندىرىس ادامى»، «جۇمىسشى ماماندىقتارى جىلى»، «وڭىرلىك دامۋ مەن ەرەكشەلىكتى اشقان ۇزدىك ماتەريال» جانە «ينجەنەرلەردىڭ قوعامداعى ورنى» اتتى نەگىزگى تاقىرىپتاردى قامتيدى»، دەيدى ءىس-شارانى ۇيىمداستىرۋشىلار.

«ەڭبەك ادامى – 2025» رەسپۋبليكالىق بايقاۋىندا شىعارماسى ەڭ ۇزدىك دەپ تانىلعان باس جۇلدە (گران-پري) العان قالامگەرگە «قازاقستان جازۋشىلار وداعى» رقب-ءى مەن قازاقستان رەسپۋبليكاسى ۇلتتىق ينجەنەرلىك اكادەمياسىنىڭ ءتوس بەلگىسىمەن جانە ديپلومىمەن ماراپاتتالادى.

باس جۇلدە (گران-پري) – 10 000 000 (ون ميلليون) تەڭگە.

1-ورىن (سەرتيفيكات) – 5 000 000 (بەس ميلليون) تەڭگە.

2-ورىن (سەرتيفيكات) – 2 500 000 (ەكى ميلليون بەس ءجۇز مىڭ) تەڭگە.

3-ورىن (سەرتيفيكات) – 1 000 000 ء(بىر ميلليون) تەڭگە.

سونىمەن قاتار بايقاۋعا قاتىسۋشىلار:

1. «زاماناۋي وندىرىستەگى ەڭبەك ادامىنىڭ بەينەسى»;
2. «ينجەنەرلەردىڭ قوعامداعى ورنى»;
3. «وڭىرلىك دامۋ مەن ەرەكشەلىكتى اشقان ۇزدىك ماتەريال» اتالىمى بويىنشا 500 000 (بەس ءجۇز) مىڭ تەڭگەدەن ىنتالاندىرۋ سىيلىقتارى بويىنشا ماراپاتتالادى.

بۇگىنگە دەيىن قازاقستان جازۋشىلار وداعى شىعارماشىلىق قاۋىمداستىقتارمەن، مەملەكەتتىك مەكەمەلەرمەن، قوعامدىق ۇيىمدارمەن جانە اتىمتاي جومارت مەتسەناتتارمەن تىعىز بايلانىستا جەمىستى جۇمىس جۇرگىزىپ كەلەدى. ايتا كەتەر بولساق، بۇعان دەيىن ۇلتتىق سپورت قاۋىمداستىعىمەن بىرلەسىپ ۇيىمداستىرىلعان «قۇلاگەر» بايقاۋى ءوز ناتيجەسىن بەرىپ، وندا جەڭىمپاز بولعان اقىن-جازۋشىلارىمىز قوماقتى قارجىلاي سىيلىقتارعا يە بولىپ، رۋحاني ءارى ماتەريالدىق قولداۋعا يە بولعان بولاتىن.

سول ىزگى ءداستۇردىڭ جالعاسى رەتىندە، قازاقستان ينجەنەرلىك اكادەمياسىمەن جاسالعان ەكىجاقتى كەلىسىم نەگىزىندە قازاقستان جازۋشىلار وداعى «ەڭبەك ادامى – 2025» اتتى جاڭا رەسپۋبليكالىق بايقاۋدى جاريالاپ وتىر. بۇل بايقاۋ – ەلىمىزدىڭ ەڭبەك ادامىن ۇلىقتاۋ، ماڭداي تەرىمەن قوعام دامۋىنا ۇلەس قوسىپ جۇرگەن ازاماتتاردىڭ بەينەسىن ادەبيەت ارقىلى ايشىقتاۋ ماقساتىن كوزدەيدى.

بايقاۋ تالاپتارى مەن شارتتارىمەن قازاقستان جازۋشىلار وداعىنىڭ رەسمي سايتى مەن الەۋمەتتىك جەلىدەگى پاراقشالارىنان تانىسۋعا بولادى.

Abai.kz